Ipategyo ti Sagrado a Serbisioyo
TAPNO maragpat ti aniaman a makagunggona a kalat, masapul a sisasaganatay nga agsakripisio. Tapno agbalin a maysa a doktor, kasapulan ti adu a tawen a panagadal ken determinasion, kasta met ti kuarta. Binusbos ti maysa a naballigi a gymnast ti kaaduan iti kinaagtutubona iti panagsanay a progresibo kadagiti narigrigat a rotina ta determinado a manggun-od iti perpeksion. Mabalin a taliawen met ti maysa a nalaing a pianista dagiti tawen a binusbosna iti panagsanay.
Nupay kasta, adda maysa a kalat a mangyeg gunggona nga adayo a napatpateg ngem iti maaramid a panagsakripisio. Ania dayta? Isu ti pribilehio nga agbalin kas maysa nga adipen ti Kangatuan, ni Jehova a Dios. Aniaman a panagsakripisio nga aramidentayo iti panangusar ti tiempo, kuarta, wenno pigsa, ti pribilehio a panangipaay ti sagrado a serbisio iti Namarsua kadatayo mangyeg kadagiti gunggona nga awan pumada. Pudno dagiti sasao ni apostol Pablo: “Ti nadiosan a debosion makagunggona iti isuamin a bambanag, ta addaan kari a biag ita ken daydiay umayto.” (1 Timoteo 4:8) Kitaentayo no kasano a pudno dayta.
Idi Damo a Maammuantayo ti Maipapan iti Dios
Kaaduan a mangipangag a situtulok iti naimbag a damag ken mangrugi nga agadal ti Biblia kasla saanda a mabigbig ti kadakkel dagiti panagbalbaliw a mapagtengto iti biagda. Umuna, mabalin a mapukaw ti baro nga estudiante ti Biblia dagiti sumagmamano a gayyem a di makaawat no apay a din makitimtimpuyog kadakuada iti kabibiag a bigbigenna itan a mangpabain iti Dios. (1 Pedro 4:4) Mabalin a mapadasan dagiti dadduma ti ibubusor ti pamilia ken mabalin a masair a makakita kadagidiay ipatpategda a mangiparangarang ti panangilaksid, pananggura pay ketdi, ken Jehova. (Mateo 10:36) Mabalin a maysa dayta a narigat a panagsakripisio.
Idiay pagtrabahuan wenno iti eskuelaan, adda met dagiti pakasapulan iti panagsakripisio. Inton agangay isardeng ti baro nga estudiante ti Biblia ti makiraman kadagiti nailubongan a pasken ken dadduma a parambak. Saanen a dumngeg kadagiti narugit a panagsasao dagiti katrabahuan wenno kaeskuelaanna, wenno makibinnales kadagiti naalas nga angaw kadakuada. Imbes ketdi, ikagumaanna a suroten ti pammaregta a masarakan idiay Efeso 5:3, 4: “Ti pannakiabig ken tunggal kita ti kinarugit wenno kinaagum saan koma a pulos madakamat iti nagtetengngaanyo, kas maitutop kadagiti nasantuan a tattao; uray ti nakababain nga ugali wenno minamaag a panagsasao wenno naalas a panagang-angaw, bambanag a di mayanatup, ngem imbes ketdi ti panangipaay iti panagyaman.”
Dagiti kasta a panagbalbaliw mabalin a pagbalinenna ti estudiante ti Biblia a naisabsabali. Mabalin a narigat dayta, nangruna iti maysa nga agtutubo nga ages-eskuela pay laeng. Gapu kadagiti agsasaganad a pasken a pakaipasanguanna, kasta met dagiti maibusor iti Dios a sursuro, kas ti ebolusion, ken ti kanayon a panangpilpilit a makikadua iti bunggoy, masapul nga itultuloy dagiti agtutubo a Kristiano ti makidangadang maipaay iti pammati. Ti panangsurot kadagiti dalan ti Dios pagbalinenna ida a naiduma ken mabalin nga agresulta iti pananguyaw dagiti kaeskuelaan ken mannursuro. Nangruna a narigat nga awaten daytoy bayat dagiti sensitibo a panawen ti kinatin-edyer, ngem maikari iti panagsakripisio ti pananggun-od iti anamong ti Dios.
Pudpudno Kadi a Panagsakripisio Dagita?
Dagiti dadduma a banag nga iti damo agparang a panagsakripisio ket agbanagto a bendision iti kamaudiananna. Dadduma ti masapul nga idianda ti nakayugalian a panagtabako. (2 Corinto 7:1) Mabalin a maysa daytoy a pannakidangadang, ngem anian a bendision no dayta a makarimon a bisio ket maparmek kamaudiananna! Kasta met ti maikuna maipapan iti panangparmek iti pannakaadikto kadagiti dadduma a droga wenno iti alkohol. Nagsayaat ketdin ti biag no awan ti kakasta a makadadael nga aramid! Masapul a palintegen dagiti dadduma ti panagtiponda kas agassawa. Dagidiay agdendenna a saan a legal nga agassawa ti rumbeng nga agasawa wenno agsinada. (Hebreo 13:4) Dagidiay agbibiag nga aduan iti asawa rumbeng a pagtalinaedenda laeng ti asawa ti kinaagtutuboda. (Proverbio 5:18) Ramanen ti kakasta a panagbalbaliw ti panagsakripisio, ngem mangyegda iti talna iti pagtaengan.
