Dusaen Aya ti Dios Dagiti Tattao iti Umap-apuy nga Impierno?

Dusaen Kadi ti Dios Dagiti Dakes a Tattao?

Mauricio: Maragsakanak ta nagkitata manen.

Alejandro: Kastaak met.

Mauricio: Pinampanunotko ti imbagam kaniak idi immayak ditoy.

Alejandro: Ania kadagiti imbagak?

Mauricio: Imbagam a nasdaawka idi naammuam a saan gayam a mamati dagiti Saksi ni Jehova iti umap-apuy nga impierno.

Alejandro: Wen, talaga a nasdaawak. Kinapudnona, diak impagarup a dikay mamati.

Mauricio: Nagsayaat ta imbagam ti riknam. Maragsakanak a makangngeg iti opinion ti dadduma. Yantangay nagduduma ti opinion dagiti tattao maipapan iti umap-apuy nga impierno, ania met ngay ti opinionmo?

Alejandro: Patiek a no matay dagiti dakes a tattao mapanda idiay impierno ket matutuokda iti agnanayon.

Mauricio: Kasta met ti kapanunotan ti kaaduan. Saludsodek man kenka, adda kadin nasaem a kapadasam?

Alejandro: Wen. Lima a tawenen ti napalabas sipud idi napapatay ni manangko.

Mauricio: Ladingitek ti napasamak ken manangmo. Sigurado a mailiwkan kenkuana.

Alejandro: Wen ngarud. Inaldaw a malaglagipko ni Manang.

Mauricio: Ibagbaga ti dadduma a tattao a patienda ti umap-apuy nga impierno gapu ta marurodda iti aramid dagiti dakes a tattao. Siempre, kayat dagiti inosente a biktima a madusa dagiti nagaramid iti dakes, di ngamin?

Alejandro: Uray siak! Kayatko a madusa ti nangpatay ken manangko.

Mauricio: Normal laeng a kasta ti mariknam. Isursuro ti Biblia a makaunget met ti Dios no mabiktima dagiti awan basolda a tattao ken inkarina a dusaennanto dagiti managdakdakes. Kastoy ti mabasa iti Isaias 3:11: “Asi pay daydiay nadangkes!​—Didigra; ta ti panangtrato nga inaramid dagiti bukodna nga ima maaramidto kenkuana!” Makapagtalektayo ngarud a dusaento ti Dios dagiti dakes a tattao.

Alejandro: Ngem kasano ngarud a mapasamak dayta no awan met ti umap-apuy nga impierno?

Mauricio: Nagsayaat a saludsod dayta. Iti kinapudnona, dusaen ti Dios dagiti nadangkes iti agnanayon a pannakadadael. Usigem ti kunaen ti Biblia ditoy 2 Tesalonica 1:9. Pakibasam man.

Alejandro: Kunana: “Dagitoy a mismo agpasardanto iti pannakaukom a dusa nga agnanayon a pannakadadael manipud iti sanguanan ti Apo.”

Mauricio: Nadlawmo kadi nga awan ti namnama dagiti nadangkes a tattao gapu ta dusaen ida ti Dios iti agnanayon nga ipapatay? Awan ti namnamada nga agbiag iti masanguanan.

Alejandro: Maawatakon ti kayat a sawen ti teksto ngem kasla saan a nainkalintegan ta mataytayo amin. Saan aya a rumbeng laeng a nadagdagsen ti dusa dagiti dakes a tattao?

Ania ti Kasapulan a Maaramid Tapno Adda Kinahustisia?

Mauricio: Makitak a kayatmo nga adda koma kinahustisia.

Alejandro: Siempre.

Mauricio: Makomendaranka. Kinapudnona, ti Dios pinarsuana ti tao a makailasin iti naimbag ken dakes. Kayatna met nga adda koma hustisia. Ngem no isursuro dagiti lider ti relihion a dusaen ti Dios dagiti tattao iti umap-apuy nga impierno, kasla ibagbagada nga awan ti kinahustisia ti Dios.

Alejandro: Ania ti kayatmo a sawen?

Mauricio: Mangtedak iti maysa a pagarigan. Pamiliarka kadi iti salaysay ti Biblia maipapan kada Adan ken Eva?

Alejandro: Wen. Kinuna ti Dios a saanda a mangan iti bunga ti maysa a kayo ngem nagsukirda.

Mauricio: Husto. Basaenta ti salaysay iti Genesis 2:16, 17. Kunana: “Ni Jehova a Dios impasdekna met daytoy a bilin iti tao: ‘Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.’” Isu nga ania ti imbaga ti Dios a mapasamak no mangan ni Adan iti naiparit a bunga?

Alejandro: Kinunana a matay ni Adan.

Mauricio: Hustoka. Panunotem: Gapu iti basol ni Adan nagbalin a managbasol ti intero a sangatauan.a Nupay kasta, adda kadi imbaga ti Dios a dusa nga umap-apuy nga impierno?

Alejandro: Awan.

Mauricio: Ngem no matutuokda iti agnanayon, saan kadi a nainkalintegan ken naayat no pinakdaaran koma ida ti Dios?

