Inaramid ti Dios ti Langit ken ti Daga

Ni Jehova a Dios ti Namarsua kadatayo. Inaramidna ti amin a bambanag, dagiti makitatayo ken dagiti ditay makita. Sakbay nga inaramidna dagiti bambanag a makitatayo, nangaramid iti nagadu nga anghel. Ammom no ania ti anghel? Dagiti anghel ket kas ken Jehova a ditay makita. Nagbalin a katulongan ni Jehova ti kaunaan nga anghel nga inaramidna. Timmulong dayta nga anghel idi inaramid ni Jehova dagiti bituen, planeta, ken ti amin a bambanag. Maysa kadagita a planeta ti nagpintas a daga a paggigianantayo.

Kalpasanna, insagana ni Jehova ti daga a pagyanan dagiti animal ken tattao. Pinagbalinna a posible a dumanon ti lawag ti init iti daga. Inaramidna dagiti bantay, baybay, ken karayan.

Ania ti simmaruno? Kinuna ni Jehova: ‘Mangaramidak iti ruot, mulmula, ken kaykayo.’ Nagtubo ti adu a klase ti agbunga a kaykayo, natnateng, ken sabsabong. Sa inaramid ni Jehova ti amin nga animal—dagiti agtayab, aglangoy, agkaradap, ken agkarayam. Nangaramid kadagiti babassit nga animal, kas iti koneho, ken kadagiti dadakkel, kas iti elepante. Ania ti paboritom nga animal?

Kalpasanna, imbaga ni Jehova iti kaunaan nga anghel: “Aramidenta ti tao.” Naiduma dagiti tao kadagiti animal. Makaimbento, makasao, makakatawa, ken makapagkararagda. Isuda ti mangaywan iti daga ken kadagiti animal. Ammom no asino ti immuna a tao? Kitaenta.