1, 2. Ania ti napaliiw dagiti manangaywan iti sirkito iti adu a kongregasion?

MALMALPASEN ti pannakimiting ti manangaywan iti sirkito kadagiti panglakayen. Bayat a kitkitaenna ti rupada, maap-apresiarna ti panagregget dagitoy a nagaget a papastor, a dadduma kadakuada ti lakayen a maibilangna kas amana. Ngem adda pakaseknanna, ket insaludsodna, “Kakabsat, adda kadi inaramidyon a panangsanay iti sabsabali tapno maibaklaydanto dagiti annongen iti kongregasion?” Malagipda nga iti naudi nga ibibisita ti manangaywan iti sirkito, imparegtana nga ikkanda iti atension ti panangsanay iti sabsabali. Simmungbat idi agangay ti maysa a panglakayen, “Kinapudnona, saanmi unay a maas-asikaso dayta.” Immanamong dagiti padana a panglakayen.

² No maysaka a panglakayen, mabalin a kasta met ti insungbatmo. Napaliiw dagiti manangaywan iti sirkito iti nadumaduma a pagilian nga iti adu a kongregasion, masapul a maasikaso ti panangsanay kadagiti kakabsat a lallaki​—agtutubo man wenno natataengan​—a tumulong a mangaywan iti arban. Ngem saan a nalaka nga aramiden dayta. Apay?

3. (a) Kasano nga ipakita ti Biblia ti kinapateg ti panangsanay, ken apay a maseknantayo amin iti dayta? (Kitaen ti footnote.) (b) Apay a mabalin a marigatan ti dadduma a panglakayen a mangsanay iti sabsabali?

³ Kas maysa a pastor, sigurado a mabigbigmo a napateg ti personal a panangsanay iti sabsabali.a Ammom nga adu a kakabsat a lallaki ti kasapulan tapno agtultuloy a natibker ti espiritualidad dagiti nabuangayen a kongregasion ken tapno mabuangay pay dagiti baro a kongregasion. (Basaen ti Isaias 60:22.) Ammom met nga idagdagadag ti Biblia a masapul a ‘suruam ti sabsabali.’ (Basaen ti 2 Timoteo 2:2.) Nupay kasta, kas kadagiti panglakayen a nadakamat iti rugi ti artikulo, mabalin a marigatanka a mangaramid iti dayta. Kalpasan ti panangasikasom iti kasapulan ti pamiliam, trabahom, responsabilidadmo iti kongregasion, ken dadduma pay nga importante a bambanag, mabalin a kasla awanen ti tiempom a mangsanay iti dadduma a kakabsat iti kongregasion. Gapuna, usigentayo no apay a napateg nga iwayaam ti panangsanay iti sabsabali.

PANANGSANAY​—MAYSA A PRIORIDAD

4. Ania ti mabalin a makagapu no apay nga itantan ti dadduma a panglakayen ti mangsanay?

⁴ Ania ti mabalin a makagapu a marigatan ti dadduma a panglakayen a mangiwaya iti tiempo a mangsanay? Nalabit kunaen ti dadduma: ‘Napateg ti panangsanay iti sabsabali, ngem adda dadduma pay a banag iti kongregasion a masapul a mayun-una. No itantanko ti mangsanay, agandar latta ti kongregasion.’ Agpayso nga adda bambanag a masapul nga asikasuem a dagus, ngem no itantanmo ti mangsanay, mabalin a maapektaran ti espiritualidad ti kongregasion.

5, 6. Ania ti maadaltayo iti pamay-an a panangasikaso ti drayber iti makina ti luganna, ken kasano nga umarngi dayta iti panangsanay iti kakabsat a lallaki iti kongregasion?

⁵ Panunotem daytoy a pagarigan: Ammo ti maysa a drayber a tapno mamantener ti luganna ken tapno naannayas ti andar ti makinana, masapul a regular nga agpa-change oil. Ngem mabalin a panunotenna a nagangganat ti agpagasolina agsipud ta saan nga agandar ti luganna no dina aramiden dayta. Mabalin nga irasonna, ‘Okey lang uray diak pay la agpa-change oil ta agandar met latta ti luganko.’ Ngem ania ti pagdaksan dayta? No itantantan ti drayber ti pannakamantener ti makina ti luganna, in-inut a madadael dayta agingga a saanton nga agandar. No kasta ti mapasamak, adu a tiempo ken kuarta ti masapul tapno matarimaan ti lugan. Ania ti maadaltayo?

