Magnakayo Babaen ti Pammati
1 Minilion a tattao ti mangipampamaysa kadagiti material a sanikua iti biagda, a simamaag nga agtalekda iti makaallilaw a pannakabalin ti kinabaknang. (Mat. 13:22) Maidagadag a surotentayo ti nasaysayaat a dana, a pagreggetantayo a gun-oden dagiti naespirituan a gameng. (Mat. 6:19, 20) Kaipapanan daytoy ti ‘pannagna babaen ti pammati.’—2 Cor. 5:7.
2 Ti sao a “pammati” iti Griego ipasimudaagna ti panagtalged, panagtalek, natibker a pannakaallukoy. Ti pannagna babaen ti pammati kaipapananna ti panangsango kadagiti narikut a kasasaad a buyogen ti panagtalged iti Dios, nga agtalek iti kabaelanna a mangiturong kadagiti addangtayo. Intuyang ni Jesus ti perpekto nga ulidan; impamaysana ti pudpudno a napateg. (Heb. 12:2) Umasping iti dayta, kasapulan nga ipamaysatayo ti pusotayo kadagiti di makita, naespirituan a banag.—2 Cor. 4:18.
3 Masapul met a sititibker a patientayo nga iturturong ni Jehova ti makitkita nga organisasionna iti sidong ti panangiwanwan “ti matalek ken masirib nga adipen.” (Mat. 24:45-47) Maipakitatayo ti pammatitayo no ‘agtulnogtayo kadagidiay mangidadaulo kadatayo’ iti kongregasion. (Heb. 13:17) Ti sipapakumbaba a pannakitunos iti teokratiko nga urnos iparangarangna ti panagtalektayo ken Jehova. (1 Ped. 5:6) Naimpusuan koma a suportarantayo ti trabaho a naipaaramid iti organisasion. Daytoy ti mangyasideg kadatayo a nadekdekket kadagiti kakabsattayo iti nalagda a singgalut ti ayat ken panagkaykaysa.—1 Cor. 1:10.
4 No Kasano a Mapabileg ti Pammati: Masapul a ditay ipalubos a kumapuy ti pammatitayo. Nasken a pagreggetantayo a pabilgen dayta. Ti kanayon a panagadal, panagkararag, ken itatabuno iti gimong tulongannatayo a mangpabileg iti pammatitayo tapno, iti tulong ni Jehova, madaeranna ti aniaman a pannubok. (Efe. 6:16) Adda kadi nasayaat a rutinayo para iti inaldaw a panagbasa iti Biblia ken panagsagana kadagiti gimong? Masansan kadi nga ut-utobenyo ti maad-adalyo, ken umad-adanikayo kadi ken Jehova iti kararag? Ugaliyo kadi ti tumabuno iti amin a gimong ken makipaset kadagitoy?—Heb. 10:23-25.
5 Mapaneknekan ti nabileg a pammati babaen kadagiti naimbag nga aramid. (Sant. 2:26) Isapsapulyo kadi dagiti gundaway a mangiranud iti naimbag a damag? Mabalin kadi a baliwbaliwan ti kasasaadyo tapno ad-adu ti maaramidanyo iti ministerio? Iyap-aplikaryo kadi dagiti singasing a maaw-awattayo tapno sumayaat ti kalidad ken ad-adda nga epektibo ti ministeriotayo?
6 Namakdaar ni Jesus maipapan iti nalabes a pannakakumikom kadagiti inaldaw nga aramid iti biag ken panangipalubos kadagiti material wenno inaagum a banag a mamagkudrep iti naespirituan a panagkitatayo. (Luc. 21:34-36) Masapul a siiinget nga annadantayo ti pannagnatayo tapno saan a marba ti pammatitayo. (Efe. 5:15; 1 Tim. 1:19) Namnamaentay amin nga iti kamaudiananna maikunatayto a ‘nakirupaktayo iti nasayaat a dangadang, tinaraytayo ti tarayen agingga iti pagpatinggaan, ken natungpaltayo ti pammati.’—2 Tim. 4:7.