balasang ti Simbaan”? Ti Francia ti addaan iti kaaduan a bilang ti bautisado a Katoliko iti intero a lubong agingga idi 1938. Ita, adda iti maikanem a puesto, a sumaruno kadagiti pagilian a kas iti Pilipinas ken Estados Unidos. Ket nupay adda 45 a milion a Katoliko idiay Francia, 6 a milion laeng ti regular a makimismisa. Maysa a nabiit pay a surbey kadagiti Pranses a Katoliko ti nangipalgak nga 65 porsiento “ti saan a mangikankano iti sursuro ti Simbaan mainaig iti sekso,” ken 5 porsiento kadakuada ti nagkuna nga “awan ti kaipapanan ni Jesus kadakuada.” Dagiti kasta a negatibo a reaksion ti rason no apay a nayimtuod ti papa bayat ti panagbisitana idiay Francia idi 1980: “Francia, ania ti inaramidmo kadagiti kari ti bautismom?”

Salsaludsod Dagiti Agbasbasa

Umiso kadi a kunaen a ti asi ni Jehova palag-anenna ti kinahustisiana?

Liklikan koma nga usaren daytoy nga ebkas agsipud ta ipasimudaagna a ti kinahustisia ni Jehova ket palag-anen wenno medmedan ti asina, a kasla ket tay nasaysayaat ti asina ngem iti naulpit a galad ti kinahustisiana. Di umiso daytoy.

Ti Hebreo a sao a naipatarus a “hustisia” iti Baro a Lubong a Patarus mabalin a kaipapananna met ti “panangukom.” Ti kinahustisia ket nainaig unay iti kinalinteg. Ngem ti hustisia ket masansan nga adda legal a kaipapananna, idinto ta saan a kanayon a kasta ti kinalinteg. Pudno a ti kinahustisia ni Jehova ket mabalin nga iramanna ti panangipataw iti maiparbeng a pannusa, ngem mabalin nga iramanna met ti panangispal kadagiti maikari. (Genesis 18:20-32; Isaias 56:1; Malakias 4:2) Gapuna, saan koma a mamatmatan ti kinahustisia ni Jehova kas naulpit wenno kasapulan a mapalag-an.

Ti Hebreo a sao para iti “asi” mabalin a tukoyenna ti panagbalin a naannad no mangukom. Mabalin a tukoyenna met ti aktibo a pannakipagrikna, a mangpabang-ar iti marigrigatan.​—Deuteronomio 10:18; Lucas 10:29-37.

Ni Jehova ket agpadpada a Dios ti kinahustisia ken kinamanangngaasi. (Exodo 34:6, 7; Deuteronomio 32:4; Salmo 145:9) Ti kinahustisia ken kinamanangngaasina ket agpada a perpekto ken agtunosda. (Salmo 116:5; Oseas 2:19) Naan-anay nga agbinnalanse wenno agkinnomplementoda. Isu a no ibagatayo a ti kinahustisia ni Jehova ket palag-anen ti kinamanangngaasina, maibagatayo met a ti kinamanangngaasina ket palag-anen ti kinahustisiana.

Impadto ni Isaias: “Ni Jehova mangin-inanamanto a maipaayannakayo iti parabur, ket ngarud isu tumakderto tapno ipakitaannakayo ti asi. Ta ni Jehova maysa a Dios ti panangukom [“hustisia,” The New English Bible].” (Isaias 30:18) Ipakpakita ditoy ni Isaias a ti kinahustisia ni Jehova itandudona dagiti aramid ti kinamanangngaasi, imbes a ti kinamanangngaasi palag-anenna wenno medmedanna ti kinahustisiana. Mangipakita ni Jehova iti asi agsipud ta isu ket nalinteg ken naayat.

Pudno a kinuna ti mannurat iti Biblia a ni Santiago: “Ti asi agragsak a sibaballigi a mangringbaw iti panangukom.” (Santiago 2:13b) Ngem iti konteksto, ti dakdakamaten ni Santiago ket saan a ni Jehova no di ket dagiti Kristiano a mangipakita iti asi​—kas pagarigan, kadagiti napanglaw. (Santiago 1:27; 2:1-9) Inton maukom dagitoy a manangngaasi, lagipento ni Jehova ti kababalinda ket siaasi a pakawanenna ida maibatay iti daton ti Anakna. Iti kasta, ti kinamanangngaasida ti mangringbawto iti aniaman a pakakondenaranda koma.​—Proverbio 14:21; Mateo 5:7; 6:12; 7:2.

Gapuna, saan nga umiso a kunaen a ti kinamanangngaasi ni Jehova palag-anenna ti panangukomna iti anag a masapul a pakapuyen ti asina ti kinahustisiana. Ken ni Jehova, ti dua a galad ket awan pagkurangan ti kinatimbengda. Timbengenda ti maysa ken maysa ket timbengen ida ti dadduma a galad ni Jehova, kas iti ayat ken sirib.