Sadiay Pakaipakitaan ti Kinamanagpadagus Kadagiti Ganggannaet
Idi Setiembre 1994, nagsurat ti maysa a lalaki manipud Michigan, E.U.A., iti kongregasion dagiti Saksi ni Jehova idiay Lebanon, Tennessee. Inlawlawagna:
“Idi Domingo, Hunio 6, 1993, tinabunuak ti palawag publikoyo ken ti Panagadal iti Pagwanawanan. Dayta idi ti damo nga iseserrekko iti maysa a Kingdom Hall, ket talaga a naallukoyak iti isuamin nga umis-isem a rupa ken ti napasnek nga ayat a naipakita kaniak. Sumagmamano a minuto a naladawak, ket idi naawatak, nagtugawak a bukodko. Maysa nga agtutubo a pagassawaan iti dayta met la nga intar [ti tugaw] ti nangipabulod kaniak iti Biblia ken idi agangay ti kopia ti magasin a Pagwanawanan para iti panagadal.
“Kalpasan dagiti gimong kaaduan kadakayo ti nakisarita kaniak, nakialamano, ket pinagbalinyo a makaay-ayo unay a kapadasan ti panagtalinaedko. Idi pimmanawakon idi agangay iti Kingdom Hall-yo, nangalaak iti tallo a libro—ti Biblia, Ti Katan-okan a Tao a Nagbiag Pay Laeng, ken ti Mabalinyo ti Agbiag nga Agnanayon iti Paraiso a Daga. Iti dayta a rabii binasak ti kaaduan [a paset] ti libro a Biag nga Agnanayon, ket naammuak ti baro a nagan ti Diosko, ni Jehova. . . .
“Kayatko nga ibaga kadakayo amin no kasano ti panangapresiarko iti nagsayaatan a kinamanagpadagusyo iti naan-anay a ganggannaet ken nangnangruna a kayatko a maammuanyo a . . . nabautisaranak idi Hulio 9, 1994, iti ubing pay laeng nga edad a 70.”
No kayatyo ti umawat iti napasnek a kinamanagpadagus manipud kadagidiay a mangtagtagiragsak iti panagserbi iti Dios, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5. Iturongdakayo iti maysa a Kingdom Hall nga asideg iti pagtaenganyo.