“Saanak nga Interesado”
1 Kadagiti dadduma a lugar, dayta ti gagangay a reaksion dagiti tattao iti mensahetayo. Ania ti makatulong tapno saantayo a maupay no manangyaleng-aleng dagiti tattao iti teritoriatayo? Kasano a matukaytayo ti interesda iti naimbag a damag?
2 Taginayonenyo ti Rag-o: Mataginayon ti rag-otayo no laglagipentayo no apay nga adu ti manangyaleng-aleng. Dagiti tattao a nasursuruan iti teoria ti ebolusion wenno dimmakkel iti ateistiko a kagimongan mabalin a saanda a nausig ti kinapateg ti Biblia. Mabalin a naupay met dagiti sabsabali gapu iti kinamanaginsisingpet a napaliiwda iti relihion. Nalabit mangyaleng-aleng dagiti dadduma gapu iti pannakapaay wenno kinaawan-namnamada. (Efe. 2:12) Adda dagidiay ‘saan a mangikankano’ gapu ta nagabsuonanda kadagiti pakaringgoran iti biag.—Mat. 24:37-39.
3 Nupay negatibo ti reaksion dagiti dadduma, maaddaantayo iti rag-o iti ministeriotayo gapu ta ammotayo a pakaidayawan ni Jehova ti kinapingettayo. (1 Ped. 4:11) Maysa pay, bumileg ti pammatitayo a mismo no isarsaritatayo ti kinapudno uray kadagidiay saan a mangapresiar iti dayta. Ikagumaantayo a tuladen ti panangmatmat ni Jehova kadagiti tattao iti teritoriatayo. Isu ket naasian kadagiti taga-Nineve a saan a “makaammo iti nagdumaan ti makannawanda ken ti makannigidda.” (Jonas 4:11) Dagiti tattao iti teritoriatayo nasken a mangngegda ti naimbag a damag! Gapuna, saantayo a maupay no di ket mangbiroktayo kadagiti pamay-an tapno matukaytayo ti interesda iti mensahe ti Biblia.
4 Dakamatenyo Dagiti Damag a Pakaseknan Dagiti Umili: Iti introduksionyo, nalabit mangdakamatkayo iti damag a pakaseknan dagiti umili ken damagenyo no ania ti makuna ti bumalay. Dumngegkayo bayat ti panagkomentona sa ipakitayo ti makaliwliwa a mensahe ti Biblia mainaig kadagiti pakaseknanna. Kalpasan ti maysa a trahedia iti lugarda, inyebkas ti maysa a Saksi ti napasnek a pannakipagriknana iti tunggal nakasaritana. “Kayat dagiti tattao ti makisaritan,” kinunana. “Nagsayaat ti pannakisaritak kadagiti adu a tattao iti dayta nga aldaw gapu ta impariknak ti pannakaseknanko kadakuada.”
5 Babaen ti Pagarian ti Dios, marisutto ti amin a problema a pakaipaspasanguan ti sangatauan. Ikagumaam a lasinen no ania ti problema a pakaseknan unay ti bumalay. Mabalin a palubosannaka a mangilawlawag iti mangted-namnama a mensahe ti Biblia. No saan, mabalin a sidadaanto a dumngeg iti “sabali pay a tiempo.”—Ara. 17:32.