Saludsod
◼ Tunggal sarungkarantayo ti bumalay, masapul kadi a dakamatentayo ti maipapan iti donasion?
Saan. Nasken a naannadtayo iti daytoy a banag. Kayattayo a nalawag iti panunot dagiti tattao a saan a komersial ti trabahotayo no di ket naipamaysa iti panangisuro iti Biblia. Saantayo nga agur-ur-or iti donasion.
Kaaduanna, nasayaat no ilawlawagtayo a naimbag no kasano a masupsuportaran ti trabahotayo babaen kadagiti boluntario a donasion iti damo a panangipaimatayo iti literatura kadagiti interesado. Yantangay dagidiay laeng interesado wenno mayat nga agbasa kadagiti literaturatayo ti paimaantayo iti literatura, masansan a pagragsakan dagiti kasta a tattao ti agdonar.
Kadagiti sumarsaruno nga isasarungkar, adu kadagita nga interesado ti boluntario nga agdonar. Mabalin a damagen dagiti dadduma no sagmamano ti maysa a publikasion. Mabalintayo a dakamaten iti ababa a saan a komersial ti trabahotayo, nga ilawlawagtayo nga ituktukontayo dagiti literaturatayo nga awan bayadna, ngem asinoman a mayat a mangsuporta iti sangalubongan a trabahotayo mabalinna ti mangted iti nanumo a boluntario a donasion. Sagpaminsan, no mayanatup, mabalintayo a dakamaten ti maipapan iti panangsuporta iti sangalubongan a trabahotayo no saan nga ar-aramiden dayta ti tao a sarsarungkarantayo.
Laglagipentayo koma a nupay ituktukontayo dagiti literaturatayo nga awan bayadna, dakkel ti magastos iti panangipablaak ken panangiwaras kadagiti literaturatayo. Agdonar man wenno saan dagiti bumalay, pagrebbengan dagiti amin nga agibumbunannag ken payunir a suportaran ti sangalubongan a trabaho sigun iti kabaelanda. Mabalin nga agdonar dagiti dadduma tunggal mangalada iti literatura wenno mangtedda iti masnup a donasion kada lawas wenno kada bulan. Kaanotayo man nga agdonar, naurnos ken kanayon koma nga aramidentayo dayta sigun iti kabaelantayo.—1 Cor. 16:2.
Agtalektayo a ti espiritu ti Dios tignayenna dagiti adipenna ken dagiti interesado idiay tay-ak a mangted kadagiti boluntario a donasion tapno masulnitan dagiti magastos iti amin a benneg ti sangalubongan a trabahotayo.