Inus-usaryo Kadin ti Makinlikud nga Akkub?

No mangala dagiti tattao ti magasin, masansan a kitaenda ti makinsango nga akkub, sa dagus a kitaenda ti makinlikud nga akkub. Ti makinlikud nga akkub ti publiko nga edision Ti Pagwanawanan ket addaan kadagiti nagduduma a makatukay iti interes a saludsod ken sasao agraman dagiti panid a pakasarakan ti impormasion mainaig kadagita.

Mabalintayo nga usaren daytoy a benneg tapno makapanunottayo kadagiti nasayaat a saludsod a pangirugi iti saritaan. No masansan a mawanas ti teritoriatayo, mabalin a baliwbaliwantayo dagiti presentasiontayo babaen ti panangusar iti nadumaduma a saludsod iti intero a bulan. No okupado ti bumalay, mabalintayo a paababaen ti presentasiontayo babaen ti panangipakita iti maysa kadagiti saludsod iti makinlikud nga akkub sa ibagatayo, “No kayatmo a maammuan ti sungbat, mabalinko nga ibati kenka daytoy a magasin sa pagsaritaantanto inton nawaywayaka.” Ti dadduma nga agibumbunannag mabalin a kayatda nga irugi ti saritaan babaen ti panangipakitada iti makinlikud nga akkub sa pagpilienda ti bumalay iti saludsod a paginteresanna. Kalpasanna, mabalin nga ipakitada no sadino ti pakasarakan iti sungbat sa ibasada ti insaganada a teksto. Nalabit adda pay sabali a pamay-an a mapanunotmo no kasano a mausar ti makinlikud nga akkub tapno matukay ti interes ti bumalay a mangbasa iti Pagwanawanan.