Dimo Pukawen ti Ayat nga Adda Kenka Idi Damo
1 Ni naipadayag a Jesus binalakadanna ti kongregasion idiay Efeso idi umuna a siglo: “Adda daytoy a busorek kenka, ta pinanawam ti ayat nga adda kenka idi damo.” (Apoc. 2:4) Agparang nga adu ti nakapukaw iti damo nga ayatda ken ni Jehova. Idi ad-adalentayo ti kinapudno, timmanor ti nauneg nga ayattayo iti Dios ken kadagiti padatayo a tao, ket daytoy ti nangtignay kadatayo a mangiwaragawag a sireregta iti namnama a kabbaro a naammuantayo. Ania ti makatulong tapno saan a mapukaw ti ayat nga adda kadatayo idi damo ken tapno saan a bumaaw ti regtatayo iti ministerio?
2 Personal a Panagadal ken Pannakigimong: Apay a timmanor ti ayattayo iti Dios ken kadagiti padatayo a tao idi damo a naammuantayo ti kinapudno? Saan kadi a gapu ta naammuantayo ti maipapan ken ni Jehova babaen ti panangadaltayo iti Kasuratan? (1 Juan 4:16, 19) Gapuna, tapno ti ayattayo “umadu koma nga ad-adda pay,” nasken nga itultuloytayo ti gumun-od iti umiso a pannakaammo, a kalientayo “ti nauneg a bambanag ti Dios.”—Fil. 1:9-11; 1 Cor. 2:10.
3 Iti daytoy maudi nga al-aldaw a napno kadagiti pakaringgoran ken pakasingaan, pudno a narigat a taginayonen ti nasayaat a rutina ti personal a panagadal. (2 Tim. 3:1) Nasken a mangilatangtayo iti tiempo a mangipauneg iti naespirituan a taraon. Napateg met ti regular nga itatabuno kadagiti gimong ti kongregasion, nangnangruna ta ‘makitkitatayo nga umas-asidegen ti aldaw.’—Heb. 10:24, 25.
4 Ti Ministerio: Ti naganetget a pannakiraman iti ministerio tulongannatayo a mangtaginayon iti damo nga ayattayo iti Dios. Bayat nga ikaskasabatayo ti naimbag a damag, ipalpalagiptayo iti bagitayo dagiti naayat a kari ni Jehova, ket daytoy ti tumulong kadatayo a mangtaginayon a narayray ti namnama ken ayattayo. Ti panangisuro kadagiti kinapudno iti Biblia ket agkasapulan iti panagsukimat tapno matarusantayo a naimbag dagita, ken daytoy ti mangpabileg iti pammatitayo.—1 Tim. 4:15, 16.
5 Maikari ni Jehova iti amin a banag, agraman ti ayattayo. (Apoc. 4:11) Dimo ipalubos a bumaaw ti ayatmo. Pagtalinaedem a nabara ti ayat nga adda kenka idi damo babaen ti napasnek a personal a panagadal iti Biblia, regular a pannakigimong, ken naganetget a panangiranud kadagiti sabsabali iti banag a kapatgan kenka.—Roma 10:10.