⁶ Adu a napapateg a banag ti masapul nga asikasuen a dagus dagiti panglakayen; ta no saan, maapektaran ti kongregasion. Kas iti drayber a kanayon a mangsigurado nga adda gasolina ti luganna, masapul met a ‘siguraduen [dagiti panglakayen] ti napatpateg a bambanag.’ (Fil. 1:10) Nupay kasta, okupado unay ti dadduma a panglakayen kadagiti napateg a bambanag nga uray la maliwayandan ti mangsanay iti sabsabali​—a mayarig iti panangmantener iti makina ti lugan. No itantantan dagiti panglakayen ti mangsanay, addanto tiempo a manmano laengen ti kualipikado a kakabsat a lallaki a mangasikaso iti amin a kasapulan ti kongregasion.

7. Ania koma ti pangibilangantayo kadagiti panglakayen a mangiwaywaya iti tiempoda a mangsanay iti sabsabali?

⁷ Ditay koma ngarud ipapan a saan a prioridad ti panangsanay. Dagiti panglakayen a sipapanunot iti kasapulan ti kongregasion ken mangiwaywaya iti tiempo a mangsanay iti kakabsat a lallaki ket maibilang kas masirib a mayordomo ken pudno a bendision iti kongregasion. (Basaen ti 1 Pedro 4:10.) Kasano a magunggonaan ti kongregasion?

USARENYO A NAIMBAG TI TIEMPOYO

8. (a) Ania ti mangtignay kadagiti panglakayen a mangsanay iti sabsabali? (b) Ania ti nagpateg a responsabilidad dagiti panglakayen nga agserserbi kadagiti lugar nga addaan iti dakdakkel a panagkasapulan? (Kitaen ti kahon a “Nagpateg a Mision.”)

⁸ Uray dagiti aduan kapadasan a panglakayen masapul a sieemma a bigbigenda a lumakayda ken in-inut a malimitaran ti maaramidanda iti kongregasion. (Mik. 6:8) Sipapanunotda met koma a mabalin a bigla nga agbaliw ti kasasaadda gapu iti “tiempo ken ti di mapakpakadaan a pasamak,” ket maapektaran ti panangibaklayda iti responsabilidadda iti kongregasion. (Ecl. 9:11, 12; Sant. 4:13, 14) Gapu iti naimpusuan a pannakaseknan dagiti panglakayen kadagiti karnero ni Jehova, iranudda kadagiti agtutubo a kakabsat a lallaki dagiti kapadasanda iti adun a tawen a simamatalek a panagserbida.​—Basaen ti Salmo 71:17, 18.

9. Apay a nakapatpateg itan ti panangsanay?

⁹ No sansanayen dagiti panglakayen ti sabsabali, patpatibkerenda met ti naespirituan a depensa ti kongregasion. Kasano? No ikagumaan dagiti panglakayen ti mangsanay iti sabsabali, ad-adunto a kakabsat a lallaki ti mabalin a tumulong a mangpatibker ken mamagkaykaysa iti kongregasion, saan laeng nga ita no di ket nangnangruna bayat dagiti nariribuk a tiempo inton dakkel a rigat. (Ezeq. 38:10-12; Mik. 5:5, 6) Gapuna, patgenmi a papanglakayen, pangngaasiyo ta iwayaanyo itan ti regular a panangsanay iti sabsabali.

10. Ania ti nasken nga aramiden ti maysa a panglakayen tapno adda tiempona a mangsanay iti sabsabali?

¹⁰ Ammomi nga okupadokayo unay gapu iti panangasikasoyo iti napapateg a bambanag iti kongregasion, ket kasla awanen ti tiempoyo para iti sabali pay a banag. Ngem masapul nga usarenyo ti dadduma iti dayta a tiempo tapno sanayenyo ti sabsabali. (Ecl. 3:1) No usarenyo a naimbag ti tiempoyo, magunggonaan ti kongregasion.

ISAGANAYO TI PUSO TI SANAYENYO

11. (a) Ania ti makapainteres kadagiti singasing dagiti panglakayen iti nadumaduma a pagilian? (b) Sigun iti Proverbio 15:22, apay a makatulong ti panangusig kadagiti singasing ti dadduma a panglakayen?

