“Kas Kadakayo ti Namnamaen ti Dios a Pagbalinanmi”

NO MAKIKOOPERAR dagiti Kristiano kadagiti sekular nga agtuturay “maigapu iti Apo,” mabalin nga umawatda iti ‘pammadayaw kas managaramid iti naimbag.’ (1 Pedro 2:13-15) Iti saan pay a nabayag, napasaran daytoy dagiti Saksi ni Jehova idiay South Africa iti kombension distrito nga inangayda iti hall ti kampus ti maysa a kolehio.

Iti umuna nga aldaw ti kombension, nagsagana dagiti guardia ti kolehio para iti manamnama a panagsangpet ti adu a managpudpudot ken awanan kooperasion a delegado, kas iti napasaranda kadagiti dadduma a kita ti kombension. Nupay kasta, tangay saanda pay a pulos nakalanglangen dagiti Saksi ni Jehova, naayatan ken nasdaawda iti napasamak!

Kas paset ti regular a panaginspeksionda sakbay nga agpastrekda, sinukimat dagiti guardia ti tunggal kotse a sumrek ken rummuar iti kampus ti kolehio. Nasdaawda ta kinablaawan ida dagiti mannakigayyem, naanus, ken nadayaw a delegado uray no nataktak dagitoy gapu iti pannakasukimat dagiti lugan. Saan a kas iti sigud, awan ti nagkedked, nakisupiat, ken nagsao iti dakes. “Saan a kas kadagiti dadduma a bisita,” kinuna ti maysa a guardia, “nalawag kadakami amin a napakumbaba ken nataknengkayo.”

Idi naammuan ti hepe dagiti guardia a mannakikooperar dagiti Saksi ni Jehova, inkeddengna a saanen a kasapulan a masukimat dagiti lugan “agsipud ta,” kas kinunana, “disiplinadokayo unay.” Gapuna, napalubosan a sumrek a di masukimat dagiti lugan nga addaan kadagiti parking sticker a namarkaan iti “JW.”

Iti ngudo ti kombension, kinuna ti hepe dagiti guardia a kayatna a makitanto manen dagiti Saksi iti saan a mabayag. “Ita man pay laeng a nakakitakami kadagiti natakneng a tattao,” kinunana. “Kas kadakayo ti namnamaen ti Dios a pagbalinanmi.” Ti kasta a komendasion ad-adda a paregtaenna dagiti pudno a Kristiano a ‘mangtaginayon iti nasayaat a kababalinda,’ tapno dagiti tattao ‘dayawenda koma ti Dios kas bunga ti nasayaat nga ar-aramid a masaksianda.’​—1 Pedro 2:12.

Kayatyo Kadi ti Masarungkaran?

Uray iti daytoy nariribuk a lubong, magun-odanyo ti ragsak manipud iti umiso a pannakaammo iti Biblia maipapan iti Dios, iti Pagarianna, ken iti nakaskasdaaw a panggepna maipaay iti sangatauan. No kayatyo ti ad-adu pay nga impormasion wenno kayatyo nga adda sumarungkar kadakayo tapno libre nga iyadalannakayo iti Biblia iti pagtaenganyo, pangngaasiyo ta agsuratkayo iti Watch Tower, P.O. Box 2044, 1060 Manila, wenno iti maitutop a direksion a nailista idiay panid 2.