No Ania ti Kaipapananna Kadatayo ti Kinapakumbaba ni Jehova
AMMO ni David ti rigat. Nagsagaba gapu iti di nasayaat a panangtrato ni Ari Saul, ti naimun a katuganganna. Namitlo a daras a ginandat ni Saul a papatayen ni David babaen ti pika ken adu a tawen nga inanupna nga awan sarday, isu a napilitan ni David nga agbalin a pugante. (1 Samuel 18:11; 19:10; 26:20) Ngem adda ken ni David ti anamong ni Jehova, a nangispal kenkuana manipud ken ni Saul ken kadagiti dadduma a kabusorna. Maawatantayo ngarud ti sentimiento ni David, a naiyebkas iti kanta: “Ni Jehova ti napasdok a batok ken salindegko ken ti Manangilisi kaniak. . . . Itedmonto kaniak ti mangisalakan a kalasagmo [Jehova], ket ti kinapakumbabam ti mamagbalin kaniak a naindaklan.” (2 Samuel 22:2, 36) Nagbalin a natan-ok ni David iti Israel. Ania ngarud ti nakainaigan ti kinapakumbaba ni Jehova?
No kuna ti Kasuratan a napakumbaba ni Jehova, dina kaipapanan nga adda limitasionna iti aniaman a pamay-an wenno adda pagpasakupanna. Imbes ketdi, daytoy a nagpintas a galad ipasimudaagna nga isu ket addaan iti nasged a pannakipagrikna kadagiti tattao a sipapasnek a mangikagumaan a manggun-od iti anamongna ket ipaayanna ida iti asi. Mabasatayo iti Salmo 113:6, 7: “Agpakumbaba [ni Jehova] tapno kumita iti langit ken daga, nga ibangonna daydiay nanumo manipud iti mismo a tapok.” Ti ‘panagpakumbabana’ kayatna a sawen nga “agrukob tapno kumita” wenno “ipakumbabana ti bagina tapno kumita.” (Today’s English Version; Young’s Literal Translation of the Holy Bible) Manipud ngarud iti langit ‘agrukob’ ni Jehova wenno “ipakumbabana ti bagina,” tapno ipaayanna iti atension ni David, maysa nga imperpekto ngem napakumbaba a tao nga agtarigagay nga agserbi iti Dios. Gapuna, ipatalged kadatayo ni David: “Ni Jehova nangato, ket kaskasdi a makitana daydiay napakumbaba.” (Salmo 138:6) Ti naasi, naanus, ken naayat a panangtrato ni Jehova ken ni David paregtaenna koma dagiti amin a mangikagkagumaan a mangaramid iti pagayatan ti Dios.
Nupay isu ti katan-okan iti uniberso kas ti soberano, sidadaan ni Jehova a makilangen iti tunggal maysa kadatayo. Dayta ti mangted kadatayo iti panagtalek a mabalintay ti agpannuray iti di mapaay a tulongna uray kadagiti karirigatan a kasasaad. Awan ti rason tapno agbutengtayo a di la ket ta lipatennatayo. No maipapan iti nagkauna nga ilina nga Israel, mayanatup a natukoy ni Jehova kas daydiay ‘nanglagip kadakuada bayat ti nababa a kasasaadda: ta ti naayat a kinamanangngaasina ket agingga iti tiempo a di nakedngan.’—Salmo 136:23.
Kas dagiti agdama nga adipen ni Jehova, mabalin nga adda pakarigatantayo a kas ken ni David. Mabalin nga umsiendatayo dagidiay saan a makaam-ammo iti Dios, wenno nalabit makidangdangadangtayo iti nakapuy a salun-at wenno matayantayo. Aniaman ti kasasaadtayo, no napasnek ti pusotayo, makaadanitayo ken ni Jehova babaen ti kararag, nga agkiddawtayo iti asina. ‘Agrukob’ ni Jehova tapno ammuenna ti kasasaadtayo ket umimdeng kadagiti kararagtayo. Insurat ti napaltiingan a salmista: “Dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.” (Salmo 34:15) Saan kadi a matignay ti pusoyo a mangutob iti makaay-ayo a galad ni Jehova a kinapakumbaba?
[Dagiti Ladawan iti panid 30]
Sidadaan ni Jehova nga agimdeng kadagiti kararagtayo, no kasano nga inimdenganna dagiti kararag ni David