¹¹ Iti nabiit pay, napagsaludsodan ti dadduma a panglakayen a naballigi a nangsanay iti kakabsat a lallaki no ania ti inaramidda.b Nupay nagduduma ti kasasaad dagitoy a kakabsat, makapainteres ta agpapada ti singasingda. Ania ti ipakpakita daytoy? Ti panangsanay a naibatay iti Biblia ket makatulong kadagiti masansanay iti “isuamin a lugar iti tunggal kongregasion”​—kas idi kaaldawan ni apostol Pablo. (1 Cor. 4:17) Gapuna, usigentayo iti daytoy nga artikulo ken iti sumaganad ti dadduma a singasing dagitoy a panglakayen. (Prov. 15:22) Kadagitoy nga artikulo, maawagan ti panglakayen a mangisursuro kas “mangsansanay” ket dagiti masursuruan kas “masansanay.”

12. Ania ti masapul nga aramiden ti maysa a manangsanay, ken apay?

¹² Ti mangsanay masapul nga isaganana ti puso ti sanayenna. No kasano a ti maysa a hardinero masapul nga isagana wenno sukayenna ti daga sakbay nga agmula, ti maysa a mangsanay masapul met a paregtaen wenno isaganana ti puso ti sanayenna sakbay a suruanna. Kasanona a maaramidan dayta? Mabalinna a tuladen ti pamay-an ti maysa a nagkauna a propeta.

13-15. (a) Ania nga annongen ti naited ken propeta Samuel? (b) Kasano nga intungpal dayta ni Samuel? (Kitaen ti ladawan iti rugi ti artikulo.) (c) Apay nga ad-adda a paginteresan dagiti panglakayen ita daytoy a salaysay maipapan ken Samuel?

¹³ Maysa nga aldaw nasurok a 3,000 a tawenen ti napalabas, imbaga ni Jehova iti lakayen a propeta a ni Samuel: “Inton bigat iti agarup kastoy nga oras ibaonkonto kenka ti maysa a lalaki manipud daga ti Benjamin, ket masapul a pulotam kas panguluen iti ilik nga Israel.” (1 Sam. 9:15, 16) Nabigbig ni Samuel a saanton nga isu ti lider ti Israel ken kayat ni Jehova a mangpulot iti mangsuno kenkuana. Mabalin a naisaludsod ni Samuel: ‘Kasanok ngata a maisagana dayta a lalaki para iti annongenna?’ Nakapanunot iti pamay-an ket nagplano.

¹⁴ Iti simmaganad nga aldaw, idi nakita ni Samuel ni Saul, imbaga ni Jehova kenkuana: “Adtoy ti lalaki.” Kalpasanna, intungpal ni Samuel ti planona. Inawisna ni Saul ken ti katulonganna iti maysa a siled a panganan. Pinagtugawna ida iti kasayaatan a pagtugawan, ket indasarna ti kasayaatan a paset ti naparti nga animal sana imbaga: “Kanem, agsipud ta . . . inlasinda dayta maipaay kenka.” Idi agangay, inawis ni Samuel a mapanda iti pagtaenganna, ket nagtungtungtongda bayat a magmagnada. Kayat ni Samuel a gundawayan dagita a relaks a kasasaad. Isu nga idi nakadanondan, inawisna ni Saul iti pangatepan ti balay ket “intultuloyna ti nakisao ken Saul” bayat ti nalamiis a rabii agingga a naturogda. Kabigatanna, pinulotanna ni Saul, inagkanna, ken nangted iti kanayonan nga instruksion. Kalpasanna, pinagawidnan ni Saul​—a nakasaganan iti sumaruno a mapasamak.​—1 Sam. 9:17-27; 10:1.

¹⁵ Siempre, ti panangpulot iti agbalin a lider ti maysa a nasion ket naiduma iti panangsanay iti maysa a kabsat a lalaki nga agbalin a panglakayen wenno ministerial nga adipen iti kongregasion. Nupay kasta, adda dagiti napateg a maadal dagiti panglakayen ita iti inaramid ni Samuel. Usigentayo ti dua kadagita.

SITUTULOK A MANGSANAY KEN AGBALIN A PUDNO A GAYYEM

16. (a) Ania ti narikna ni Samuel idi nagkiddaw ti Israel iti ari? (b) Ania ti kababalin ni Samuel iti panangitungpalna iti annongenna a mangpulot ken Saul?

