Ti Kinadalus Idayawna ni Jehova
1 Idi nagsubli dagiti natda nga Israelita manipud iti pannakakautiboda idiay Babilonia, naibilin kadakuada: “Dalusanyo ti bagiyo dakayo nga agawit kadagiti al-alikamen ni Jehova.” (Isa. 52:11) Yantangay naitalek kadatayo itatta ti sagrado nga annongen a mangipakaammo iti naimbag a damag, tarigagayantayo met nga idayaw ni Jehova babaen ti panangtaginayontay iti bagbagitayo, pagtaengantayo, ken Kingdom Hall-tayo a nadalus ken presentable.
2 Iti Ministerio: No addatayo iti tay-ak ti serbisio, nadalimanek ken presentable aya dagiti kawes, bag, ken personal a langatayo, a saan a mangyeg iti pakababalawan? Maidayaw ni Jehova no taginayonentay a nadalus ti bagbagitayo ken kawestayo babaen ti regular a panagdigus ken panaglaba. Nasayaat met a sukimatentayo ti Biblia ken dagiti libro a regular nga us-usarentayo tapno masigurado a saan a daan unay ken nadungrit. Nupay iti pakabuklanna ket agdindinamag ti kinadalus ti ili ni Jehova, kaskasdi a nasayaat nga usigen ti tunggal maysa kadatayo ti bagina maipapan iti daytoy a banag.
3 Iti Pagtaengantayo: Komusta ngay ti itsura ti pagtaengantayo? Pakababalawan aya dayta ti mensahe ti Pagarian nga ikaskasabatayo? No saan a nadalimanek ti pagtaengan ken arubayantayo, saan ngata a pagduaduaan dagiti dadduma ti kinapudnotayo no ibagbagatayo ti maipapan iti panagbalinto ti daga a paraiso? No kasta, maikuna ngata a napatanortayo ti ‘padron ti kinadalus a maibagay idiay baro a lubong iti sidong ti Pagarian ti Dios’?—om-IL panid 130.
4 Iti Kingdom Hall-tayo: Masansan a magagarantayo a mangawis kadagiti kabbaro nga interesado a bumisita iti Kingdom Hall-tayo. Nangnangruna a pudno daytoy no napintas ken nadalimanek ti Kingdom Hall, iti uneg ken ruar. Kasapulan ti panangikagumaan tapno mamantener ti kinadalus ti patakder. Kitaenyo ti aglikmut ti Kingdom Hall-yo. Nadalus kadi dagiti tugaw, suelo, ken diding? Nadalus kadi ken saan a naangot dagiti kasilias? Ti ngay karatula ti Kingdom Hall? Masansan a daytoy ti umuna a makita dagiti tattao, isu a kanayon koma a napintas ti pinturana ken nadalus.
5 Uray ditay agsasao, maitan-oktayo ti Dios babaen ti personal a langatayo ken kinadalimanek dagiti pagtaengan ken Kingdom Hall-tayo. Ti nasayaat nga ehemplotayo ket saan a mangipaay iti aniaman a pakaitibkolan no di ket mangipaneknek a nadalus ken nalinteg ti panagdayawtayo.—1 Cor. 10:31, 32; Sant. 1:27.