Nagsukir da Adan ken Eva iti Dios

Maysa nga aldaw, idi agmaymaysa ni Eva, adda uleg a nakisarita kenkuana. Kinunana: ‘Talaga kadi nga imbaga ti Dios a saankayo a mabalin a mangan iti bunga ti amin a kayo?’ Kinuna ni Eva: ‘Mabalinmi ti mangan ngem adda maysa nga imparit ti Dios. No mangankami iti dayta, mataykami.’ Imbaga ti uleg: ‘Saankayto a matay. Ti agpayso, no mangankayo, agbalinkayo a kas iti Dios.’ Pudno kadi dayta? Saan. Ngem namati ni Eva. Idi kitkitaenna ti bunga, ad-adda metten a kayatna a kanen. Nangan ni Eva sa inikkanna ni Adan. Ammo ni Adan a matayda no agsukirda iti Dios ngem nangan latta.

Kamalmanna, nakisarita ni Jehova kada Adan ken Eva. Dinamagna no apay a nagsukirda. Pinabasol ni Adan ni Eva, ken pinabasol ni Eva ti uleg. Gapu ta nagsukir da Adan ken Eva, pinapanaw ida ni Jehova iti hardin. Tapno saandan a makasubli, nangikabil ni Jehova kadagiti anghel ken iti umap-apuy nga espada iti pagserkan ti hardin.

Imbaga ni Jehova a madusa met daydiay nagulbod ken Eva. Saan a talaga a ti uleg ti nakisarita ken Eva. Awan ti inaramid ni Jehova nga uleg a makasao. Nakapagsao ti uleg gapu iti maysa a dakes nga anghel. Inaramidna dayta tapno maallilawna ni Eva. Naawagan dayta nga anghel iti Satanas a Diablo. Dadaelento ni Jehova ni Satanas tapno saannan a maallilaw dagiti tattao nga agaramid iti dakes.