Report dagiti Manangiwaragawag ti Pagarian
Kinatarnaw iti Sidong ti Pannakaiparit
ITI 11 a tawtawen ti panangaskasaba iti maysa a pagilian ti Umabagatan nga Asia ti adda iti sidong ti panangiparit ti gobierno. Kadagiti nabiit pay a tawtawen, nupay kasta, adda rason a pamatian dagiti kakabsat nga addada responsable a tattao iti gobierno a kayatda ti mangted ti panangpalukay iti kasasaad. Agparang a ti panangiparit ket gapuanan ti napigsa nga impluensia dagiti relihion ti Kakristianuan nga adda kadagiti sirkulo ti gobierno.
No maminsan dagiti kakabsat ti maikabkabilda ti pannakasisiim, pannakaaresto, ken nakaro a panangpalpalutpot. Dagidiay agtartrabaho kadagiti institusion ti gobierno ti mapakpakdaaranda iti pannakaipababa wenno inkapilitan a panagretiro no saanda a tumipon iti napolitikaan a partido ti Estado. Maysa a grupo dagiti agibumbunannag ti nakaro ti pannakakabkabilda.
Naik-ikkatan met dagiti Saksi kadagiti legal a kalintegan, kas kadagiti serbisio ti Korte sibil ken ti kalintegan a mangikondukta ti panamumpon. (Dagiti agtuturay ti mangdutok iti klero a mangaramid iti daytoy.) Iti dadduma a luglugar, uray pay ti panangirehistro ti panagasawa ti mailiblibak kadagiti Saksi!
Kaskasdi, dagidiay mangay-aywan ti trabaho sadiay inreportda: “Awan mintisna, idiay situtured a sanguen dagiti kakabsat dayta nga isyu, a mangtedda ti nadayaw a pammaneknek manipud iti Biblia, ti panangpalpalutpotda ti nagsardeng met laeng ken bimmassiten ti panagsisiimda kadakuada, a nakatulong kadagiti kakabsat a nangitultuloy a siepektibo ti panangaskasabada ken trabaho a panagar-aramidda ti adalan.”—Mateo 28:19, 20.
Kas pangarigan, maysa a kabsat a babai a napalutpot ti napagsaludsodan no sadinot’ nangalaantay ti nagan a Jehova. Situtured linukatanna ti Biblia iti Exodo 15:3, a sadiay ti nagparangan ti nagan. Ti managpalutpot, maysa a kumander ti militar, ti nakipagbasa iti Biblia, a kunkunana: “Ay, wen. Pudno nga adda iti Biblia.” Kalpasanna, sinangona ti padi nga isut’ makibibiang met iti panagsalsaludsod, insaludsodna: “Apay a dikay ibagbaga kadagiti tattao ti nagan?” Sikakapuy a sinungbatan ti padi: “Ay, wen, ti nagan ket adda iti Daan a Tulag. Ngem gapu ta awan diplomatiko a relasion daytoy a pagilian iti Israel, saantay nga us-usaren dayta a nagan.” Ti kabsat a babai ti dagdagus a nawayawayaan!
Gaput’ panangitiktik manipud maysa a tao nga “interesado,” kinanselar ti polisia ti umuna kadagiti tallo a kumbension distrito iti rabii sakbay a daytat’ mangrugi! Nupay kasta, sumagmamano a paborable a tattao iti puersa ti polisia ti timmulong a nangpasardeng kadagiti sumarsaruno a panagpalutpot manen. Awanan buteng, inangay dagiti kakabsat ti dua pay kadagiti kumbension.
Agpapan pay napigsa a narelihiusuan nga ibubusor iti daytoy a pagilian, addada pay met laeng dagidiay agayat ti kinalinteg. Maysa nga amo, kas pangarigan, iti pannakakitana ti kinasungdo dagiti kakabsat iti prinsipioda ken kadagiti papatienda, ti ad-adda pay a nakapatanor ti ad-adda a panagtalekna kadagiti kakabsat. Ad-adda a naikkanda ti ad-adu a responsabilidad iti trabaho.
Umas-asping a bambanag ti napasamak met kadagiti ages-eskuela nga annak. Dagiti nasingpet-panagpuspusona a mannursuro pagraemanda ken dayawenda ida gaput’ natibker a takder nga al-alaenda maipapan kadagiti pannursuroda.
Nupay ti kasasaad iti tay-ak ti medio lumaglag-an metten para kadagiti kakabsat, kaskasdi a dagiti simbaan itultuloyda ti panangparparigatda ket padpadasenda amin a mabalin a pamuspusan tapno pasardengen ti panangaskasaba. No maminsan padpadasenda pay a dangran a pisikal dagidiay agad-adal ti Biblia a kadua dagiti Saksi. Nupay kasta, kaskasdi nga umar-arak dagiti interesado iti organisasion ni Jehova. Maysa a kapadasan ti mangisalsalaysay maipapan iti maysa nga apong a baket nga agtawenen ti 70’s. Kalpasan a maopera ti maysa kadagiti matana, inyebkasnat’ tarigagayna a makapag-auxiliary payunir. Gapu iti edadna, idi damo mariknana a ti 60-oras a pagannurotan ti dakkel unay para kenkuana ngem kalpasan ti panangpadasna iti dayta, nasukalanna a daytat’ maaramidanna met laeng. Kinapudnona, iti umuna a sangapulo nga aldawna, isun ti nakaipaayen ti 38 oras iti tay-ak ti serbisio; nakaipaiman ti dua a libro, tallo a polieto, ken dua a magasin iti maysa a narigat a teritoria; ken nakairugin ti dua a panangyadal ti Biblia. Isut’ nakaragragsak!
Iti kaaduanna, ti kasasaad iti tay-ak ti serbisio iti pagilian ti nagsayaat. Nangnangruna kalpasan iti heneral nga eleksion, dagiti kakabsat nabaelanda ti nagaramid kadagiti nadumaduma a ramramit ti panangasaba. Daytoy ti pudpudno a nangpapartak iti trabaho. Maysa a regular nga agibumbunannag ti naaddaan ti pito ingganat’ sangapulo a panangyadal ti Biblia. Iti napalabas, dagiti bumalay adut’ salsaludsodda maipapan ti kinasiasinomi, no sadinot’ naggapuanmi, ken dadduma pay. Itan ngangngani saanen nga iyam-ammo dagiti kakabsat ti bagbagida. Mabisinan dagiti tattao kadagiti makapnek a naespirituan a taraon. Ti tay-ak ti pudno a nakasaganan iti panagani.—Mateo 9:37, 38.
Pudno unay, dagiti kakabsat iti daytoy a daga sinalimetmetanda ti kinatarnawda iti sidong dagiti pakasuotan, nga iti nabiit pay tinagiragsakda ti 7-porsiento nga idudur-as kadagiti agibumbunannag! Innalada ti isu met laeng a takder nga innala ni salmista David idi a kinunana: “Ngem no siak, magnaakto iti kinatarnawko.”—Salmo 26:11.