MAADAL NGA ARTIKULO 44
Agserbidanto Ngata iti Dios Inton Dumakkelda?
“Dimmakkel ni Jesus ken ad-adda pay a simmirib ken nagtultuloy kenkuana ti pabor ti Dios ken dagiti tattao.”—LUC. 2:52.
KANTA 134 Dagiti Annak ket Sagut ti Dios
ITI DAYTOY A PANAGADALa
1. Ania ti kasayaatan a desision nga aramiden ti asinoman?
MASANSAN nga agpaut ti epekto kadagiti annak dagiti desision nga aramiden dagiti nagannak. No saan a nainsiriban ti desision dagiti nagannak, mabalin nga agproblema dagiti annakda. Ngem no nainsiriban dagiti desisionda, tultulonganda dagiti annakda a maaddaan iti naragsak ken makapnek a biag. Siempre, masapul met a mangaramid dagiti annak kadagiti nasayaat a desision. Ti kasayaatan a desision nga aramiden ti asinoman ket ti panagserbi iti nadungngo ken nailangitan nga Amatayo, ni Jehova.—Sal. 73:28.
2. Ania dagiti nasayaat a desision nga inaramid ni Jesus ken dagiti nagannakna?
2 Determinado dagiti nagannak ni Jesus a mangtulong iti annakda nga agserbi ken Jehova, ket napaneknekan kadagiti desisionda a dayta ti kangrunaan a kalatda iti biag. (Luc. 2:40, 41, 52) Nangaramid met ni Jesus kadagiti nasayaat a desision a nakatulong iti panangitungpalna iti akemna iti panggep ni Jehova. (Mat. 4:1-10) Dimmakkel ni Jesus kas naimbag, matalek, ken natured a tao—ti anak nga ipannakkel ken pakaragsakan ti asinoman a nagannak a managbuteng iti Dios.
3. Ania dagiti saludsod a sungbatantayo iti daytoy nga artikulo?
3 Iti daytoy nga artikulo, usigentayo dagitoy a saludsod: Ania dagiti nasayaat a desision nga inaramid ni Jehova para ken Jesus? Ania ti masursuro dagiti Kristiano a nagannak kadagiti desision nga inaramid dagiti tattao a nagannak ni Jesus? Ken ania ti masursuro dagiti Kristiano nga agtutubo kadagiti desision ni Jesus?
AGSURSURO KEN JEHOVA
4. Ania ti napateg a desision nga inaramid ni Jehova para iti Anakna?
4 Nangpili ni Jehova kadagiti nagsayaat a nagannak para ken Jesus. (Mat. 1:18-23; Luc. 1:26-38) Ti naimpusuan a sasao ni Maria a nairekord iti Biblia ipakitana a kasta unay ti panagayatna ken Jehova ken iti Saona. (Luc. 1:46-55) Ipakita met ti panagtulnog ni Jose iti bilin ni Jehova a managbuteng isuna iti Dios ken kayatna a paragsaken.—Mat. 1:24.
5-6. Ania ti impalubos ni Jehova a mapasaran ti Anakna?
5 Saan a nangpili ni Jehova kadagiti nabaknang a nagannak para ken Jesus. Ti indaton da Jose ken Maria kalpasan ti pannakayanak ni Jesus ipakitana a napanglawda. (Luc. 2:24) Mabalin nga adda bassit a puesto ni Jose iti abay ti balayna idiay Nazaret a nagtrabahuanna kas maysa a karpintero. Simple la ketdi ti panagbiagda, aglalo ta dakkel ti pamiliada a buklen ti di kumurang a pito nga annak.—Mat. 13:55, 56.
6 Prinotektaran ni Jehova ni Jesus iti dadduma a peggad, ngem dina inliklik ti Anakna iti amin a pakarigatan. (Mat. 2:13-15) Kas pagarigan, masapul idi a pakilangenan ni Jesus dagiti kabagianna a saan a mamati kenkuana. Nalidayan la ketdi ta adda dagiti kapamiliana a saan a namati kenkuana idi damo nga isu ti Mesias. (Mar. 3:21; Juan 7:5) Posible met idi a masapul nga iliwliwag ni Jesus ti ipapatay ti pannakaamana a ni Jose. Gapu iti dayta, masapul a ni Jesus ti mangasikason iti negosio ti pamiliada, kas inauna. (Mar. 6:3) Bayat a dumakdakkel ni Jesus, nasursurona nga aywanan ti pamiliana. Sigurado a nagtrabaho tapno masuportaranna ida. Isu nga ammona ti rikna ti mabannog kalpasan ti agmalem a trabaho.
