Sumario Dagiti Pannakalawlawag
Iti panaglabas dagiti tawen, inlawlawag Ti Pagwanawanan ti dadduma a panagbalbaliw ti pannakaawattayo iti sumagmamano a paset ti padto ni Ezekiel. Daytoy a libro a napauluan iti Nadalus a Panagdaydayaw—Naisubli Met Laengen! ket naglaon iti adu a kanayonan a pannakalawlawag. Kitaenyo no masungbatanyo dagitoy a saludsod.
Ania ti irepresentar ti uppat a rupa dagiti sibibiag a parsua?
Dati a pannakaawat: Ti tunggal maysa kadagiti uppat a rupa dagiti sibibiag a parsua, wenno kerubin, irepresentarda ti tunggal maysa kadagiti uppat a kangrunaan a kualidad ni Jehova.
Pannakalawlawag: Nupay ti tunggal maysa kadagiti uppat a rupa dagiti sibibiag a parsua ti mangirepresentar iti tunggal maysa kadagiti uppat a kangrunaan a kualidad ni Jehova, no kitaen a sangsangkamaysa, ti uppat a rupa saklawenda ti amin a kualidadna. Ti uppat a rupa ipaganetgetna met kadatayo ti kasta unay a kinatan-ok ti pannakabalin ken kinadayag ni Jehova.
No apay a nabaliwan: Iti Sao ti Dios, ti numero nga uppat ket masansan a nausar a mangirepresentar iti banag a mangsaklaw iti amin wenno kinakompleto. Gapuna, no mailadawan a sangsangkamaysa ti uppat a rupa, saanda la a basta uppat a kualidad—dagita ti pundasion ti nakaskasdaaw a personalidad ni Jehova. Maysa pay, tunggal rupa ket ladawan ti maysa a parsua a mangisimbolo iti kinadayag, kinabileg, ken kinamannakabalin. Ngem amin nga uppat a mannakabalin a mangibagi kadagiti parsua, kas iladawan ti uppat a rupa ti tunggal kerubin, ket adda iti baba ti trono ni Jehova. Ipakita dayta a pannakailadawan a ni Jehova ti Kangatuan nga Agturay iti amin.
Asino ti irepresentar ti lalaki nga addaan iti tintero ti sekretario?
Dati a pannakaawat: Irepresentar ti lalaki nga addaan iti tintero dagiti natda a napulotan wenno dinutokan ti espiritu. Babaen ti trabaho a panangasaba ken panangaramid iti adalan, dagiti dinutokan ti espiritu ket mangikabkabil iti simboliko a marka iti muging dagidiay agbalin a paset ti “dakkel a bunggoy.”—Apoc. 7:9.
Pannakalawlawag: Ti lalaki nga addaan iti tintero ti sekretario irepresentarna ni Jesu-Kristo. Markaanna dagiti karaman iti dakkel a bunggoy inton maukomda kas karnero bayat ti “dakkel a rigat.”—Mat. 24:21.
No apay a nabaliwan: Intalek ni Jehova iti Anakna ti panangukom. (Juan 5:22, 23) Sigun iti Mateo 25:31-33, ni Jesus ti mangaramid iti maudi a panangukom no siasino dagiti “karnero” ken “kalding.”
Ti kadi agkabsat a balangkantis a da Ohola ken Oholiba isimboloda ti Kakristianuan a nabingay kadagiti relihion a Katoliko ken Protestante?
Dati a pannakaawat: Ni Ohola (Samaria, kabesera ti Israel), ti in-inauna, iladawanna ti Katolisismo; ni Oholiba (Jerusalem, kabesera ti Juda), ti in-inaudi, iladawanna ti Protestantismo.
Pannakalawlawag: Ti agkabsat a balangkantis ket saan a padto a mangisimbolo iti aniaman a paset ti Kakristianuan. Ngem makatulong ti kaaddada tapno maawatantayo ti rikna ni Jehova no ti matalek nga ilina ket agbalangkantis iti naespirituan. Kasta met la ti riknana iti amin nga ulbod a relihion.
No apay a nabaliwan: Awan teksto iti Biblia a mangiparipirip a da Ohola ken Oholiba ket padto a mangisimbolo iti Kakristianuan. Ti Israel ken Juda ket arigna matalek idi nga assawa ni Jehova, ngem awan a pulos ti kasta a relasion ti Kakristianuan ken Jehova. Kanayonanna, ti pannakaikompara ti di matalek nga ili ti Dios kadagiti balangkantis iti kapitulo 16 ken 23 ti Ezekiel ket mangipanamnama iti panagbalbaliw ken pannakaisubli. Awan ti kasta a namnama ti Kakristianuan a paset ti Babilonia a Dakkel.
Ti kadi Kakristianuan ti antitipiko ti nagkauna nga apostata a Jerusalem?
Dati a pannakaawat: Ti di matalek a Jerusalem ket padto a mangisimbolo iti Kakristianuan. Ti ngarud pannakadadael ti Jerusalem ket padto a mangiladawan iti mapasamak iti Kakristianuan.
Pannakalawlawag: Dagiti kasasaad iti di matalek a Jerusalem—kas iti idolatria ken nasaknap a kinadakes—ipalagipda kadatayo ti Kakristianuan, ngem saantayon nga ibagbaga a ti Kakristianuan ti antitipiko a Jerusalem.
No apay a nabaliwan: Awan teksto a nalawag a pakaibatayan ti kasta a tipiko ken antitipiko a pamay-an ti panangilawlawag. Saan a kas iti nagkauna a Jerusalem, ti Kakristianuan ket saan a pulos a nangipaay iti nadalus a panagdaydayaw. Ken nupay adda idi tiempo a pinakawan ni Jehova ti Jerusalem, awan ti kasta a manamnama ti Kakristianuan.
