Ayat—Tulbek ti Nabunga a Ministerio
1 “Umaykayo kaniak, . . . ket pagin-awaenkayto.” (Mat. 11:28) Dagita a makaay-ayo a sasao iparangarangna ti nauneg a panagayat ni Jesus kadagiti tattao. Kas Kristiano a ministro, kayattayo a tuladen ni Jesus no iti panangipakita iti ayattayo kadagiti tattao a mapakpaksuyan gapu iti awanan ayat a lubong. Kasano a maaramidtayo dayta bayat ti panangiranudtayo iti naimbag a damag?
2 Iti Sao: Ti panagayat kadagiti tattao ti nangtignay ken ni Jesus a manggundaway iti tunggal oportunidad a mangiranud iti naimbag a damag. (Juan 4:7-14) Ayat ti tumulong kadatayo nga agbalin a natured a mangasaba iti di pormal. Maysa nga ubing a babai nga innem ti tawenna sieepektibo a kinasabaanna ti babai a kaabayna iti siled a pagurayan iti klinika. Ania ti nangtignay kenkuana a mangaramid iti dayta? Inlawlawagna, “Kasla kasapulan a maammuan ti babai ti maipapan ken ni Jehova.”
3 Maipakitatayo ti pannakaseknantayo kadagiti tattao babaen ti napasnek, nabara nga isem ken nainggayyeman a tono ti boses. Ti panangimdeng a naimbag kadagiti komento dagiti sabsabali, panangikabilangan kadagiti pakaseknanda, ken panangiparangarang iti napaypayso a personal nga interes ipakitana met ti ayat. (Prov. 15:23) Kas panangtulad ken ni Jesus, nasken nga ipaganetgettayo ti makaparegta a mensahe ti Pagarian ken ti naayat a pannakipagrikna ni Jehova kadagiti tattao.—Mat. 24:14; Luc. 4:18.
4 Iti Aramid: Alisto ni Jesus a nangipaay kadagiti praktikal ken material a kasapulan dagiti sabsabali. (Mat. 15:32) Mabalin nga adda met dagiti gundawaytayo a mangipakita iti naayat a kinamanangngaasi bayat a makiramramantayo iti ministerio. Kas pagarigan, adda babai a dina matartarusan ti ibagbaga ti kasarsaritana iti telepono. Nadlaw dayta ti kabsat a babai isu a nagboluntario a mangipatarus iti sasawen ti umaw-awag. Dayta a naayat nga aramid ti nangilukat iti saritaan maipapan iti Kasuratan ket nakatulong dayta tapno umanamong ti babai nga agpayadal iti Biblia. Adda met kapadasan ti maysa a kabsat a lalaki. Bayat ti panagsarungkarna, nasangpetanna ti bumalay nga agpupungtot a mangidurduron iti sopa iti ruangan. Di nagbayag kalpasan ti panangtulongna iti bumalay, nakatugawen ti kabsat iti sopa nga induronda ken nakairugi iti panangyadal iti Biblia iti daytoy a managyaman a lalaki.
5 Bayat a makiramramantayo iti ministerio, iparparangarangtayo ti ayattayo iti Dios ken kadagiti padatayo a tao. (Mat. 22:36-40) Ti kasta a panangiparangarang babaen ti sao ken aramid ipabigbigna kadagiti napudno ti panagpuspusoda a tattao nga adda kadatayo ti kinapudno.