Nagannak, maisaganayo dagiti annakyo kadagiti realidad iti biag no isuroyo ida nga agpannuray iti balakad ti Sao ti Dios (Kitaen ti parapo 7)d
7. (a) Ania dagiti saludsod a makatulong kadagiti agassawa a mangpadakkel iti annakda? (b) Kasano a makatulong ti Proverbio 2:1-6 iti panangsanay kadagiti annak?
7 No adda asawam ket kayatyo ti maaddaan iti annak, isaludsodyo iti bagiyo: ‘Napakumbabakami kadi a tattao a mangay-ayat ken Jehova ken iti Saona? Dakami ngata ti pilienna a mangaywan iti maysa a napateg a kayyanak nga ubing?’ (Sal. 127:3, 4) No maysakan a nagannak, isaludsodmo iti bagim: ‘Isursurok kadi kadagiti annakko ti kinapateg ti kinagaget?’ (Ecl. 3:12, 13) ‘Ar-aramidek kadi ti amin a kabaelak a mangprotektar kadagiti annakko iti dakes a bambanag a mabalin a pakaipasanguanda iti lubong ni Satanas?’ (Prov. 22:3) Saanmo a mailiklik dagiti annakmo iti amin a pakarigatan a mabalin a pakaipasanguanda. Imposible dayta. Ngem mabalin nga in-inut ken siaayat a maisaganam ida kadagiti realidad iti biag no isurom ida nga agpannuray iti balakad ti Sao ti Dios. (Basaen ti Proverbio 2:1-6.) Kas pagarigan, no simmardeng nga agserbi ken Jehova ti maysa a kabagianyo, usarem ti Sao ti Dios a mangisuro kadagiti annakmo no apay a nakapatpateg ti agtalinaed a matalek ken Jehova. (Sal. 31:23) Wenno no matay ti maysa nga ay-ayatenyo, isurom kadagiti annakmo dagiti teksto ti Biblia a makatulong kadakuada a mangiliwliwag iti riknada.—2 Cor. 1:3, 4; 2 Tim. 3:16.
AGSURSURO KADA JOSE KEN MARIA
8. Sigun iti Deuteronomio 6:6, 7, ania ti masapul idi nga aramiden da Jose ken Maria?
8 Natulongan da Jose ken Maria ni Jesus a dumakkel nga addaan iti pabor ti Dios ta sinurotda dagiti bilin ni Jehova kadagiti nagannak. (Basaen ti Deuteronomio 6:6, 7.) Nauneg ti panagayat da Jose ken Maria ken ni Jehova. Ti kangrunaan a kalatda ket ti panangiparegta kadagiti annakda a maaddaan iti kasta met la a kita ti ayat.
9. Ania ti napateg a desision nga inaramid da Jose ken Maria?
9 Inkeddeng da Jose ken Maria a pagtalinaeden ti nasayaat a naespirituan a rutina ti pamiliada. Sigurado a linawas nga immatenderda kadagiti gimong iti sinagoga idiay Nazaret ken iti tinawen a Paskua idiay Jerusalem. (Luc. 2:41; 4:16) Bayat dagita a panagbiahe ti pamiliada a mapan idiay Jerusalem, mabalin nga insuroda ken Jesus ken kadagiti kakabsatna ti pakasaritaan ti ili ni Jehova, ken posible a dimmagasda a nangpasiar kadagiti lugar a nadakamat iti Kasuratan. Bayat nga umad-adu ti annakda, mabalin a saan a nalaka a pagtalinaeden da Jose ken Maria ti nasayaat a naespirituan a rutinada. Ngem nagunggonaanda iti dayta! Gapu ta impangpangrunada ti panagdaydayaw ken Jehova, nagtalinaed a nasayaat ti espiritualidad ti pamiliada.
10. Ania dagiti masursuro dagiti Kristiano a nagannak kada Jose ken Maria?
10 Ania dagiti masursuro dagiti managbuteng iti Dios a nagannak kada Jose ken Maria? Ti kapatgan ket isurom kadagiti annakmo babaen ti sao ken aramid nga ay-ayatem unay ni Jehova. Bigbigem a ti kadakkelan a maisagutmo ket ti panangtulongmo kadakuada a mangayat ken Jehova. Ken ti maysa kadagiti kapatgan a maisurom kadakuada ket ti panangtaginayon iti nasayaat a naespirituan a rutina ti panagadal, panagkararag, pannakigimong, ken pannakipaset iti ministerio. (1 Tim. 6:6) Siempre, masapul nga ipaaymo dagiti material a kasapulan dagiti annakmo. (1 Tim. 5:8) Ngem laglagipem a ti nasinged a relasion dagiti annakmo ken Jehova, saan a ti material a bambanag, ti makatulong kadakuada a makalasat inton agpatingga daytoy daan a sistema ken sumrek iti baro a lubong ti Dios.b—Ezek. 7:19; 1 Tim. 4:8.