¹⁶ Situtulok a mangsanay, saan nga agkedked. Idi naammuan ni Samuel a kayat dagiti Israelita ti maaddaan iti ari a tao, nasaktan ken nariknana nga inlaksid dagiti kailianna. (1 Sam. 8:4-8) Kinapudnona, nagkedked a mangaramid iti kiddaw dagiti umili nga uray la namitlo nga imbaga ni Jehova nga imdenganna ida. (1 Sam. 8:7, 9, 22) Nupay kasta, saan nga impalubos ni Samuel nga agsakit ti nakemna iti lalaki a mangsukat kenkuana. Idi imbaga ni Jehova a pulotanna ni Saul, situtulok a nagtulnog ti propeta, saan a gapu laeng ta annongenna dayta no di ket gapu ta ay-ayatenna ni Jehova.

17. Kasano a tultuladen dagiti panglakayen ita ti kababalin ni Samuel, ken ania ti pakaragsakanda?

¹⁷ Kas ken Samuel, dagiti aduan kapadasan a panglakayen ita mangipakpakitada iti nasayaat a kababalin kadagiti sansanayenda. (1 Ped. 5:2) Situtulokda a mangsanay iti sabsabali ken saanda nga agamak a mangipabaklay kadakuada iti dadduma a pribilehioda. Dagiti naayat a panglakayen ibilangda dagiti sansanayenda, saan a kas kakompetensia, no di ket kas ‘katrabahuan’​—kas napateg a sagsagut iti kongregasion. (2 Cor. 1:24; Heb. 13:16) Maragsakan la ketdi dagiti kasta a di managimbubukodan a panglakayen bayat a makitkitada nga us-usaren dagiti sansanayenda dagiti abilidadda agpaay a pakagunggonaan ti kongregasion!​—Ara. 20:35.

18, 19. Kasano a maisagana ti maysa a panglakayen ti puso ti sanayenna, ken apay a nagpateg dayta?

¹⁸ Agbalin a gayyem, saan laeng a manangsanay. Idi nakita ni Samuel ni Saul, mabalin met koma nga inruarna a dagus ti pagkargaan ti lana, imparukpokna ti lana iti ulo ni Saul, sa pinagawidnan ti baro nga ari​—a napulotanen ngem saan pay a nakasagana. Ngem nangiwaya ni Samuel iti tiempo tapno in-inut a maisaganana ti puso ni Saul. Sakbay a pinulotanna ni Saul, nanganda pay iti naimas a taraon, nagpagnapagnada, nagtungtongda iti napaut, ken nakainanada a naimbag. Inuray ni Samuel ti umiso a tiempo a panangpulotna iti baro nga ari.

¹⁹ Kasta met ita, sakbay a mangsanay ti maysa a panglakayen, masapul a pagbalinenna a relaks ti kasasaad ken gayyemenna ti sanayenna. Nagduduma ti pamay-an no kasano a mapatanor dagiti panglakayen ti kasta a panaggayyem, depende iti kasasaad ken kustombre iti pagilianda. Ngem sadinoman ti pagnanaedam, no mangiwayaka iti tiempo para iti sansanayem uray okupadoka, arigna ibagbagam kenkuana, “Napategka kaniak.” (Basaen ti Roma 12:10.) Nupay dimo iyebkas dayta, marikna ken tagipatgen dayta dagiti kakabsat a situtulok nga agsursuro.

20, 21. (a) Ania ti kababalin ti maysa a naballigi a manangsanay? (b) Ania ti mausig iti sumaruno nga artikulo?

²⁰ Laglagipenyo a papanglakayen: Ti naballigi a manangsanay ket saan laeng a maayatan a mangsanay iti sabsabali no di ket ayatenna met ti indibidual a sansanayenna. (Idilig ti Juan 5:20.) No kasta ti kababalin ti panglakayen, dagus a marikna dayta ti sansanayenna ket matignay nga agsursuro. Gapuna, bayat a mangsansanaykayo patgenmi a papanglakayen, saankayo laeng koma nga agbalin a mannursuro​—agbalinkayo pay a gayyem.​—Prov. 17:17; Juan 15:15.

²¹ No naisaganan ti panglakayen ti puso ti sanayenna, mabalinnan a rugian nga isuro kadagiti kasapulanna nga ammuen. Ania dagiti pamay-an a mabalinna nga usaren? Mausig dayta iti sumaruno nga artikulo.

1. (a) Ania ti nabayagen a bigbigen dagiti adipen ti Dios maipapan iti panangsanay, ken kasano a kasta agingga ita? (b) Ania ti usigentayo iti daytoy nga artikulo?