Kasano a natungpal ti sirmata maipapan iti tanap dagiti namaga a tulang?
Dati a pannakaawat: Idi 1918, dagiti dinutokan ti espiritu a naidadanes napadasanda ti kasla natay a kasasaad a dandani awan maaramidanda gapu iti pannakaadipenda iti Babilonia a Dakkel. Nagpatingga ti apagbiit a pannakaadipenda idi 1919, idi pinagbiag manen ida ni Jehova kas manangaskasaba iti Pagarian.
Pannakalawlawag: Ti kasla natay a kasasaad bayat ti naespirituan a pannakaadipen ket nakapapaut ken nabayagen a nangrugi sakbay ti 1918. Nangrugi dayta idi maikadua a siglo C.E. ken nagpatingga idi 1919 C.E. Kangrunaan a kapadpada dayta ti napaut a tiempo ti panagdakkel dagiti trigo ken ruot iti ilustrasion ni Jesus.
No apay a nabaliwan: Ti pannakaadipen ti nagkauna nga Israel ket nagpaut iti atiddog a tiempo a nangrugi idi 740 B.C.E. ken nagpatingga idi 537 B.C.E. Nailadawan iti padto ni Ezekiel a dagiti tulang ket ‘namaga’ wenno “nakamagmaga,” a mangipakita a nakabaybayagen a natay dagiti irepresentar dagiti tulang. Ti panagbiag manen dagiti tulang ket nailadawan met kas in-inut a proseso nga agkasapulan iti panawen.
Ania ti kaipapanan ti panagtipon ti dua a baston?
Dati a pannakaawat: Kalpasan ti apagbiit a saan a panagkaykaysa dagiti matalek a miembro dagiti natda a dinutokan ti espiritu bayat ti Gubat Sangalubongan I, nagkaykaysada manen idi 1919.
Pannakalawlawag: Itampok ti padto a pagkaykaysaen ni Jehova dagiti agdaydayaw kenkuana. Iti panaglabas ti tiempo kalpasan ti 1919, dagiti umad-adu ti bilangda nga addaan iti naindagaan a namnama ket nakikadua kadagiti miembro ti natda a dinutokan ti espiritu. Agkadua dagitoy dua a grupo a mangidaydayaw ken Jehova kas maysa nga ili.
No apay a nabaliwan: Saan nga iladawan ti padto a ti maysa a baston ket nagudua nga immuna sa napagmaymaysa. Saan ngarud nga ibagbaga ti padto a ti maysa a grupo ket magudua sa mapagmaymaysa manen. Imbes ketdi, iladawanna no kasano a napagmaymaysa ti dua nga agduma a grupo.
Asino ni Gog iti Magog?
Dati a pannakaawat: Ti Gog iti Magog ket naimpadtuan a nagan a tumukoy ken Satanas kalpasan a napapanaw idiay langit.
Pannakalawlawag: Ti Gog iti Magog ket tumukoy iti aliansa dagiti nasion ditoy daga a mangraut kadagiti mangipapaay iti nadalus a panagdaydayaw bayat ti dakkel a rigat.
No apay a nabaliwan: Dagiti padto a mangiladawan iti Gog—kas iti maipakan kadagiti tumatayab nga agsippayot ken maikkan iti pakaitabonan ditoy daga—ipakitana a ni Gog ket saan nga espiritu a parsua. Maysa pay, ti iraraut ni Gog ket kapada dagiti nadakamat iti libro a Daniel ken Apocalipsis a panangraut dagiti nasion ditoy daga iti ili ti Dios.—Dan. 11:40, 44, 45; Apoc. 17:14; 19:19.
Nakita ken napasiar kadi ni Ezekiel ti dakkel a naespirituan a templo nga inlawlawag idi agangay ni apostol Pablo?
Dati a pannakaawat: Ti templo a nakita ni Ezekiel iti sirmata ket isu met laeng ti naespirituan a templo nga inlawlawag ni apostol Pablo.
Pannakalawlawag: Saan a ti naespirituan a templo a nangrugi idi 29 C.E. ti nakita ni Ezekiel, no di ket sirmata no kasano a ti naan-anay a nadalus a panagdaydayaw a naidetalye iti Mosaiko a Linteg ket maisubli kalpasan ti pannakaadipen idiay Babilonia. Ti impailawlawag ti Dios ken Pablo a naespirituan a templo ket naisentro iti trabaho ni Jesus, kas Dakdakkel a Nangato a Padi, nga inaramidna manipud 29 agingga iti 33 C.E. Ti templo a nakita ni Ezekiel iti sirmata dina pulos dinakamat ti nangato a padi, ta naisentro dayta iti naespirituan a pannakaisubli a nangrugi idi 1919 C.E. Ditay ngarud ikkan iti antitipiko wenno realidad nga isimbolo ti amin a naidetalye a paset ken rukod ti templo a nakita ni Ezekiel iti sirmata. Agpokustayo ketdi a nangnangruna kadagiti masursurotayo iti sirmata ni Ezekiel maipapan kadagiti pagalagadan ni Jehova iti nadalus a panagdaydayaw.
No apay a nabaliwan: Adda dagiti napateg a nagdumaan ti templo a nakita ni Ezekiel ken ti naespirituan a templo. Kas pagarigan, naitampok iti templo a nakita ni Ezekiel ti adu a daton nga animal; iti naespirituan a templo, maymaysa laeng ti naidaton a “namimpinsan.” (Heb. 9:11, 12) Ginasut a tawen sakbay ti iyaay ni Kristo, saan pay a tiempo nga ipakaammo ni Jehova dagiti nauneg a kinapudno maipapan iti naespirituan a templo.