Panunoten Dagiti Gunggona
Wen, pudpudno a magunggonaan ti siasinoman a mangannurot kadagiti linteg ni Jehova. Iti kaunaan a gundaway iti biagna, rugianen ti estudiante ti Biblia nga awagan ti Namarsua iti naganna, a Jehova. (Salmo 83:18) Masursuro ti estudiante nga ayaten ni Jehova bayat a maammuanna dagiti nakaskasdaaw a banag nga inaramidna ken aramidennanto pay laeng iti sangatauan. Kadagiti pagilian a sadiay gagangay ti panagbuteng kadagiti natay, maikkatna daytoy inaanito a panagbuteng, nga ammona a matmaturog dagiti natay, nga agur-uray iti panagungar. (Eclesiastes 9:5, 10) Ken anian a makapabang-ar a maammuan a saan a tutuoken ni Jehova dagiti tattao iti agnanayon idiay impierno! Wen, ti kinapudno ti talaga a mangwayawaya kenkuana.—Juan 8:32.
Bayat nga itunos ti estudiante ti panagbiagna nga ad-adda kadagiti pagalagadan ni Jehova, makagun-od iti nadalus a konsiensia ken panagraem iti bagi. Ti pannakasursuro nga agbiag kas maysa a pudno a Kristiano ti tumulong kenkuana a mangaywan a nasaysayaat iti pamiliana, a mangyeg iti dakkel a pannakapnek ken rag-o. Kalpasanna adda dita ti itatabuno kadagiti gimong idiay Kingdom Hall. Anian a makaparagsak a kapadasan! Adda ditoy dagiti tattao a pudpudno a mangipakpakita ti nabara nga ayat a kunaen ti Biblia a rumbeng a pakailasinan dagiti tattao ti Dios. (Salmo 133:1; Juan 13:35) Nadalus ken makapabileg ti panagsasaoda bayat a sawenda “dagiti natan-ok a bambanag ti Dios.” (Aramid 2:11) Wen, ti pannakikadua “iti intero a timpuyog dagiti kakabsat” ket maysa a pagtaudan ti kinaragsak. (1 Pedro 2:17) Ti kasta a nasayaat a pannakikadua tulonganna ti estudiante ti Biblia a ‘mangikawes ti baro a personalidad a naparsua maitunos iti pagayatan ti Dios iti pudno a kinalinteg ken kinasungdo.’—Efeso 4:24.
Panagdedikar
Bayat a rumang-ay ti indibidual iti pannakaammo, isut’ matignay kamaudiananna babaen ti panagayat ken Jehova a mangidedikar ti biagna kenkuana ket isimbolo daytoy a dedikasion babaen ti bautismo iti danum. (Mateo 28:19, 20) Ti balakad ni Jesus ket sakbay nga alaen daytoy nga addang, usigen a naimbag dagiti adalanna ti nairaman iti dayta. (Lucas 14:28) Laglagipenyo, ti maysa a dedikado a Kristiano yun-unana ti pagayatan ni Jehova ken tallikudanna dagiti nainlasagan a banag. Ikagumaanna nga isardeng “dagiti aramid ti lasag” ken sukayen “ti bunga ti espiritu.” (Galacia 5:19-24) Ti balakad a masarakan idiay Roma 12:2 ti naan-anay nga agakem itan iti biagna: “Sumardengkayo a maisuksukog maitunos iti daytoy a sistema ti bambanag, no di ket mapagbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken perpekto a pagayatan ti Dios.” Iti kasta, ti maysa a dedikado a Kristiano usarenna ti biagna nga addaan napabaro a panggep.
Nupay kasta, usigenyo no ania dagiti awatenna. Maysa a banag, addaan itan iti personal a pannakirelasion iti Namarsua iti uniberso. Maideklara a nalinteg gapu ta mamatmatan kas gayyem ti Dios! (Santiago 2:23) Buyogen ti naun-uneg a kaipapanan, awaganna ti Dios kas “Amami nga adda iti langlangit.” (Mateo 6:9) Ti maysa pay a bendision a matagiragsak ti kabbaro a dedikado a tao isut’ pannakaammona a ti biag pudpudno nga addaan panggep ken ti agbiag a maitunos iti dayta a panggep. (Eclesiastes 12:13) Iti panangsurot iti panangidaulo ni Jesus, mapaneknekanna nga ulbod ti Diablo babaen ti panagtalinaed a matalek. Anian a rag-o ti yeg dayta iti puso ni Jehova!—Proverbio 27:11.
