Ania ti Ipangpangrunayo?

¹ Ania ti sungbatyo iti dayta a saludsod? Siempre, tarigagayantayo amin nga iyun-una dagiti interes ti Pagarian. (Mat. 6:33) Ngem mabalin nga iyimtuodtayo iti bagitayo, ‘Makita kadi kadagiti aramidko nga iyun-unak ti Pagarian? Iparparegta kadatayo ti Biblia: “Itultuloyyo a paneknekan no aniakayo.” (2 Cor. 13:5) Kasanotayo a mapaneknekan nga iyun-unatayo ti Pagarian?

² Ti Tiempotayo: Mabalintayo a sukimaten no kasanotayo a busbusbosen ti tiempotayo. (Efe. 5:15, 16) Kasano kaadu ti tiempo a busbusbosentayo iti tunggal lawas a makikadua kadagiti gagayyem, agbuya iti telebision, agsawar iti Internet, wenno mangaramid iti maysa a pagesman? No isurattayo no kasano kaadu ti tiempo a busbusbosentayo kadagiti kasta a banag ken idilig dayta iti kaadu ti tiempo a busbusbosentayo kadagiti naespirituan nga aktibidad, mabalin a maklaattayo. Mangbusbusbostayo kadi iti adu a tiempo iti trabaho tapno laeng magun-odan ti kinanam-ay uray no maisakripisiotayo ti sagrado a panagserbi? Kasano kasansan a manglangantayo kadagiti gimong wenno iti ministerio tapno makapasiartayo iti ngudo ti lawas?

³ Ipasdekyo Dagiti Prioridadyo: Kaaduan kadatayo ti awanan iti umdas a panawen a mangaramid iti amin a kayattayo. Tapno ngarud mayun-una dagiti interes ti Pagarian, nasken a sukimatentayo dagiti ipangpangrunatayo sa iwayaantayo dagiti “napatpateg a bambanag.” (Fil. 1:10) Ramanen daytoy ti panagadal iti Sao ti Dios, pannakiraman iti ministerio, panangipaay iti kasapulan ti pamilia, ken itatabuno kadagiti Nakristianuan a gimong. (Sal. 1:1, 2; Roma 10:13, 14; 1 Tim. 5:8; Heb. 10:24, 25) Makagunggona ti dadduma nga aktibidad, kas iti kalkalainganna a panagehersisio ken nasayaat a panaglinglingay. (Mar. 6:31; 1 Tim. 4:8) Ngem nasken a maipangpangruna latta ti interes ti Pagarian imbes a dagiti saan unay a napateg a bambanag.

⁴ Maysa nga agtutubo a lalaki ti nangyun-una kadagiti interes ti Pagarian babaen ti iseserrekna iti amin-tiempo a ministerio imbes a gumun-od iti nangatngato nga edukasion kas panagsagana maipaay iti sekular a karera. Nagsursuro iti sabali a pagsasao ken natignay nga agserbi iti lugar nga addaan dakdakkel a panagkasapulan. Kinunana: “Maragragsakanak iti biagko ditoy. Makapabang-ar unay ti ministerio! Aramiden met koma daytoy ti tunggal agtutubo tapno mariknada ti marikriknak. Awanen ti nasaysayaat pay no di ti panangusar iti amin nga adda kadatayo iti panagserbi ken ni Jehova.” Wen, ti panangyun-una iti Pagarian mangyeg kadagiti bendision ngem, napatpateg pay, makaay-ayo dayta iti nailangitan nga Amatayo, ni Jehova.—Heb. 6:10.

Kasanotayo a Makatulong?

¹ No madamag dagiti Saksi ni Jehova nga adda didigra a napasamak iti dadduma a paset ti lubong, masansan nga iyimtuodda: “Kasanotayo a makatulong?” Kas naisalaysay iti Aramid 11:27-30, dagiti Kristiano idi umuna a siglo nangipaayda iti tulong kadagiti kakabsat nga agnanaed idiay Judea gapu iti nakaro a bisin.

² Iti panawentayo, ti karta ti organisasiontayo ipalubosna ti pannakausar ti pondo a pangtulong kadagiti agsagsagaba gapu kadagiti natural wenno aramid ti tao a didigra ken kadagiti dadduma pay a tiempo ti panagkasapulan.

³ Kas pagarigan, idi napan a tawen adu a kakabsat ti nangipaay iti pinansial a tulong kadagiti naapektaran iti tsunami, wenno aluyo, iti Abagatan nga Asia, agraman ti bagyo a Katrina iti abagatan nga Estados Unidos. Maapresiar unay daytoy a pannakipagrikna babaen ti panangipatulod kadagiti donasion a mapan iti pondo ti organisasion a mausar a pangsaranay. Ngem no dinakamat ti nagdonar no kaano ken ania nga espesipiko a kalamidad ti pakausaran ti donasionna, kalikaguman ti linteg iti dadduma a pagilian nga iti dayta laeng a panggep a mausar ti pondo, uray no dagiti kasapulan dagiti kakabsat ket mabalin a naasikason.

⁴ Gapuna, maisingasing a dagiti donasion a pangtulong kadagiti nadidigra maiturongda koma iti sangalubongan a trabaho. Mausar dayta a pondo a pangtulong kadagiti nadidigra ken para kadagiti naespirituan a kasapulan dagiti Kristiano a kakabsat. No kayat ti maysa a ti donasionna a pangtulong kadagiti nadidigra ket saan a maitipon kadagiti kontribusion para iti sangalubongan a trabaho gapu iti sumagmamano a rason, kaskasdi a maawat dayta ken mausar a pangtulong kadagiti agkasapulan iti sadinoman a lugar. Nupay kasta, maapresiar no saan nga iyespesipiko ti nagdonar no ania ti pakausaran ken no kasano ti pannakausar ti donasionna.

⁵ Ti makagapu no apay nga iturongtayo dagiti donasion a nangnangruna iti sangalubongan a trabaho ket tapno ad-adu ti pondo a mausar mainaig iti amin a benneg ti trabaho ti Pagarian imbes a nakareserba laeng dayta kadagiti agkasapulan iti tulong iti masanguanan. Maitunos daytoy iti kababagas ti Efeso 4:16, nga agtrabahotayo a sangsangkamaysa a mangipaay no ania ti kasapulan “maipaay iti idadakkel ti bagi maipaay iti mismo a pannakapabilegna iti ayat.”