NABAYAGEN a bigbigen dagiti adipen ti Dios a ti pannakasanay ket napateg tapno agballigi. Ni patriarka nga Abram “inurnongna dagiti nasanay a lallakina” tapno isalakanda ni Lot​—ket nagballigida. (Gen. 14:14-16) Idi kaaldawan ni Ari David, dagiti kumakanta iti balay ti Dios ket “nasanay iti kanta ken Jehova” a pakaidaydayawan ti Dios. (1 Cron. 25:7) Ita, makidangdangadangtayo iti naespirituan maibusor ken Satanas ken kadagiti pasurotna. (Efe. 6:11-13) Ikagkagumaantayo met nga aramiden ti amin a kabaelantayo a mangidayaw ken Jehova. (Heb. 13:15, 16) Gapuna, kas kadagiti nagkauna nga adipen ti Dios, masapul a masanaytayo tapno agballigitayo. Iti uneg ti kongregasion, intalek ni Jehova kadagiti panglakayen ti responsabilidad a panangsanay iti sabsabali. (2 Tim. 2:2) Ania dagiti pamay-an nga us-usaren dagiti eksperiensiado a panglakayen a mangsanay kadagiti kakabsat a lallaki tapno makualipikarda a mangaywan iti arban?

PABILGEM TI ESPIRITUALIDAD TI SANSANAYEM

2. Ania ti umuna nga aramiden ti maysa a panglakayen sakbay a suruanna ti sanayenna, ken apay?

² Ti maysa a panglakayen ket mayarig iti maysa a hardinero. Sakbay nga agmula ti hardinero, nalabit kasapulan nga abunuanna ti daga tapno agtubo ken agbalin a nalangto ti mulana. Umasping iti dayta, sakbay a suruam ti maysa a kabsat a lalaki a bassit pay ti kapadasanna, mabalin nga ibasaam kadagiti teksto ti Biblia a mangparegta kenkuana a mangyaplikar kadagiti masursurona.​—1 Tim. 4:6.

3. (a) Kasano nga usaren ti maysa a panglakayen ti sasao ni Jesus iti Marcos 12:29, 30 iti pannakisaritana iti sansanayenna? (b) Ania ti mabalin nga epekto ti kararag ti maysa a panglakayen iti sansanayenna?

³ Tapno maammuam no kasano kauneg ti pannakairamut ti kinapudno iti puso ti sansanayem, mabalin a damagem kenkuana, ‘Ania ti epektona kadagiti desisionmo ti panagdedikarmo ken Jehova?’ Ti kasta a saludsod ket mabalin a mangiturong iti panagsaritayo no kasano ti agserbi ken Jehova iti amin a kararua. (Basaen ti Marcos 12:29, 30.) Mabalin nga ingudom ti kasta a saritaan babaen ti kararag, a kiddawem ken Jehova nga ipaayna ti nasantuan nga espirituna iti kabsat a sansanayem. Sigurado a mapabileg no mangngegna ti naimpusuan a kararagmo para kenkuana!

4. (a) Mangted kadagiti salaysay iti Biblia a makatulong iti naespirituan nga irarang-ay ti masansanay. (b) Ania ti kalat dagiti panglakayen no mangsansanayda?

⁴ Iti umuna a paset ti panangsanay, pagsaritaanyo ti dadduma a salaysay iti Biblia a makatulong iti sansanayem tapno makitana ti kinapateg ti panagbalin a situtulok, mapangnamnamaan, ken napakumbaba. (1 Ar. 19:19-21; Neh. 7:2; 13:13; Ara. 18:24-26) Kasapulan ti masansanay dagita a kualidad no kasano a ti daga kasapulanna ti abono. Dagita a kualidad ti mangpapartak iti naespirituan nga irarang-ayna. Kuna ti maysa a panglakayen a taga-France a ni Jean-Claude: “Ti kangrunaan a kalatko ket ti panangtulongko a tumibker ti espiritualidad ti sansanayek. Mangsapulak kadagiti gundaway a mabalinmi ti agbasa iti espesipiko a teksto tapno ‘maluktan ti matana’ kadagiti ‘nakaskasdaaw a bambanag’ iti Sao ti Dios.” (Sal. 119:18) Ania pay ti dadduma a pamay-an a mapabilegmo ti sansanayem?

