⁶ Kas Naayat a Pastor: Ti manangaywan iti panagadal iti libro ket interesado kadagidiay limitado ti magapuananda iti panangasaba gapu iti kasasaadda. Siguraduenna a dagiti addaan kadagiti limitasion, gapu iti kinalakay wenno gapu iti pannakaidalit ken dagidiay temporario ti limitasionda gapu iti nakaro a sakit wenno dunor, ammoda koma ti urnos a mabalinda nga ireport ti 15, 30, wenno 45 a minuto a nabusbosda iti tay-ak ti serbisio no nababbaba ngem maysa nga oras ti maireportda iti maysa a bulan. (Ti Congregation Service Committee ti mangikeddeng no siasino dagiti makualipikar iti daytoy nga urnos.) Maseknan met ti manangaywan kadagiti kameng ti grupo a nalabit di aktibo, nga ikagumaanna a tulongan ida nga agbalin nga aktibo manen iti kongregasion.—Luc. 15:4-7.

No Ania ti Ibagayo Maipapan Kadagiti Magasin

Ti Pagwanawanan Okt. 15

“Kasanoyo nga ilawlawag kadagiti ubbing wenno iti dadduma a tattao no apay nga adu unay ti kinadakes ita? [Palubosanyo a sumungbat.] Sungbatan ti Biblia ti saludsod nga, ‘Asino ti Adda iti Likudan ti Amin a Kinadakes?’ [Basaenyo ti 1 Juan 5:19.] Tumulong daytoy a ruar Ti Pagwanawanan tapno matarusanyo no asino daydiay nadangkes ken no kasanotayo a sarangten.”

Agriingkayo! Okt. 22

“Iti panagkunayo, mangyeg kadi iti sangalubongan a talna dagiti kararag dagiti panguluen ti relihion wenno ti asinoman? [Palubosanyo a sumungbat.] Inkari ti Biblia ti maysa a panawen ti sangalubongan a talna. [Basaenyo ti Isaias 9:6, 7.] Nadlawyo kadi nga adda maysa a naisangsangayan nga agturay a mangyeg iti sangalubongan a talna? Ipakita daytoy a ruar ti Agriingkayo! no asino dayta nga agturay ken no kasanona nga iyeg ti pudpudno a talna.”

Ti Pagwanawanan Nob. 1

“Adu kadatayo ti mangikagkagumaan a maaddaan iti natalna a relasion iti sabsabali. Ngem nalabit umanamongkayo a masansan a narigat nga ibanag dayta. [Palubosanyo a sumungbat.] Ilawlawag ti Biblia no apay. [Basaenyo ti Santiago 3:2.] Ipakita daytoy nga artikulo no kasano a ti panagpadispensar ti mabalin a tulbek iti panangisubli ken panangtaginayon iti talna.”

Agriingkayo! Nob. 8

“Ipamatmat ti padto ti Biblia nga asidegen ti panawen inton awanen ti agkuna, ‘Masakitak.’ [Basaenyo ti Isaias 33:24.] Saan aya a makaliwliwa dayta? [Palubosanyo a sumungbat.] Ngem iti agdama, agsagsagaba ti sangatauan iti adu a sakit, agraman ti saplit ti AIDS. Daytoy a ruar ti Agriingkayo! sungbatanna ti saludsod nga, Agpatingganto Kadi ti AIDS?”