Panangpadakkel Kadagiti Nasingpet nga Annak—Posible Pay Kadi?
“AGBIBIAGTAYON iti nariribuk unay a kagimongan, maysa a komplikado unay a kultura, nga awan ti agpapada a pagalagadan iti moralidad,” kuna ni Robert Glossop iti Vanier Institute for the Family iti Ottawa, Canada. Ania ti resultana? Kuna ti report iti pagiwarnak a The Toronto Star: “Umad-adu dagiti agtutubo a masiksikogan, mangrangranggas ken agpakpakamatay.”
Saan la nga iti Norte America ti ayan ti parikut. Ni Bill Damon, direktor ti Center for Human Development iti Brown University idiay Rhode Island, E.U.A., inadalna dagitoy a parikut idiay Britania ken dadduma pay a pagilian iti Europa, kasta met iti Australia, Israel, ken Japan. Tinukoyna ti pannakapaay dagiti simbaan, eskuelaan, ken dadduma pay nga institusion a mangidalan kadagiti agtutubo. Patienna a ti kulturatayo, “ket awanan pannakaammo iti kasapulan dagiti ubbing tapno mapatanor ti kababalin ken kabaelanda.” Iti panangdakamatna kadagiti eksperto iti panangpadakkel kadagiti annak a mangisursuro a ti “disiplina perdienna ti salun-at ken pagimbagan dagiti ubbing,” kuna ni Damon a daytoy ket “maysa a pamay-an ti panangpadakkel kadagiti rebelioso, nasukir nga ubbing.”
Ania ti kasapulan dagiti ubbing ita? Kanayon a kasapulanda ti naayat a pannakasanay a mangilinteg iti isip ken puso. Nadumaduma a kita ti disiplina ti kasapulan dagiti nadumaduma nga agtutubo. No tignayen ti ayat, masansan a ti disiplina maipaay babaen ti pannakirinnason. Gapuna naibaga kadatayo iti Proverbio 8:33 (NW) nga “ipangag[tayo] ti disiplina.” Ngem dagiti dadduma saanda a “mapalinteg kadagiti sasao.” Para kadakuada, mabalin a nasken ti maitutop a panangdusa gapu iti isusukir. (Proverbio 17:10; 23:13, 14; 29:19) Iti panangirekomendana iti daytoy, saan nga iparparegta ti Biblia ti sipupungtot a panagsaplit wenno nakaro a panangkabil, a mabalin a mangsugat ken mangdangran iti ubing. (Proverbio 16:32) Imbes ketdi, rumbeng a matarusan ti ubing no apay nga isu ket mailinlinteg ken mariknana a daytoy ket gapu ta maseknan dagiti dadakkelna iti pagimbaganna.—Idiligyo ti Hebreo 12:6, 11.
Ti kasta a praktikal ken nainsiriban a balakad manipud iti Biblia ket naipaganetget iti libro a Ti Sekreto ti Kinaragsak iti Pamilia.