GUTUGOTEM A MAADDAAN ITI KALAT​—ILAWLAWAGMO NO APAY A NAPATEG

5. (a) Ania ti maitulong ti panangsaludsod iti masansanay no ania dagiti naespirituan a kalatna? (b) Apay a napateg a sanayen dagiti panglakayen dagiti kakabsat a lallaki bayat nga agtutuboda pay? (Kitaen ti footnote.)

⁵ Isaludsodmo iti sansanayem, ‘Ania dagiti naespirituan a kalatmo?’ No awan ti maibagana, tulongam a mangaramid iti realistiko a kalat a kabaelanna a ragpaten. Sirarayray nga estoriaem ti maysa kadagiti naespirituan a kalatmo ken ti nariknam a ragsak idi naragpatmo dayta. Simple laeng dayta a pamay-an ngem epektibo. Malagip ni Victor a maysa a panglakayen ken payunir iti Africa: “Idi agtutuboak pay, adda panglakayen a nagsalsaludsod kaniak no ania dagiti kalatko. Pinagpanunotnak dagiti saludsodna ket inrugik a seriosuen ti ministeriok.” Ipagpaganetget met dagiti eksperiensiado a panglakayen a napateg a sanayen dagiti kakabsat a lallaki bayat ti kinaagtutuboda​—uray no katitin-edyerda pay laeng​—babaen ti panangitedda iti dadduma a trabaho iti kongregasion a maibagay iti edadda. Makatulong ti kasta a nasapa a pannakasanay tapno maipamaysa dagiti agtutubo a ragpaten dagiti naespirituan a kalatda bayat nga agmatmataenganda ken adun ti pakasingaanda.​—Basaen ti Salmo 71:5, 17.a

6. Ania a napateg a pamay-an ti inusar ni Jesus iti panangsanayna iti sabsabali?

⁶ Tapno maaddaan ti sansanayem iti tarigagay nga agserbi, saanmo laeng nga ilawlawag no ania ti aramidenna no di ket ilawlawagmo met no apay a napateg dayta. No kasta ti aramidem, tultuladem ti Naindaklan a Mannursuro, ni Jesus. Kas pagarigan, sakbay nga imbilinna kadagiti apostolna nga agaramidda iti ad-adalan, imbagana kadakuada no apay a nasken nga agtulnogda. Kinunana: “Isuamin nga autoridad naiteden kaniak idiay langit ken ditoy daga.” Sana imbaga: “Inkayo ngarud ket mangaramidkayo iti ad-adalan kadagiti tattao iti amin a nasion.” (Mat. 28:18, 19) Kasanom a matulad ti pamay-an ni Jesus a mangsanay?

7, 8. (a) Kasano a matulad ita dagiti panglakayen ti pamay-an ni Jesus a mangsanay? (b) Kasano kapateg ti panangkomendar kadagiti masansanay? (c) Ania dagiti singasing a makatulong kadagiti panglakayen a mangsanay iti sabsabali? (Kitaen ti kahon a “No Kasano a Sanayen ti Sabsabali.”)

⁷ Ilawlawagmo iti sansanayem ti Nainkasuratan a rason no apay a napateg ti annongen a naited kenkuana. Iti kasta a pamay-an, masursuruam nga agpanunot maitunos kadagiti prinsipio ti Biblia. Kas pagarigan, imbagam iti maysa a kabsat a lalaki a dalusanna ti pagserkan ti Kingdom Hall ken siguraduenna a natalged a pagnaan. Mabalin nga ipabasam ti Tito 2:10 ken ilawlawagmo no kasano a ti panangmantener iti Kingdom Hall ‘maarkosanna ti sursuro ti Manangisalakantayo, ti Dios.’ Ibagam met a panunotenna no kasano a magunggonaan dagiti lallakay ken babbaket iti kongregasion gapu iti panangitungpalna iti annongenna. Makatulong ti kasta a pannakisarita tapno ad-adda a maseknan iti pagimbagan ti sabsabali imbes nga iti paglintegan. Maragsakanto a makakita a magunggonaan dagiti kakabsat iti kongregasion iti panangitungpalna iti annongenna.

⁸ Kanayonanna, dimo liplipatan a komendaran ti sansanayem iti panagreggetna a mangyaplikar kadagiti singasingmo. Kasano kapateg dayta? No kasano a makatulong ti danum iti idadakkel ti mula, makatulong met ti naimpusuan a panangkomendarmo iti irarang-ay ti sansanayem.​—Idilig ti Mateo 3:17.

