Mangsaksi Uray Saan nga Agsao
1 Uray saanda a makapagsao, adu ti ipalgak dagiti parsua ni Jehova maipapan kadagiti di makita a kualidadna. (Sal. 19:1-3; Roma 1:20) Umasping iti dayta, mangsaksi met ti nasayaat a kondukta, Nakristianuan a kualidad, ken naemma a panaglanglangatayo. (1 Ped. 2:12; 3:1-4) Tarigagayantayo koma amin nga ‘arkosan ti sursuro ti Manangisalakantayo, ti Dios, iti amin a bambanag’ babaen ti panagtigtignaytayo.—Tito 2:10.
2 Kasano a maarkosan dagiti imperpekto a tattao dagiti sursuro ti Biblia? Maaramid laeng daytoy babaen ti panangiwanwan ti Sao ti Dios ken ti pannakabalin ti nasantuan nga espiritu. (Sal. 119:105; 143:10) Ti sao ti Dios “nabiag ken adda bilegna ken natartarumamis ngem iti aniaman a kampilan a dua ti tademna.” (Heb. 4:12) Sumalput iti kaunggantayo ken tulongannatayo a mangikawes iti baro a personalidad. (Col. 3:9, 10) Babaen ti nasantuan nga espiritu mapatanortayo dagiti makaay-ayo a kualidad kas iti kinamanangngaasi, kinaimbag, kinaalumamay, ken panagteppel. (Gal. 5:22, 23) Palpalubosantayo kadi ti sao ken espiritu ti Dios nga agtignay iti biagtayo?—Efe. 4:30; 1 Tes. 2:13.
3 Madlaw Dagiti Sabsabali: No agbiagtayo a maitunos kadagiti pagalagadan ni Jehova ken ikagumaantayo nga iparangarang dagiti kualidadna, madlaw dayta dagiti sabsabali. Usigentayo kas pagarigan ti maysa a lalaki nga inuy-uyaw dagiti katrabahuanna gapu iti kinapandekna. Maysa a kabsat a babai a katrabahuanna ti kanayon a makilangen kenkuana buyogen ti dignidad ken panagraem. Daytoy ti nangtignay iti lalaki nga agsaludsod kenkuana no apay a naiduma ti kababalinna. Inlawlawag ti kabsat a ti naimbag a kababalinna ket resulta ti panangyaplikarna kadagiti prinsipio ti Biblia. Inranudna pay dagiti nakaskasdaaw a namnama nga itden ti Pagarian. Inrugi ti lalaki ti nakipagadal iti Biblia ket nagpabautisar idi agangay. Idi nagsubli iti pagilianda, inapresiar dagiti kabagianna ti nasayaat a konduktana ket sumagmamano kadakuada ti nangawat met iti kinapudno.
4 Iti pagtrabahuan, iti eskuelaan wenno iti pannakilangen kadagiti kabagian ken kaarruba, ti koma nasayaat a kababalintayo agraman ti panangasabatayo gutugotenna dagiti sabsabali a mangidayaw iti Dios.—Mat. 5:16.