2. (a) Kasanotay a marugian ti pannakisaritatayo babaen ti maysa a teksto? (b) Ania a suheto iti Biblia ti paginteresan dagiti tattao iti teritoriayo?

² Rugianyo Babaen ti Maysa a Teksto: Rugian ti dadduma nga agibumbunannag ti pannakisaritada babaen ti panangyimtuodda no ania ti kapanunotan ti bumalay mainaig iti teksto nga ibasada. Maiturong a dagus ti saritaan iti Sao ti Dios. Maitutop kadi iti teritoriayo dagiti sumaganad nga introduksion?

◼ “No adda pannakabalinyo, aramidenyo kadi dagitoy a panagbalbaliw?” Basaenyo ti Apocalipsis 21:4.

◼ “Apay nga agbibiagtayo iti nakapegpeggad a tiempo?” Basaenyo ti 2 Timoteo 3:1-5.

◼ “Iti panagkunayo, nasaysayaat ngata a pagbiagan ti komunidadtayo no suroten ti amin a tattao daytoy a balakad?” Basaenyo ti Mateo 7:12.

◼ “Iti panagkunayo, matagiragsakto kadi dagiti annakyo ti kasasaad a nailadawan ditoy?” Basaenyo ti Salmo 37:10, 11.

◼ “Patienyo kadi a dumtengto ti panawen a pumudno dagitoy a sasao?” Basaenyo ti Isaias 33:24.

◼ “Nangngegyo kadin ti maipapan iti pannakasukat ti gobierno a nadakamat ditoy?” Basaenyo ti Daniel 2:44.

◼ “Adda kadi panawen a kayatyo a saludsoden daytoy iti Dios?” Basaenyo ti Job 21:7.

◼ “Posible ngata a makitatayto manen dagiti pimmusay nga ing-ingungotentayo?” Basaenyo ti Juan 5:28, 29.

◼ “Ammo kadi dagiti natay no ania ti ar-aramiden dagiti sibibiag?” Basaenyo ti Eclesiastes 9:5.

No Ania ti Ibagayo Maipapan Kadagiti Magasin

Ti Pagwanawanan Set. 15

“Minilion a tattao ti mangiramraman kadagitoy a nalatak a sasao kadagiti bukodda a kararag. [Basaenyo ti Mateo 6:10.] Panagkunayo, ania ngata ti kasasaad ti biag no naan-anay a natungpalen ti pagayatan ti Dios ditoy daga? [Palubosanyo a sumungbat.] Usigen daytoy a magasin ti kaipapanan ti tunggal paset ti Kararag ti Apo, agraman ti paset a kabasbasatayo.”

Agriingkayo! Set. 22

“Maseknan ti adu a tattao iti kumarkaro a parikut dagiti agtutubo—ti nalabes a panaginum iti arak. Nadamagyo kadin daytoy? [Palubosanyo a sumungbat. Sa basaenyo ti Proverbio 20:1.] Adu a peggad ti itden kadagiti agtutubo ti nalabes a panaginum. Naglaon daytoy nga artikulo iti impormasion a makatulong kadakuada a mangliklik iti nalabes a panaginum iti arak.”

Ti Pagwanawanan Okt. 1

“Kayattayo amin a makita ti panagpatingga ti krimen, kinaranggas, ken gubat. Panagkunayo, makitatayto ngata ti pannakatungpal dagitoy a sasao? [Basaenyo ti Salmo 37:11. Kalpasanna, palubosanyo a sumungbat.] Ilawlawag daytoy a magasin no kasano a nainaig daytoy a kari iti orihinal a panggep ti Dios para iti sangatauan ken no kasanotayo a makiraman iti daytoy.”

Agriingkayo! Okt. 8

“Saan kadi a nakalkaldaang nga iti tinawen, minilion a tin-edyer a di naasawaan ti agsiksikog? [Palubosanyo a sumungbat.] Ibinsabinsa daytoy a magasin dagiti addang a mabalinda nga aramiden tapno madaeranda dagiti adu a karit ti panagbalin a tin-edyer nga ina. Ilawlawagna pay no kasano a dagiti nagannak matulonganda dagiti annakda a mangliklik iti daytoy a parikut sakbay a tumaud.” Basaem ti 2 Timoteo 3:15.