SABALI PAY A KARIT

9. (a) Ania a karit ti pakaipaspasanguan dagiti panglakayen iti nababaknang a pagilian? (b) Apay a saan nga inyun-una ti dadduma nga agtutubo a lallaki ti panagserbi iti Dios?

⁹ Mabalin a marigatan dagiti panglakayen iti nababaknang a pagilian a mangparegta kadagiti bautisado a kakabsat a lallaki nga agtawenen iti nasurok a 20 wenno 30 a makipaset kadagiti aktibidad ti kongregasion. Dinamagmi kadagiti eksperiensiado a panglakayen iti agarup 20 a pagilian iti Laud no apay nga agkedked ti dadduma nga agtutubo a lallaki nga umawat iti pribilehio iti kongregasion. Kastoy ti kaaduan a sungbatda: Saan a naiparegta kadagitoy nga agtutubo idi ubbingda pay a maaddaanda kadagiti naespirituan a kalat. Kinapudnona, adda dagiti agtutubo a mayat a rumagpat kadagiti naespirituan a kalat ngem imparegta met dagiti nagannakda dagiti sekular a kalat. Saan nga inyun-una dagitoy nga agtutubo ti panagserbi iti Dios.​—Mat. 10:24.

10, 11. (a) Kasano nga in-inut a matulongan ti maysa a panglakayen ti maysa a kabsat a mangbalbaliw iti panangmatmatna? (b) Ania dagiti teksto a mabalin nga ibasa ti maysa a panglakayen iti dayta a kabsat, ken apay? (Kitaen ti footnote.)

¹⁰ No kasla saan nga interesado nga agserbi iti kongregasion ti maysa a kabsat a lalaki, mabalin a kasapulam ti panagregget ken panagan-anus tapno mabaliwan ti panangmatmatna. No kasano a maatur ti maysa a hardinero ti panagdakkel ti mula babaen ti in-inut a panangilintegna kadagiti sangana, mabalinmo met nga in-inut a matulongan ti maysa a kabsat a lalaki a mangbalbaliw iti panangmatmatna kadagiti pribilehio. Kasano?

¹¹ In-inut a gayyemem dayta a kabsat. Ipariknam a kasapulan isuna ti kongregasion. Kalpasanna, pasaray pagsaritaanyo ti sumagmamano a teksto ken tulongam a mangusig iti dedikasionna ken Jehova. (Ecl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5) Mabalin nga isaludsodmo, ‘Ania ti inkarim ken Jehova idi indedikarmo ti bagim kenkuana?’ Tignayem ti pusona babaen ti panangisaludsodmo, ‘Ania ngata ti narikna ni Jehova idi nagbautisarka?’ (Prov. 27:11) ‘Ania ngata met ti narikna ni Satanas?’ (1 Ped. 5:8) Dakkel ti epektona iti dayta a kabsat ti panangibasam kadagiti napili a teksto ti Biblia.​—Basaen ti Hebreo 4:12.b

DAKAYO A MASANSANAY, IPAKITAYO A MATALEKKAYO

12, 13. (a) Ania ti kababalin ni Eliseo kas maysa a masansanay? (b) Kasano a ginunggonaan ni Jehova ti kinamatalek ni Eliseo?

¹² Dakayo nga agtutubo a lallaki, kasapulan ti kongregasion ti tulongyo! Ania a kababalin ti kasapulanyo tapno naballigi ti panagserbiyo ken Jehova? Ammuentayo ti sungbat babaen ti panangusigtayo iti kapadasan ti maysa idi a masansanay.

¹³ Agarup 3,000 a tawenen ti napalabas, inawis ni propeta Elias ti agtutubo pay idi a ni Eliseo nga agbalin a katulonganna. Dagus nga immanamong ni Eliseo ken simamatalek a nagserbi ken Elias babaen ti panangaramidna kadagiti nanumo a trabaho. (2 Ar. 3:11) Kalpasan ti agarup innem a tawen a pannakasanay ni Eliseo, naammuanna a dandanin agpatingga ti panagserbi ni Elias kas propeta ti Israel. Imbaga ni Elias a saanen a kumuyog kenkuana ni Eliseo. Ngem namitlo nga imbaga ni Eliseo: “Saankanto a panawan.” Desidido a kumadua ken Elias agingga a kabaelanna. Ginunggonaan ni Jehova ti kinasungdo ken kinamatalek ni Eliseo babaen ti panangipalubosna a maimatanganna ti nakaskasdaaw nga ipapanaw ni Elias.​—2 Ar. 2:1-12.

