Uray idi natinongen ti bagi a manarawidwid idi umuna a siglo ti isyu mainaig iti panagpakugit, adda latta sumagmamano nga indibidual nga agkunkuna a Kristiano a mangipappapilit iti panagpakugit. Inawagan ida ni apostol Pablo kas “sinankakabsat” a mayat a ‘manglibeg iti naimbag a damag maipapan iti Kristo.’—Gal. 1:7; 2:4; Tito 1:10.
Agparang a dagiti mangan-annurot iti Judaismo panggepda nga ay-aywen dagiti Judio, tapno isardeng dagitoy a Judio ti naranggas a panangbusorda kadagiti Kristiano. (Gal. 6:12, 13) Isursuro dagiti mangan-annurot iti Judaismo a ti kinalinteg ket agpannuray iti panangalagad iti Mosaiko a Linteg no kadagiti banag a kas iti taraon, panagpakugit, ken dagiti piesta dagiti Judio.—Col. 2:16.
Di ngarud pakasdaawan a dagidiay mamati kadagiti kasta a kapanunotan ket saan a komportable a makilangen kadagiti manamati a Gentil. Nakalkaldaang ta uray ti dadduma kadagiti mararaem a Kristiano a Judio ket addaan met iti kasta a di umiso a karirikna. Kas pagarigan, idi simmarungkar idiay Antioquia dagiti pannakabagi ti kongregasion iti Jerusalem, saanda a nakipulapol kadagiti Gentil a kakabsatda. Uray ni Pedro, a makilanglangen idi kadagiti Gentil, ket immadayo ken dina pay ketdin kayat ti makipangan kadagiti Gentil idi simmangpet dagidiay naggapu sadi Jerusalem. Wen, sinalungasingna dagiti prinsipio nga inkalinteganna idi. Dayta ti gapuna nga isu ket siiinget a tinubngar ni Pablo.—Gal. 2:11-14.