Makaparagsak a makita dagiti Kristiano a nagannak a mangar-aramid kadagiti nasayaat a naespirituan a desision para iti pamiliada! (Kitaen ti parapo 11)e
11. (a) Kasano a makatulong ti balakad ti 1 Timoteo 6:17-19 tapno makaaramid dagiti nagannak kadagiti nasayaat a desision bayat a padpadakkelenda ti annakda? (b) Ania dagiti kalat a mabalin nga aramiden ti pamiliayo, ken ania dagiti bendision a mabalin a resultana? (Kitaen ti kahon nga “Ania Dagiti Kalatyo?”)
11 Makaparagsak a makita ti adu a Kristiano a nagannak a mangar-aramid kadagiti nasayaat a naespirituan a desision para iti pamiliada! Kanayon nga agkakaduada iti panagserbi ken Jehova. Umat-atenderda kadagiti gimong iti kongregasion ken kombension. Ken makipaspasetda met iti ministerio. Adda pay ketdi dagiti pamilia a mangasaba kadagiti manmano a matrabaho a teritoria. Dadduma met ti ag-tour iti Bethel wenno tumulong a mangibangon kadagiti pasdek ti organisasion. Agsakripisio iti pinansial dagiti pamilia nga agdesision a makiraman kadagita nga aktibidad, ken mabalin a maipasangoda iti dadduma a pakarigatan. Ngem dagiti gunggona a maawatda ti mangpabaknang iti espiritualidadda. (Basaen ti 1 Timoteo 6:17-19.) Dagiti annak a napadakkel iti kasta a pamilia kaaduanna nga itultuloyda dagiti nasayaat a nasursuroda, ket awan ti pagbabawyanda!c—Prov. 10:22.
AGSURSURO KEN JESUS
12. Ania ti masapul nga aramiden ni Jesus bayat a dumakdakkel?
12 Kanayon a nasayaat dagiti desision ti nailangitan nga Ama ni Jesus, ket nangaramid met kadagiti nainsiriban a desision dagiti nagannakna ditoy daga. Ngem bayat a dumakdakkel idi ni Jesus, masapul a mangaramid kadagiti bukodna a desision. (Gal. 6:5) Kas kadatayo, adda wayawayana nga agpili. Mabalin koma nga inyun-unana dagiti bukodna a pagimbagan. Ngem pinagtalinaedna ketdi ti nasayaat a relasionna ken Jehova. (Juan 8:29) Kasano a makatulong ti ulidanna kadagiti agtutubo ita?
Agtutubo, kanayon nga agtulnogkayo iti bilin dagiti nagannakyo (Kitaen ti parapo 13)f
13. Ania ti napateg a desision nga inaramid ni Jesus idi ubing pay?
13 Idi ubing pay ni Jesus, natulnog kadagiti nagannakna ditoy daga. Dina pulos sinukir dagiti bilinda ken dina pinanunot nga ad-adu ti ammona ngem kadakuada. Imbes ketdi, “intultuloyna ti nagpasakup kadakuada.” (Luc. 2:51) Sigurado nga inaramidna ti amin a kabaelanna a mangibaklay iti responsabilidadna kas inauna. Inggaedna met ti nagsursuro iti maysa a trabaho iti pannakaamana tapno makatulong a mangsuporta iti pamiliana.
14. Kasanotayo nga ammo a nagaget ni Jesus nga agadal iti Sao ti Dios?
14 Posible nga imbaga dagiti nagannak ni Jesus ti namilagruan a pannakayanakna ken ti imbaga dagiti mensahero ti Dios maipapan kenkuana. (Luc. 2:8-19, 25-38) Saan a nakontento lattan kadagiti naibaga kenkuana; inadalna met ti Kasuratan. Kasanotayo nga ammo a nagaget ni Jesus nga agadal iti Sao ti Dios? Gapu ta uray ubing pay idi, dagiti mannursuro idiay Jerusalem ket “masmasdaaw kadagiti sungbatna ken iti kaadu ti ammona.” (Luc. 2:46, 47) Uray 12 laeng ti tawenna, inadalna a naimbag ti Kasuratan ket nagbalin a kombinsido a ni Jehova ti Amana.—Luc. 2:42, 43, 49.
15. Kasano nga impakita ni Jesus a pinilina nga aramiden ti pagayatan ni Jehova?
15 Idi naammuan ni Jesus ti akemna iti panggep ni Jehova, inkeddengna nga awaten dayta. (Juan 6:38) Ammona nga adu ti manggura kenkuana, ket sigurado a naladingitan a nangpampanunot iti dayta. Ngem nagtulnog latta ken Jehova. Idi nabautisaran ni Jesus idi 29 C.E., impangpangrunana iti biagna ti panangaramid iti pagayatan ni Jehova. (Heb. 10:5-7) Uray idi matmatayen iti kayo a pagtutuokan, determinado latta a mangaramid iti pagayatan ni Amana.—Juan 19:30.