Siempre, bayat nga agib-ibtur ti maysa a Kristiano iti dana ti kinamatalek, adu pay a panagsakripisio ti maaramid. Kasapulan ti panawen tapno makiraman iti addaan kaipapanan a personal ken kongregasional a panagadal iti Sao ti Dios. (Salmo 1:1-3; Hebreo 10:25) Ti tiempo para iti ministerio iti tay-ak ket masapul a magatang manipud iti dadduma nga ar-aramid. (Efeso 5:16) Kasapulan met ti tiempo ken panagregget iti itatabuno kadagiti panaggigimong dagiti Saksi ni Jehova ken iti panagdaliasat nga agturong kadagiti asamblea ken kombensionda. Mabalin a kasapulan ti panagsakripisio iti panangipaay iti pinansial a tulong para iti Kingdom Hall ken ti sangalubongan a trabaho a panangasaba. Nupay kasta, kas mapaneknekan ti riniwriw a Kristiano, ti naimpusuan a pannakiraman iti kakasta a banag mangyeg ti kinaragsak. Kinuna ni Jesus: “Ad-adu ti kinaragsak iti panangted ngem iti panangawat.”—Aramid 20:35.
Ad-adu nga amang dagiti gunggona iti panangsuportar iti trabaho ni Jehova ngem dagiti panagsakripisio a maaramid. Bayat nga agmataengantayo, agbalin nga ad-adda a nabunga ken makaparagsak ti ministeriotayo. Kinapudnona, awanen ti makayeg iti ad-adu a pannakapnek no di ti panangisuro iti kinapudno ti Biblia iti maysa a tao ken pannakakita kenkuana nga agdaydayaw ken Jehova. Ket no maysa a kameng ti pamilia ti kabbaro a managdaydayaw, nalabit maysa nga ubing a nasanay “iti disiplina ken panangiturong-panunot ni Jehova,” mangyeg dayta iti naisangsangayan a rag-o. (Efeso 6:4) Makitatayo dagiti nabaknang a pammendision ti Dios iti panangikagumaantayo nga agbalin kas ‘katrabahuanna.’—1 Corinto 3:9.
Dagiti Dadduma Pay a Gunggona iti Matalek a Panagserbi
Agpayso, maaddaantayo kadagiti parikut bayat nga adda daytoy a sistema ti bambanag. Mabalin nga ad-adda pay a dumegdeg dagiti parikut bayat nga umab-ababa ti panawen ti Diablo. Mabalin nga agsagabatayo iti pannakaidadanes wenno agibtur iti sulisog. Ngem ti pannakaammo nga adda ti Dios kadatayo ti mangliwliwa ken mangted kadatayo iti kired nga agandur. (1 Corinto 10:13; 2 Timoteo 3:12) Dadduma a pada a Kristiano ti nagibtur iti naulpit a pannakatrato iti adu a tawen, ngem nagtultuloyda gapu iti panagayatda iti Dios. Dagidiay sibaballigi a mangib-ibtur kadagiti nadumaduma a suot mariknada ti kas iti narikna dagiti apostol idi a nasaplit ken kalpasanna naruk-atanda. Kunaen ti Aramid 5:41: “Dagitoy, ngarud, pimmanawdan iti sanguanan ti Sanhedrin, nga agragrag-oda agsipud ta naibilangda a maikari a maibabain maigapu iti naganna.”
Ad-adu nga amang ti gunggona ti panagibtur ngem ti aniaman a panagsakripisio uray itan. Ngem laglagipenyo, ti nadiosan a debosion “addaan kari” saan laeng “a biag ita” ngem kasta met “daydiay umayto.” (1 Timoteo 4:8) Anian a nagsayaat ti namnama daydiay makapagibtur! No matalekkayo, malasatanyonto ti dakkel a rigat a mangtanda ti panagngudo daytoy a sistema ti bambanag. Wenno no mataykayo sakbay dayta awan pay kapadana a pasamak, mapagungarkayto idiay baro a lubong a sumaruno. (Daniel 12:1; Juan 11:23-25) Panunotenyo ti ragsak a mariknayo inton maikunayo: “Babaen ti tulong ni Jehova, nakapagtalinaedak a matalek ken naawatko ti gunggonak!” Anian a makaparagsak a tawiden ti maysa a bingay iti dayta a daga, “a mapnonto iti pannakaammo ken ni Jehova a kas la kadagiti dandanum saknapanda ti baybay.”—Isaias 11:9.
Wen, kasapulan ti panagsakripisio iti panagserbi iti Dios. Ngem no idilig kadagiti gunggona, bassit laeng ti gatad. (Filipos 3:7, 8) No panunotentayo ti amin nga ar-aramiden ti Dios para kadagiti adipenna ita ken ti aramidennanto pay laeng iti masanguanan, maikunatayo dagiti sasao ti salmista: “Ania ti itdekto ken Jehova a subad dagiti paraburna kaniak?”—Salmo 116:12.