matungpal iti kaputotak dagiti padto ti Biblia nga insurat dagiti napaltiingan ken dedikado a tattao kadagiti naglabas a siglo.”

Dagiti kamkameng ti kaputotak iti ruar ti teokratiko nga organisasion, siempre, ti nagbalin nga apagpagisu kas iti pamay-an a panangibaga ti Photo-Drama of Creation idi 1914 a pagbalinanda: agmauyong iti kuarta, agmauyong iti ragsak, ken agmauyong iti dayaw. Dagidiay kas kadatayo iti uneg ti organisasion ti Apo ti nangpadpadas iti isuamin a mabalin a pamay-an, nga iturong ti atensionda iti mensahe ti biag. Nagusarkami kadagiti replan, dagiti pablaak a mangusar ti intero a panid, radio, dagiti sound cars, mabitbitbit a ponograpo, dagiti dadakkel a kumbension, parada dagiti agus-usar ti karatula, ken iti dumakdakkel a buyot dagiti agbalaybalay a ministro. Daytoy a trabaho ti nagserbi a mamaglalasinlasin kadagiti tattao​—dagidiay pabor iti naipasdeken a Pagarian ti Dios iti maysa a dasig, dagidiay kontra iti dayta iti sabali a dasig. Daytoy ti trabaho nga impadto ni Jesus nga agpaay iti kaputotak!​—Mateo 25:31-46.

Agingga a daytoy “nabannogen a pusok” ket agsardengen ti panagpitikna, agtultuloy nga agpitik dayta a mangipatpateg ti pribilehio a tagtagiragsakek gaput’ pannakaibiang iti maysa a naisalsalumina a kaputotan. Daytat’ agtultuloy nga agpitik a siraragsak kadagiti pribilehio nga adda kaniak itan a pannakakita ti minilmilion nga umis-isem a ruprupa a naikeddeng nga agtultuloy nga umis-isem iti agnanayon.

Maysa nga Agtutubo Idaydayawna ni Jehova

ADU dagiti gundaway a panangaskasaba ti silulukat kadagiti agtutubo no addaanda ti napigsa a tarigagay nga agserbi ken Jehova. Makita daytoy iti kapadasan ti singko-años nga ubing idiay makinlaud a Kenya.​—Eclesiastes 12:1.

Ni inana ti nagsaludsod kenkuana: “Aniat’ kayatmonto a pagbalinan inton dumakkelka?” Napaliiw ti ubing a lalaki ti maysa nga espesial payunir iti kongregasion ket insungbatna: “Kayatko ti agbalin nga espesial payunir kas ken Kabsat F   .” Insungbat ti ina: “Ngem saan a posible daytoy; dika pay mabalin uray ti agregular payunir agsipud ta awananka ti panangiyadal ti Biblia.” Insaludsod ti ubing: “Ania ngarud ti aramidek?” Insingasing ti ina a padpadasenna a suruan dagiti kaay-ayamna manipud iti kopia ti librona a Ti Librok dagiti Estoria ti Biblia.

Innala ti singko-años ti Estoria ti Biblia a libro ket napanen a simmarungkar kadagiti gagayyemna, nga inawisna ida a makipagadal ti Biblia kenkuana. Ti resulta?

Isut’ nangporma ti maysa a grupo ti sangapulo a mabalinna a maiyadalan. Inusarna a naimbag dagiti ladladawan, agpataud ti adu a makasukisok a salsaludsod ket agsaludsod ti pangrepaso kadakuada no agpatingga ti adal. No saanda a malagip, ulitenna manen ti intero a material kadakuada. Inlawlawag ti ina a makaparagsak unay ti pannakakitana amin kadagiti ubbing a situtugaw iti daga iti sanguanan ti balayda nga agad-adal! Adda idiay ti singko-años nga anakna nga agsalsaludsod, ket kalpasanna ngumato amin dagiti im-ima tapno sumungbatda.

Maysa pay a ragsak iti ina, agraman iti kongregasion, ti pannakakita a walo kadagitoy nga ubbing ti tumabtabunon iti panaggigimong iti kongregasion. Dagidiay dua ti nakabasbassitda pay. Amin daytoy napasamak agsipud ta ti singko-años nga ubing kayatna nga idaydayaw ni Jehova ken tulongan dagiti dadduma.