Tallo a rabii a nagyan da Jesus ken dagiti adalanna idiay Betania manipud naggapuda idiay Jerico. Iti agsapa ti Lunes, Nisan 10, mapandan idiay Jerusalem. Mabisinen ni Jesus, isu nga idi adda nakitana a kayo a higos, inasitganna dayta. Adda kadi bungana?

Agtapus idin ti Marso. Iti bulan ti Hunio ti panagbunga ti higos. Ngem agrusingen dagiti bulongna isu nga ammo ni Jesus a mabalin a nasapa nga agbunga ti higos. Ngem awan ti nasarakanna. Makaallilaw ti adu a bulongna. Gapuna, kinuna ni Jesus: “Awan koman a pulos ti mangan kadagiti bungam.” (Marcos 11:14) Dagus a nagango ti kayo, ket maammuanto ti kaipapanan dayta kabigatanna.

Di nagbayag, nakadanonen ni Jesus ken dagiti adalanna idiay Jerusalem. Napan idiay templo, a sinukimatna idi napalabas a malem. Iti dayta a gundaway, saan laeng a panangsukimat ti inaramidna. Inaramidna ti kas met laeng iti inaramidna tallo a tawen ti napalabasen idi Paskua ti 30 C.E. (Juan 2:​14-16) Iti daytoy a tiempo, pinapanaw ni Jesus dagiti “aglaklako ken aggatgatang, ken binalintuagna dagiti lamisaan dagiti agsuksukat iti kuarta ken tugtugaw dagiti aglaklako iti kalapati.” (Marcos 11:15) Saanna payen nga impalubos a manglinteg iti paraangan ti templo ti asinoman a mangipan kadagiti bambanag iti sabali a paset ti siudad.

Apay a pinapanaw ni Jesus dagiti agsuksukat iti kuarta ken dagiti aglaklako iti animal idiay templo? Kinunana: “Saan kadi a naisurat, ‘Ti balayko ket maawaganto iti balay a pagkararagan para iti amin a nasion’? Ngem pinagbalinyo nga umok dagiti mannanakaw.” (Marcos 11:17) Ti makagapu no apay nga inawaganna dagitoy a lallaki a mannanakaw ket nakanginngina ti singirenda kadagiti gumatang iti animal a kasapulan nga idatonda. Matmatan ni Jesus dayta a panangkikil, wenno panagtakaw.

Siempre, nadamag dagiti panguluen a papadi, eskriba, ken dagiti natan-ok a tattao ti inaramid ni Jesus, isu nga ad-adda manen a kayatda a papatayen. Ngem saanda nga ammo no kasano a mapapatayda ni Jesus ta ar-aribungbongan dagiti tattao a dumdumngeg kenkuana.

Saan laeng a dagiti Judio no di ket dagiti pay proselita, dagiti nakomberte iti relihion dagiti Judio, ti immay iti Paskua. Adda met dagiti Griego nga immay agdayaw bayat ti piesta. Immasidegda ken Felipe, ta mabalin a naallukoyda iti naganna a Griego, ket kiniddawda a makipagkitada ken Jesus. Mabalin a saan a sigurado ni Felipe no rumbeng nga aramidenna daytoy, isu a nakisarita ken Andres. Imbagada dayta ken Jesus, a mabalin nga adda pay laeng idi idiay templo.

Ammo ni Jesus nga isu ket mapapatay sumagmamano laengen nga aldaw, isu a saan a daytoy ti tiempo tapno patganna ti kiddaw dagiti tattao wenno tapno agbalin a nalatak. Imbagana ti maysa nga ilustrasion kadagiti dua nga apostol. Kinunana: “Dimtengen ti tiempo a maipadayag ti Anak ti tao. Ibagak kadakayo, no saan a matnag iti daga ti maysa a bukel ti trigo sa matay, agtalinaed a maysa laeng a bukel; ngem no matay, agbunga iti adu.”​—Juan 12:​23, 24.

