3. Ania ti pagsayaatanna no agpada nga itukontayo dagiti magasin?

³ Agpada nga Itukonyo: Kas ipakita dagiti nadakamat nga ehemplo, saantayo a masierto no siasino dagiti mangbasa kadagiti magasintayo wenno no ania ti mangtukay iti interesda. (Ecl. 11:6) Gapuna makagunggona no agpada nga itukontayo Ti Pagwanawanan ken Agriingkayo! uray no maysa laeng a magasin ti itampoktayo iti presentasiontayo. Kadagiti dadduma a kasasaad, mabalin a maitutop no itukontayo ti sumagmamano a nadumaduma nga isyu ti magasintayo no sumarungkartayo.

4. Kasano ti panangyeskediultayo iti panagiwaras iti magasin?

⁴ Makagunggona no mangyeskediultayo iti maysa nga aldaw iti tunggal lawas a makiraman iti panagiwaras iti magasin. Iti 2005 Calendar of Jehovah’s Witnesses, amin a Sabado ket naituding kas “Magazine Day” (Aldaw a Panagiwaras iti Magasin). Ngem yantangay agduduma dagiti lokal ken personal a kasasaad, mabalin a mangyeskediul dagiti dadduma iti sabali nga aldaw a mangipamaysa iti panangitukon kadagiti magasintayo. Karaman kadi daytoy iti linawas nga eskediulyo?

5. Ania dagiti oportunidad a rumbeng a gundawayantayo tapno makaipaimatayo kadagiti magasin, ket ania ti makatulong kadatayo a mangaramid iti kasta?

⁵ Mangipasdek iti Personal a Kalat: Ti panangipasdek iti personal a kalat no mano a magasin ti ipaimatayo a binulan ket makatulong tapno ad-adda a maipamaysatayo ti panangipaima kadagiti magasin. Adda kadi rutayo iti magasin? Ituktukonyo kadi dagiti magasin kadagidiay masarakanyo iti ministerio? Mangituktukonkayo kadi kadagiti magasin iti lansangan, lugar ti negosio, ken kadagiti publiko a lugar? Mangitugtugotkayo kadi kadagiti magasin no agbibiahe, aggatgatang, wenno no mapankayo kadagiti nakitulaganyo? Gundawayanyo ti tunggal maitutop nga oportunidad a tumulong kadagiti sabsabali tapno magunggonaanda iti Ti Pagwanawanan ken Agriingkayo!

6. Kasano a mausartayo dagiti daanen nga isyu ti magasin?

⁶ Mabalin met nga aramidentayo a kalat ti panangipaima kadagiti daanen nga isyu ti magasin nga adda kadatayo. Uray no saan a naipaima dagiti magasin iti unos ti maysa wenno dua a bulan manipud iti petsana, napateg latta dagiti impormasion a linaonna. Ipaimayo dagita kadagiti interesado. Para kadagiti riniwriw a tattao, dagiti magasin a Pagwanawanan ken Agriingkayo! ket ‘sao . . . iti umiso a tiempo.’ (Prov. 25:11) Usarentayo dagita a mangtulong iti riniwriw pay a mangammo ken agserbi ken ni Jehova.

No Ania ti Ibagayo Maipapan Kadagiti Magasin

Ti Pagwanawanan Peb. 15

“No dadduma, madamagtayo nga adda kano napasamak a milagro. [Mangdakamatkayo iti pagarigan.] Adda dagiti mamati kadagitoy a damag. Agduadua met dagiti dadduma. Usigen daytoy a magasin no talaga a napasamak dagiti milagro a nailanad iti Biblia ken no mapaspasamak ita dagiti kasta a milagro.” Basaenyo ti Jeremias 32:21.

Agriingkayo! Peb. 22

“Idi un-unana, ti Dios binilinna dagiti annak a dayawenda ti inna ken ammada. [Basaenyo ti Exodo 20:12.] Panagkunayo, mapadpadayawan kadi dagiti inna ita? [Palubosanyo a sumungbat.] Ilawlawag daytoy a magasin no ania dagiti karit a pakaipaspasanguan dagiti inna iti nadumaduma a paset ti lubong ken no kasano ti panangsarangetda kadagitoy a karit.”

Ti Pagwanawanan Mar. 1

“Panagkunayo, nasaysayaat ngata ti lubong no iyaplikar ti tunggal maysa daytoy a balakad? [Basaenyo ti Roma 12:17, 18 sa palubosanyo a sumungbat.] Nakalkaldaang ta tumaud no dadduma dagiti di pagkikinnaawatan. Ipakita daytoy a magasin no kasano a ti panangyaplikar iti balakad ti Biblia matulongannatayo a mangrisut kadagiti di pagkikinnaawatan ken mangtaginayon iti talna.”

Agriingkayo! Mar. 8

“Tinawen nga umad-adu ti kasapulantayo nga enerhia. Ammoyo kadi no ania ti mapasamak no iti maysa nga aldaw ket naibusen ti kasapulantayo nga enerhia? [Palubosanyo a sumungbat.] Ilawlawag daytoy a magasin no ania ti rimmang-ayan ti panangpataud iti nadaldalus a gubuayan ti enerhia. Ibagana pay no siasino ti Gubuayan ti amin nga enerhia.” Basaenyo ti Isaias 40:26.