Ti Rebbengentayo Kadagiti Sabsabali

¹ Narikna ni apostol Pablo ti obligasion a mangasaba kadagiti tattao. Ammona nga impaayan ni Jehova dagiti amin a kita ti tattao iti gundaway a maisalakan babaen ti napateg a dara ti Anakna. (1 Tim. 2:3-6) Dayta ti gapuna a kinuna ni Pablo: “Siuutangak agpadpada kadagiti Griego ken kadagiti Barbaro, agpadpada kadagiti masirib ken kadagiti nakuneng.” Sigagagar ken sipipinget a nagtrabaho tapno matungpalna ti rebbengenna kadagiti padana a tattao babaen ti panangiranudna iti naimbag a damag.—Roma 1:14, 15.

² Kas ken Pablo, ikagkagumaan dagiti Kristiano ita nga iranud ti naimbag a damag kadagiti padada a tattao iti amin a gundaway. Bayat nga umadani nga umadani ti “dakkel a rigat,” ganetgetantayo a biroken dagiti napudno ti panagpuspusona a tattao. Ti napaypayso nga ayat kadagiti tattao ti mangtignay koma kadatayo nga agbalin a naagawa iti daytoy makaispal iti biag a trabaho.—Mat. 24:21; Ezeq. 33:8.

³ Panangtungpal iti Rebbengentayo: Ti kangrunaan a pamay-antayo a mangdanon kadagiti tattao ket babaen ti panangasaba iti binalaybalay. Kadagiti teritoria nga adu dagiti tattao nga awan iti pagtaenganda, mabalin nga ad-adu ti makasaritatayo no isurattayo no sadino dagiti pagtaengan nga awan ti taona ket baliwantayo ti sumarungkar iti sabali nga oras wenno aldaw. (1 Cor. 10:33) Mabalintay met a kasabaan dagiti tattao iti panggedanda, kadagiti lansangan, parke, paradaan, ken babaen ti telepono. Mabalintay nga isaludsod iti bagbagitayo, ‘Ar-aramidek kadi ti amin a kabaelak a mangpadas iti amin a wagas ti panangasaba tapno mairanudko ti makaispal iti biag a mensahe?’—Mat. 10:11.

⁴ Impasnek ti maysa a payunir ti rebbengenna a mangdanon kadagiti amin a tattao iti teritoriana. Iti maysa a balay, kanayon a nakaserra dagiti venetian blind ti tawa ken awan ti tao. Ngem iti naminsan, idi saan a ranta ti payunir ti mangasaba, nakitana nga adda lugan iti sango dayta a balay. Nagtimbre ta dina kayat a palabsen dayta a gundaway. Maysa a lalaki ti simmungbat, ket kalpasan ti damo a panagsaritada, namin-adu a simmarungkar kenkuana daytoy a kabsat a babai ken ti asawana. Idi agangay, nagpayadal iti Biblia ti lalaki, ket bautisado itan. Agyaman unay ta tinungpal ti kabsat a babai ti rebbengenna a mangasaba kadagiti sabsabali.

⁵ Gapu ta maib-ibusen ti panawen, itan ti tiempo a tungpalentayo ti rebbengentayo kadagiti sabsabali babaen ti panangaramid iti amin a kabaelantayo iti trabaho a panangasaba.—2 Cor. 6:1, 2.

Paset 10—Panangikondukta Kadagiti Progresibo a Panagadal iti Biblia

Panangsanay Kadagiti Estudiante iti Panagbalaybalay a Ministerio

¹ No maikeddeng dagiti panglakayen a ti mayad-adalan iti Biblia ket kualipikadon nga agbalin kas di bautisado nga agibumbunannag, mabalinnan ti makiraman iti kongregasion iti trabaho a panangasaba iti publiko. (Kitaenyo ti Organisado a Mangaramid iti Pagayatan ni Jehova, p. 79-81.) Kasanotayo a matulongan ti estudiante nga agsagana a mangasaba iti binalaybalay?

² Agsaganakayo a Dua: Napateg ti nasayaat a panagsagana. Ipakitam iti estudiante no sadino ti pakasarakanna kadagiti singasing a presentasion iti Ti Ministeriotayo iti Pagarian ken iti libro a Pannakirinnason, ken tulongam a mangpili iti simple nga introduksion a praktikal iti lokal a teritoria. Iti damo pay laeng, paregtaem nga agusar iti Biblia iti ministeriona.—2 Tim. 4:2.

³ Makagunggona unay ti panagensayo para iti baro nga agibumbunannag. Bayat nga insiaren ti estudiante ti presentasion, ipakitam kenkuana no kasano ti sitataktika a panangsungbatna kadagiti gagangay nga ibagbaga dagiti tattao iti teritoria. (Col. 4:6) Ipanamnamam kenkuana a dagiti Kristiano a ministro saan a kasapulan nga ammoda ti sungbat ti tunggal saludsod a mabalin nga iyimtuod ti bumalay. Masansan a kasayaatan a tamingen dagiti kasta a saludsod babaen ti panangibaga nga agsukimatkayo ken agsublikayto tapno ilawlawagyo dagita.—Prov. 15:28.

⁴ Agkaduakayo a Mangasaba: Iti damo a pannakiraman ti estudiante iti ministerio a panagbalaybalay, bay-am a paliiwenna ti panangidatagmo iti presentasion nga insaganayo a dua. Kalpasanna, pagsawem met. Iti dadduma a kaso, mabalin a kasayaatan no adda laeng bassit a paset ti presentasion nga idatag ti baro nga agibumbunannag, kas koma iti panangibasa ken panangilawlawag iti maysa a teksto. Ikabilangam ti personalidad ken abilidad ti estudiante. (Fil. 4:5) Komendaram bayat nga in-inut a sanayem iti nadumaduma nga aspeto ti trabaho a panangasaba.

⁵ Napateg a tulongam ti baro nga agibumbunannag a mangipasdek iti regular nga eskediul a makiraman iti ministerio, nga aramidenna dayta a linawas no mabalbalin. (Fil. 3:16) Mangaramidkayo kadagiti espesipiko nga urnos nga agkadua a mangasaba, ken pabilgem a makikadua met kadagiti dadduma pay a nareregta. Ti ulidan ken pannakitimpuyogda ti tumulong kenkuana a mangpatanor iti abilidad ken maaddaan iti rag-o iti panangasaba iti binalaybalay.