“Patpatgentayo dagiti Natataengan!”

“DI MET aya adda sirib kadagiti lallakay ken iti pannakaawat iti kinaatiddog dagiti al-aldaw?” insaludsod ni Job. (Job 12:12) Umas-asping iti dayta kinuna ni Salomon: “Ti ubanan nga ulo balangat ti kinadayag no masarakanto iti dalan ti kinalinteg.” (Proverbio 16:31) Dagitoy a sasao ti naiyebkas idi panawen a dagiti natataengan ket maidaydayaw ken mapagraraemanda. Ken maulit-ulit nga ipakpakita ti Biblia no kasano a dagidiay agtutubo kadagidiay nga al-aldaw nagunggonaanda manipud pannakilangenlangenda kadagiti natataengan.

Ni Ruth, kas pangarigan, ti addaan adu a tawtawen a gundaway a nakapaliiw ken nagpampanunot maipapan iti ulidan nga impakita ni katuganganna a ni Noemi. Daytoy a pannakilangenlangen ti nalawag a nangibunga iti panagtarigagay ni Ruth nga agdayaw ken Jehova. Gapuna idi naaddaan gundaway a sumina ken Noemi ken agsubli idiay ilina a managdaydayaw kadagiti ladawan, simamatalek a kinuna ni Ruth: “Ta sadinoman a papanam umayakto, ket sadinoman a pagnaedam iti rabii agnaedakto. Ti ilim isunto ti ilik, ket ti Diosmo isunto ti Diosko.” (Ruth 1:16, 17) Wen, kas resulta ti pannakigayyemna ken Noemi, nagbalin ni Ruth a maysa a “maikari a babai.”​—Ruth 3:11.

Ni Timoteo ti sabali pay a nakagunggona manipud pannakilangenlangenna iti nataengan a tao. Adu a tawen ti binusbosna a nakipagdaliasat a kadua ni apostol Pablo. Ket uray pay idi ti pannakaibalud ti namagsina kadakuada, immawat ni Timoteo kadagiti sursurat manipud ken Pablo a makaparegta a “mangparayray iti sagut ti Dios” nga adda ken Timoteo. (2 Timoteo 1:6-8) Naan-anay unay ti pannakaadal ni Timoteo ken Pablo ta idi nagsurat kadagiti taga Filipos, inlawlawag ni Pablo nga ‘awan kenkuana ti sabali a kananakemna [ni Timoteo] a mangisakit a sianep iti kasasaadda.’​—Filipos 2:20.

Kadagitoy nga al-aldaw, nupay kasta, ti panagraem kadagiti natataengan ti ngangnganin nagawanen iti dadduma a dagdaga. Kasta met aya kadagiti Kristiano, nupay kasta? Nikaanoman. Dagiti pudno a Kristiano itatta kaskasdi nga adu ti maipaay dagiti natataengan gapu iti pammati, debosion, ken kapadasanda iti biag. Kas pangarigan, maysa a kabsat a babai ti nagsurat: “Kaanoman a mariknak a kasla mapadpadagsenanak manipud iti daytoy a sistema makitak ti bagik a sapsapulek dagiti natataengan iti uneg ti kongregasion, a mangpatured kaniak gapu iti kinatibkerda.” Maysa nga agtutubo a lalaki, a 34 tawennan, kinunana met maipapan kadagiti matalek a natataengan: “Tultulongandak iti amin a paset ti panagbiagko. Kas pangarigan, kasapulak nga ammuen no kasano ti panangragpat ti panagbalin a nalinteg. Bueno, ti 72-años a kabsat a lalaki ti nagkuna kaniak, ‘Siguraduem nga aramiden dagiti bambanag a kayat ni Jehova nga ipangpangrunam. Daytat’ maysa a di agressat a pannakidangadang. Ngem umayto met laeng ti kinatimbeng bayat a sapulem nga umun-una ti Pagarian.’”

Iti sabali pay a kaso, maysa a kabsat nga 87 años ti kalakaynan ti nagsakit ti nadagsen. Maysa a panglakayen, agraman maysa a di aktibo a kabsat, ti nangsarungkar kenkuana. Buyogen ti panagsangit, kinuna ti di aktibo a kabsat, “Nagimbaganka a gayyem. Il-iliwendakanto.” A sinungbatan met ti lakay, “Il-iliwenkayto met.” Kaskasdi a makasangit, kinuna ti di aktibo a kabsat, “Sarakenkanto idiay Baro nga Urnos​—no daytat’ umay.” Nupay nakapuy, ti lakay a kabsat nagtugaw, ket sititibker a simmungbat: “Daytat’ umay.” Numan pay saan a natignay ti di aktibo iti daytoy a pammaregta, ti pammati ti lakay ti nangsagid ti puso ti panglakayen a nakapaliiw iti daytoy. “Ti pammatina dakkel naitulongna kaniak,” kunana a silalagip.