Alejandro: Wen a.

Mauricio: Usigem manen ti imbaga ti Dios kada Adan ken Eva kalpasan a nagbasolda. Pakibasam man ti Genesis 3:19?

Alejandro: Kunana: “Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam. Ta tapokka ket iti tapok agsublikanto.”

Mauricio: Pagyamanan. Sigun iti imbaga ti Dios, sadino ti napanan ni Adan?

Alejandro: Kinunana nga agsubli ni Adan iti daga.

Mauricio: Husto. Ita, nalabit umanamongka a tapno maibaga nga agsublika iti maysa a lugar, masapul a naggapukan sadiay?

Alejandro: Siempre.

Mauricio: Ayan ngarud ni Adan sakbay a pinarsua ti Dios?

Alejandro: Awan.

Mauricio: Wen, umiso dayta. Ken nadlawmo kadi nga awan ti nadakamat a panangdusa ti Dios iti umap-apuy nga impierno. Nainkalitegan kadi nga ibaga ti Dios nga agsubli ni Adan iti daga no mapan met gayam iti umap-apuy nga impierno?

Alejandro: Siempre, saan.

Tungtungpalen Kadi ti Diablo ti Pagayatan ti Dios?

Mauricio: Adda pay sabali nga ikabilanganta maipapan iti sursuro nga umap-apuy nga impierno.

Alejandro: Ania dayta?

Mauricio: Asino kadi ti ibagbaga dagiti tattao a “mangay-aywan” iti umap-apuy nga impierno ken mangdusdusa kadagiti tattao sadiay?

Alejandro: Ti Diablo.

Mauricio: Ngem ti Diablo ti kangrunaan a kabusor ti Dios. No agpayso a dusaen ti Dios dagiti tattao iti umap-apuy nga impierno tapno tutuoken ti Diablo, saan kadi nga ipakita dayta a kasla agkumplotda?

Alejandro: Wen nga agpayso aya?

Mauricio: Tapno matarusam a naimbag, saan kadi a maysaka nga ama?

Alejandro: Wen, adda barok nga agtawen iti 15.

Mauricio: Ipapanmo a nagbalin a rebelde ti anakmo. Dakes ti ar-aramidenna a mamagleddaang kenka. Ania ti aramidem?

Alejandro: Ikagumaak a tubngaren.

Mauricio: Siguradoak a maulit-ulit a tulongam nga agbalbaliw.

Alejandro: Siempre.

Mauricio: Ipapantan a dina kayat ti agbalbaliw iti laksid ti panangtubngarmo kenkuana. Iti panagkunam, rumbeng kadi a dusaem?

Alejandro: Wen a.

Mauricio: Ngem kasano ngay no matakuatam nga adda dakes a tao a mangisungsungsong iti anakmo nga agaramid ti dakes?

Alejandro: Siempre, makaungetak iti dayta a tao.

Mauricio: Ita ta ammomon a ti dakes a tao ti nangisungsong iti anakmo, ibagam kadi iti dayta a tao a dusaenna ti anakmo?

Alejandro: Siempre saan.

Mauricio: Umiso kadi ngarud a kiddawen ti Dios ken Satanas a Diablo​—daydiay mangisungsungsong kadagiti tattao nga agaramid ti dakes​—a dusaenna dagita met laeng a tattao?

Alejandro: Siempre, saan.

Mauricio: No kayat ti Dios a madusa dagiti nadangkes, apay ngarud a tungpalen ti Diablo​—a kangrunaan a kabusor ti Dios​—ti pagayatan ti Dios a mangdusa kadakuada?

Alejandro: Baro kaniak dayta a.

Pagpatinggaen ni Jehova ti Amin a Kinadakes

Mauricio: Ngem mainanamam nga agtignayto ti Dios maibusor kadagiti nadangkes a di agbalbaliw. Kayatko nga iranud kenka ti Salmo 37:9, ti maudi a teksto a mangpaneknek iti daytoy. Pakibasam man.

Alejandro: Kunana: “Magessatto dagiti mismo a managaramid iti dakes, ngem dagidiay mangin-inanama ken Jehova isuda ti mangtagikuanto iti daga.”

Mauricio: Pagyamanan. Nadlawmo kadi no ania ti aramidento ni Jehova a Dios kadagiti managdakdakes?

Alejandro: Kunana a gessatennanto ida.

Mauricio: Hustoka. Kayatna a sawen, pukawennanto ida iti agnanayon. Ngem dagiti naimbag a tattao​—“dagidiay mangin-inanama ken Jehova”​—agbiagdanto nga agnanayon ditoy daga. Siempre, mabalin a maisaludsodmo, apay ngarud a saan a lapdan ti Dios dagiti tattao nga agaramid ti dakes? Ken no talaga a dusaenna dagiti dakes a tattao, apay ngarud a dina pay la inaramid dayta?

Alejandro: Wen ngarud. Kayatko a maammuan ti sungbat dagita.

Mauricio: Ipakitakto kenka dagiti sungbat ti Biblia inton sumarungkarak.b

Alejandro: Sige, urayenkanto.