Mabalin a nagbassit ti pateg ti maysa a bukel ti trigo. Ngem no maimula dayta ken “matay” kas maysa a bukel, agtubo ket inton agangay, dumakkel ket agdawa iti adu. Kasta met, ni Jesus ket maysa a perpekto a tao. No agmatalek iti Dios agingga ken patay, agbalin nga instrumento tapno maaddaan iti agnanayon a biag ti adu a managsakripisio a tattao a kas kenkuana. Gapuna, kinuna ni Jesus: “Ti mangipateg iti biagna, mapukawnanto dayta; ngem ti manggura iti biagna iti daytoy a lubong, agbiagto iti agnanayon.”​—Juan 12:25.

Saan laeng a ti bagina ti pampanunoten ni Jesus, ta kinunana: “Ti mayat nga agserbi kaniak, sumurot kaniak, ta no sadino ti ayanko, addanto met sadiay. Ti mayat nga agserbi kaniak, padayawanto ti Ama.” (Juan 12:26) Nagsayaat a gunggona dayta! Dagiti padayawan ti Ama ket agbalinto a kakadua ni Kristo iti Pagarian.

Pampanunoten ni Jesus ti kasta unay a panagsagaba ken ti nakarigrigat nga ipapatay a mapasaranna idi kinunana: “Ita, mariribukanak, ket ania ti ibagak? Ama, isalakannak koma iti daytoy a kanito.” Ngem saan a likliklikan ni Jesus nga aramiden ti pagayatan ti Dios. Innayonna: “Ngem ammok a daytoy ti makagapu nga immayak ditoy daga.” (Juan 12:27) Ammona nga amin dagita ket panggep ti Dios, agraman ti panangisakripisiona iti biagna.

Idiay templo iti Lunes, Nisan 10, imbaga ni Jesus ti dandanin ipapatayna. Gapu ta maseknan iti reputasion ti Dios, kinuna ni Jesus: “Ama, padayagem ti naganmo.” Kinuna ti napigsa a timek manipud langit: “Pinadayagko dayta ket padayagekto manen.”​—Juan 12:​27, 28.

Nariribukan dagiti tattao nga adda iti asideg. Pagarup ti dadduma a nakangngegda iti gurruod. Kuna met ti dadduma: “Adda anghel a nakisarita kenkuana.” (Juan 12:29) Ngem ni Jehova ti nangngegda! Saan a daytoy ti damo a nangngeg dagiti tattao ti timek ti Dios mainaig ken Jesus.

Tallo ket kagudua a tawen ti napalabasen, idi nabautisaran ni Jesus, nangngeg ni Juan a Mammautisar a kinuna ti Dios maipapan ken Jesus: “Daytoy ti Anakko a dungdungnguek, a pakaragsakak.” Kalpasan ti Paskua ti 32 C.E., nagbaliw ti langa ni Jesus iti sango da Santiago, Juan, ken Pedro. Nangngegda a kinuna ti Dios: “Daytoy ti Anakko a dungdungnguek, a pakaragsakak. Dumngegkayo kenkuana.” (Mateo 3:17; 17:5) Ngem iti daytoy maikatlo a gundaway, nagsao ni Jehova ket adu ti nakangngeg!

Kinuna ni Jesus: “Nangngegyo daytoy a timek, saan a maigapu kaniak, no di ket maigapu kadakayo.” (Juan 12:30) Dayta ti pammaneknek a ni Jesus a talaga ti Anak ti Dios, ti naipadto a Mesias.