16. Ania ti maysa a masursuro dagiti annak ken ni Jesus?
16 Agtulnogka kadagiti nagannakmo. Kas kada Jose ken Maria, saan a perpekto dagiti nagannakmo. Ngem isuda ti nangtedan ni Jehova iti responsabilidad a mangsalaknib, mangsanay, ken mangiwanwan kenka. No ipangagmo ti balakadda ken raemem ti autoridadda, “naimbag ti pagbanagam.”—Efe. 6:1-4.
17. Sigun iti Josue 24:15, ania a desision ti masapul nga aramiden a mismo dagiti agtutubo?
17 Agdesisionka no asino ti pagserbiam. Masapul a maawatam a naimbag no asino ni Jehova, no ania ti ramanen ti panggepna, ken no kasano a maaramidmo ti pagayatanna. (Roma 12:2) Iti kasta, maaramidmo ti kapatgan a desision iti biagmo, ti desision nga agserbi ken Jehova. (Basaen ti Josue 24:15; Ecl. 12:1) No regular ti eskediulmo nga agbasa ken agadal iti Biblia, agtultuloy nga umuneg ti ayatmo ken Jehova ken bumileg ti pammatim kenkuana.
18. Ania a desision ti masapul nga aramiden dagiti agtutubo, ken anianto ti resultana?
18 Agdesisionka nga iyun-unam ti pagayatan ni Jehova iti biagmo. Ikarkari ti lubong ni Satanas a no usarem dagiti talentom para iti pagimbagam, agbalinka a naragsak. Ngem ti agpayso, dagidiay agpokus kadagiti material a bambanag, agsagabada iti “adu nga ut-ot.” (1 Tim. 6:9, 10) Isu a no dumngegka ken Jehova ken agdesisionka nga iyun-unam ti pagayatanna iti biagmo, agballigika ken “makapagtignayka a nainsiriban.”—Jos. 1:8.
ANIANTO TI DESISIONYO?
19. Ania ti masapul a laglagipen dagiti nagannak?
19 Nagannak, aramidenyo ti amin a kabaelanyo a mangtulong iti annakyo nga agserbi ken Jehova. Agtalekkayo kenkuana, ket tulongannakayo a mangaramid kadagiti nainsiriban a desision. (Prov. 3:5, 6) Laglagipenyo a dakdakkel ti impluensia iti annakyo ti ar-aramidenyo ngem ti ibagbagayo. Mangaramidkayo ngarud kadagiti desision a makatulong kadakuada a manggun-od iti pabor ni Jehova.
20. Ania dagiti bendision nga awaten dagiti agtutubo no pilienda ti agserbi ken Jehova?
20 Agtutubo, matulongannakayo dagiti nagannakyo a mangaramid kadagiti nainsiriban a desision iti biag. Ngem masapul a dakayo ti mangaramid kadagita a desision tapno maparagsakyo ti Dios. Isu a tuladenyo ni Jesus ken pilienyo ti agserbi iti nadungngo a nailangitan nga Amayo. No aramidenyo dayta, agbalin nga okupado, makapnek, ken naragsak ti biagyo. (1 Tim. 4:16) Ken iti masanguanan, mapasaranyonto ti kararagsakan pay laeng a biag!
KANTA 133 Agdayaw ken Jehova Bayat ti Kinaagtutubo
a Kayat dagiti Kristiano a nagannak a dumakkel dagiti annakda kas nararagsak nga adipen ni Jehova. Ania dagiti desision a mabalinda nga aramiden tapno matulonganda dagiti annakda nga agserbi ken Jehova? Ania dagiti desision a masapul nga aramiden dagiti Kristiano nga agtutubo tapno agballigida iti biag? Sungbatan daytoy nga artikulo dagita a saludsod.
c Kitaen ti kahon nga “Isuda ti Kasayaatan a Nagannak” iti Agriingkayo!, Oktubre 2011, p. 20, ken ti artikulo nga “Espesial a Surat Para Kadagiti Nagannak Kadakuada” iti Agriingkayo!, Marso 8, 1999, p. 25.
d LADAWAN: Insuro la ketdi ni Maria iti ubing a ni Jesus ti nauneg a panagayat ken Jehova. Kabaelan met dagiti inna ita nga aramiden dayta kadagiti annakda.
e LADAWAN: Impateg la ketdi ni Jose ti pannakigimong iti sinagoga a kadua ti pamiliana. Kabaelan met dagiti amma ita nga ipateg ti pannakigimong a kadua ti pamiliada.
f LADAWAN: Adda dagiti praktikal a paglaingan a nasursuro ni Jesus iti pannakaamana. Adda met dagiti praktikal a paglaingan a masursuro dagiti agtutubo iti amada.