Dagiti natataengan a kakabsat a lallaki ken babbai masansan agad-adawda manipud kapadasanda iti Nakristianuan a panagbiag ket mangipapaayda kadagiti nasin-aw ken praktikal a pammagbaga. “Ubbaenyo dagiti babassit nga annakyo ket arakupenyo ida,” imbalakad ti maysa a nataengan, “ta di agbayag dadakkeldanton. Aywananyo ida nga umuna. Isuda dagiti nasusudi nga adalanyo.” “No umay dagiti pammarigat manipud iti daytoy a sistema kadakayo wenno no susuotennakayo ni Satanas,” inrekomendar ti maysa pay, “dikay pulos isuksuko ti kinapudno. Itultuloyyo a salimetmetan dayta, ta daytat’ mangibunganto iti ragsak kadakayo.” Maysa a pagasawaan a nataenganen a nagserbi a simamatalek iti maysa a paset ti New Zealand iti agarup 43 a tawtawen ti nangted iti daytoy a praktikal a balakad: “No kabaelanyo, nasaysayaat ti agtalinaed iti maymaysa a lugar, imbes nga alis nga alis. Ti kinapudno addaan dakdakkel nga epekto iti komunidad, ket daytat’ mangtulong iti panangsalimetmetyo nga agbiag a maitunos iti dayta, iti kasta pagbalinennakayo a napigpigsa.”

Pudno, adu kadagiti natataengan a kakabsattayo a lallaki ken babbai ti saanda a mabalin ti agtrabaho nga agbalaybalay kas kadagiti agtutubo. Dadduma ti naidaliten iti pagiddaan. Dadduma agsagsagabada iti naut-ot nga an-anayen. Kuna ti maysa a baket a kabsat, “Diak ladingiten ti panagbaketko. Daydiay iyeg ti kinanataengan ti diak magustuan.” Kaskasdi mabalinanna pay met nga iparangarang ti Nakristianuan a rikna!

Ipapaayanyo aya ti tiempo ti panangammo kadagiti natataengan a kakabsatyo a lallaki ken babbai? Sapsapulenyo aya ti panangtulad kadagiti iparparangarangda a kualidad, kualidad a napasudi kas balitok gapu iti panawen ken kapadasan? Pudno unay, dagiti natataengan a Kristiano a kakabsattayo a lallaki ken babbai ket nagpapategda a kinabaknang no la ketdi no ikkantay ti panawen a mangpaliiw ken makisao kadakuada. Kuna ti maysa nga agtutubo a Kristiano: “Dagiti matalek a natataengan isuda ti ulidan kaniak iti panagtalinaed ti kinapudno, iti pudno nga ayat, iti pammati a sibibiag, dungngo, regta iti serbisio ti Dios. Para kaniak ti pintasda ket arigna dagiti kaykayo a nalalangto, ket arigda ti nabara nga apuy iti maysa a nalamiis a rabii.” Pudno unay, addaantayo ti rason a mangipateg kadagiti natataengan kadatayo!

Ti Mata ni Jehova “Adda Idi kadagiti Lallakay”

DAGITI panglakayen ti masansan nga agar-aramidda kadagiti pangngeddeng itatta a kasla adda iti labes iti rukod dagiti pannakaammo ken kapadasanda. Nupay kasta, usigenyo ti kasasaad a naipasango kadagiti sumagmamano a panglakayen a Judio idi kaaldawan ni Esdras.

Kalpasan ti panagsubli dagiti natda a Judio manipud Babilonia, immay ti 16-tawen ti kabayagna a kinainaktiboda. Nabalinan dagiti mammadto a da Haggeo ken Zacarias a ginunggon dagiti Judio manipud kinaaleng-alengda, ket nairugi manen ti trabaho a panangibangon ti templo ni Jehova. Ngem, di nagbayag, daytoy a trabaho ti kinarit dagiti opisiales ti Persia. “Asino ti nangted kadakayo ti maysa a bilin a mangbangon itoy a balay?” insaludsodda dagiti bumusbusor.​—Esdras 5:1-3.

Ti manangsungbat iti dayta a saludsod ket delikado. No pinalubosan dagiti panglakayen ti bagbagida a mapabutngan, ti panangisubli iti templo ket insigida a mapasardeng. Ket no dagiti panglakayen labananda met dagitoy nga opisiales, ti dagdagus a panangiparit iti trabaho ti maikeddeng. Gapuna dagiti panglakayen (nga awan duadua indauluan ni Gobernador Zorobabel ken ti Nangato a padi a Josue) nangputarda ti nataktika ngem epektibo a sungbat. Impalagipda kadagiti opisiales ti nabayagen ti pannakalipatna a bilin ni Ciro a nangted kadagiti Judio iti naarian a palubos nga itultuloyda daytoy a trabaho. Agsipud ta pagaammoda a ti pagalagadan dagiti taga Persia a dida pulos balbaliwan ti aniaman a naikeddengen a linteg, sisisirib a pinili dagitoy nga opisiales a liklikan ti panangbusor iti aniaman a naarian a bilin. Gapuna napalubosan ti trabaho nga agtuloy aginggana nga iti kamaudiananna inted ni Ari Dario ti opisial a panangituloyda!​—Esdras 5:11-17; 6:6-12.

Daytoy kadi naisalsalumina unay a resulta ket gapu iti natauan a sirib? Maisupadi ketdi, kuna ti salaysay ni Esdras a “ti panangimatang ti Diosda adda idi kadagiti lallakay dagiti Judio.” (Esdras 5:5) Nalawag, nga inturong ni Jehova agpadpada ti sungbatda ken iti makaay-ayo a sungbat manipud ari ti Persia. Dagiti panglakayen a Kristiano itatta ti mabalin met a kumita ken ni Jehova a maipaay iti pannakaiwanwan no maipasangoda kadagiti narikut a pangngeddeng wenno makilanglangenda kadagiti kabusor. Ipasiguro ni Jehova idiay Salmo 32:8: “Iwardaskanto ket isurokanto iti dalan a pagnaemto. Balakadankanto a sisisiput toy matak kenka.”