Impakita met ti matalek a panagbiag ni Jesus ti panagbiag a nasken a tuladen dagiti tattao. Dayta met ti mangpatalged a rumbeng a madadael ni Satanas a Diablo, ti agturay iti lubong. Kinuna ni Jesus: “Mauk-ukomen daytoy a lubong, ket mapapanawto ti agturay iti daytoy a lubong.” Imbes a maibilang a pannakaabak ti dandani idin ipapatay ni Jesus, maibilang dayta a panagballigi. Kasano? Inlawlawagna: “Ngem inton maibitinak, maguyugoyto nga umasideg kaniak ti amin a kita ti tattao.” (Juan 12:​31, 32) Babaen ti ipapatay ni Jesus iti poste, umadani dagiti tattao kenkuana ket malukatan ti dalan nga agturong iti biag nga agnanayon.

Idi imbaga ni Jesus a ‘maibitin,’ kinunada: “Nangngegmi iti Linteg nga agtalinaed iti agnanayon ti Kristo. Apay ngarud nga ibagbagam a masapul a maibitin ti Anak ti tao? Asino daytoy nga Anak ti tao?” (Juan 12:34) Nupay nakitada ti amin a pammaneknek, ken nangngegda ti timek ti Dios, kaaduan kadakuada ti saan a nangawat ken Jesus kas ti pudno nga Anak ti tao, ti naikari a Mesias.

Kas iti inaramidna idin, imbaga ni Jesus nga isu “ti lawag.” (Juan 8:12; 9:5) Imparegtana kadagiti tattao: “Bassit laengen a tiempo a kaduayo ti lawag. Magnakayo bayat nga adda kadakayo ti lawag, tapno saannakayo a maparmek ti sipnget. . . . Bayat nga adda kadakayo ti lawag, ipakitayo ti pammatiyo iti lawag, tapno agbalinkayo nga annak ti lawag.” (Juan 12:​35, 36) Kalpasanna, pimmanaw ni Jesus ta saan nga iti Nisan 10 ti aldaw ti ipapatayna. Iti Paskua ti Nisan 14 ti tiempo ti ‘pannakaibitinna,’ a mailansa iti poste.​—Galacia 3:13.

No lagipentayo ti ministerio ni Jesus, nalawag a natungpal ti padto idi saan a namati dagiti Judio kenkuana. Impadto ni Isaias a mabulsek dagiti tattao ken tumangken ti pusoda ta saanda nga agsubli a mapaimbag. (Isaias 6:10; Juan 12:40) Wen, kaaduan a Judio ti saan a namati iti pammaneknek a ni Jesus ti naikari a Mangisalakan, ti dalan nga agturong iti biag.

Kinapudnona, “adu ti namati” ken Jesus, karaman ni Nicodemo, ni Jose iti Arimatea, ken dadduma pay nga agtuturay. Ngem agtignayda ngata, wenno agkedkedda, gapu ta mabutengda a mailaksid iti sinagoga wenno gapu ta “kaykayatda ti pammadayaw dagiti tattao”?​—Juan 12:​42, 43.

Inlawlawag ni Jesus no ania ti ramanen ti panamati kenkuana: “Ti mamati kaniak saan laeng a siak ti pinatina, no di ket daydiay pay nangibaon kaniak; ket ti makakita kaniak nakitana metten Daydiay nangibaon kaniak.” Nagpateg dagiti kinapudno nga imbilin ti Dios nga isuro ni Jesus ken agtultuloy nga iwaragawagna, isu a maikunana: “Adda mangukom iti saan a dumngeg kaniak ken saan a mangawat iti sasaok. Ti sao nga imbagak isunto ti mangukom kenkuana iti maudi nga aldaw.”​—Juan 12:​44, 45, 48.

Kalpasanna, kinuna ni Jesus: “Saanak a nagsao iti bukodko a nakem, no di ket imbilin ti Ama a nangibaon kaniak no ania ti ibagak ken sawek. Ammok a ti bilinna ket makaited iti biag nga agnanayon.” (Juan 12:​49, 50) Ammo ni Jesus a dandaninan ited ti biagna kas sakripisio para kadagiti tattao a mangipakita iti pammati kenkuana.​—Roma 5:​8, 9.