SUHETO ITI AKKUB | MANGISALAKAN NI JESUS—MANIPUD ITI ANIA?
No Apay a Kasapulantayo ti Pannakaisalakan
“Ti tao, a nayanak manipud babai, ababa ti biagna ken namelmelan iti pannakariribuk. Kas iti sabong isu rimmuar ket makeltay, ket agtalaw a kas iti anniniwan ket saan nga agtalinaed.”—Job 14:1, 2.
Sipud pay idi un-unana, ar-arapaapenen ti tao ti nasalun-at ken agnanayon a biag nga awanan panaglakay ken panagbaket. Ngem ti makapaladingit a kinapudno ket: Matmatay ti tao. Mapaspasamak agingga ita dagiti sasao ni Job iti ngato, nasurok a 3,000 a tawenen ti napalabas.
Kayattayo amin ti agbiag nga agnanayon. Kuna ti Biblia nga inkabil ti Dios iti pusotayo ti tarigagay nga agbiag nga agnanayon ken mangtarus iti dayta. (Eclesiastes 3:11) No kasta, nainkalintegan kadi nga ikkannatayo ti naayat a Dios iti tarigagay nga imposible met a mapasamak? No saan ti sungbatmo, umisoka. Ti Sao ti Dios awaganna ni patay kas kabusor ken ikarkarina a “mapukawto” dayta.—1 Corinto 15:26.
Talaga a maysa a kabusor ti ipapatay. Awan ti limpio ti panagpampanunotna a tao a mayat a matay. No adda peggad, aglisi, aglemmeng, wenno umadayotayo. No agsakittayo, ikagumaantayo ti agpaimbag. Aramidentayo ti amin a kabaelantayo tapno saantayo a matay.
Adda kadi pamatiantayo a mapukawto daytoy nabayagen a kabusor? Adda. Ni Jehova a Dios saanna a pinarsua ti tao tapno agbiag iti sumagmamano laeng a tawen sa matay. Saanna a pinanggep a matay ti tao. Diniseniona ti tao nga agbiag nga agnanayon iti daga, ket itungpalna ti aniaman a panggepna.—Isaias 55:11.
Kasano ngarud a mapukaw ni patay? Iti intero a historia, ikagkagumaan ti tao a parmeken ti ipapatay, ngem saan a nagballigi. Agingga ita, agtultuloy pay laeng dayta a panagregget. Nakapataud dagiti sientista kadagiti bakuna ken agas a manglaban iti sumagmamano a sakit. Inadalda ti gene dagiti sibibiag a bambanag. Iti adu a lugar, at-atiddog ita ti biag dagiti ordinario a tattao no idilig iti napalabas a sangagasut a tawen. Ngem matay latta dagiti tattao. Kas kuna ti Biblia, “agsublida amin iti tapok.”—Eclesiastes 3:20.
Makaparagsak ta saantayo a kasapulan ti agpannuray iti sirib ti tao a mangsolbar iti daytoy nabayagen a problema. Nangyurnosen ni Jehova iti pamay-an tapno maisalakan wenno maispaltayo iti ipapatay, ket nagpateg ti akem ni Jesu-Kristo iti dayta nga urnos.