Idi naparuaren da Adan ken Eva iti hardin ti Eden, naaddaanda iti adu nga annak. Nagbalin a mannalon ti inauna a ni Cain. Nagbalin met a pastor ti maikadua a ni Abel.

Maysa nga aldaw, nagdaton da Cain ken Abel ken ni Jehova. Ammom no ania ti daton? Maysa nga espesial a regalo. Naragsakan ni Jehova iti daton ni Abel, ngem saan a naragsakan iti daton ni Cain isu a nakapungtot unay ni Cain. Imbaga ni Jehova kenkuana a makaaramid iti dakes no itultuloyna a guraen ti kabsatna. Ngem saan a dimngeg ni Cain.

Kinuna ketdi ni Cain ken Abel: ‘Mapanta idiay tanap.’ Idi addadan iti tanap, dinarup ni Cain ti kabsatna ket pinatayna. Ania ngata ti aramiden ni Jehova? Dinusa ni Jehova ni Cain ket pinagtalawna. Saannan a mabalin ti agsubli iti pamiliana.

Ania ti maadalta? Mabalin a makaungettayo no saan a mapasamak ti kayattayo. No madlawtayo a makaungettayon wenno ibaga ti dadduma a nadlawda dayta, dagus koma a kontrolentayo ti riknatayo.

Gapu ta nagaramid ni Abel iti naimbag ken ay-ayatenna ni Jehova, saan isuna a malipatan ni Jehova. Pagbiagento ti Dios ni Abel inton pagbalinenna a paraiso ti daga.

Idi agangay, immadu ti tao iti daga. Dakes ti adu kadakuada. Nagbalin a dakes uray ti dadduma nga anghel idiay langit. Pimmanawda idiay langit ket bimmabada ditoy daga. Ammom no apay? Tapno agbalinda a tao ket mangasawada kadagiti babbai.

Naaddaan dagiti anghel ken dagiti babbai kadagiti annak. Dimmakkel a napigsa dagiti annakda. Kabkabilen ken butbutngenda dagiti tattao. Saan a kayat ni Jehova nga agtultuloy dayta, isu a nagdesision a paglayusenna ti daga tapno matay dagiti dakes a tattao.

Ngem adda maysa a lalaki a naiduma. Ay-ayatenna ni Jehova. Noe ti naganna. Adda asawana ken adda tallo nga annakna—da Sem, Ham, ken Jafet. Adda met asawa dagiti annakna. Imbaga ni Jehova ken Noe a mangaramid iti dakkel a daong. Ti daong ket dakkel a kahon a tumpaw iti danum. Impaaramid dayta ni Jehova tapno saanda a matay iti Layus. Imbagana met ken Noe a mangiserrek iti adu nga animal iti daong tapno maisalakanda met.

Dagus nga inaramid ni Noe ken ti pamiliana ti daong ket immabut dayta iti agarup 50 a tawen. Sinurotda ti amin nga imbilin ni Jehova idi inaramidda ti daong. Imbaga met ni Noe kadagiti tattao ti maipapan iti Layus, ngem awan ti dimngeg.

Idi kuan, masapul a sumrekdan iti daong. Kitaenta no ania ti simmaruno a napasamak.