14. (a) Kasano a matulad dagiti masansanay ita ni Eliseo? (b) Apay a nakapatpateg nga agbalin a matalek ti maysa a masansanay?

¹⁴ Kasanom a matulad ni Eliseo? Dagus nga awatem dagiti annongen a maited kenka, uray dagiti nanumo. Ibilangmo kas gayyem ti panglakayen a mangsansanay kenka, ken ipakitam nga ap-apresiarem ti panagreggetna a tumulong. No kasta ti aramidem, arigna ibagbagam kenkuana: “Saankanto a panawan.” Kangrunaan iti amin, agbalinka a matalek iti aniaman a trabaho a maited kenka. Apay a nakapatpateg dayta? No ngamin matalek ken mapangnamnamaanka, masigurado dagiti panglakayen a kayat ni Jehova a maitalek kenka ti ad-adu pay a responsabilidad iti kongregasion.​—Sal. 101:6; basaen ti 2 Timoteo 2:2.

RAEMEM DAGITI EKSPERIENSIADO A PANGLAKAYEN

15, 16. (a) Kasano nga impakita ni Eliseo ti panagraemna iti nangsanay kenkuana? (Kitaen ti ladawan iti rugi ti artikulo.) (b) Apay a nagtalek ken Eliseo dagiti padana a propeta?

¹⁵ Ipakita met ti salaysay maipapan ken Eliseo a napateg ti panangraem kadagiti eksperiensiado a panglakayen. Kalpasan a binisita da Elias ken Eliseo ti maysa a grupo dagiti propeta idiay Jerico, nagnagnada a napan iti Karayan Jordan. Idi kuan, “innala ni Elias ti opisial a kawesna ket linukotna ket inablatanna ti dandanum, ket in-inut a nabisngayda.” Idi nakaballasiwdan, intultuloyda ti nagsarita bayat a magmagnada. Nalawag a saan a pinanunot ni Eliseo nga ammonan ti amin. Agingga iti ipapanaw ni Elias, impapuso ni Eliseo ti amin nga imbaga ti nangsanay kenkuana. Idi kuan, naipangaton ni Elias babaen ti allawig. Kalpasanna, idi nagsubli ni Eliseo iti igid ti Jordan, inyablatna ti kawes ni Elias iti danum sana impukkaw: “Sadino ti ayan ni Jehova a Dios ni Elias?” Iti kasta, nabisngay manen ti karayan.​—2 Ar. 2:8-14.

¹⁶ Nadlawmo kadi a ti umuna a milagro ni Eliseo ket kapadpada ti maudi a milagro ni Elias? Ania ti maadaltayo iti daytoy? Nalawag a saan a pinanunot ni Eliseo a mabalinnan a balbaliwan a dagus ti taray ti bambanag yantangay sinunuanna metten ni Elias. Imbes ketdi, intultuloyna nga itungpal ti ministeriona sigun iti pamay-an ni Elias kas panagraemna. Gapu iti dayta, nagtalek kenkuana dagiti padana a propeta. (2 Ar. 2:15) Ngem idi agangay, bayat ti 60 a tawen a panagserbi ni Eliseo kas propeta, inikkan ni Jehova iti pannakabalin a mangaramid iti ad-adu a milagro ngem iti naaramidan ni Elias. Ania ti masursurom iti daytoy kas maysa a masansanay?

17. (a) Kasano a matulad ita dagiti masansanay ti kababalin ni Eliseo? (b) Ania ti mabalin a pangusaranto ni Jehova kadagiti matalek a masansanay?

¹⁷ Dimo koma panunoten nga apaman a maikkanka iti responsabilidad iti kongregasion, mabalinmon a naan-anay a balbaliwan ti taray ti bambanag. Laglagipem a masapul laeng ti panagbalbaliw no talaga a kasapulan ti kongregasion ken no imbilin dayta ti organisasion ni Jehova, saan laeng a gapu ta kayatmo. Gapu ta tinulad ni Eliseo dagiti pamay-an ni Elias, nagtalek kenkuana dagiti padana a propeta ken naipakitana a raraemenna ti sinunuanna. Kasta met, no itultuloymo a tuladen ti naibatay-Biblia a pamay-an dagiti mangsansanay kenka, agtalekto kenka dagiti kapammatiam ken maipakitam a raraemem dagiti eksperiensiado a panglakayen. (Basaen ti 1 Corinto 4:17.) Ngem, bayat nga umad-adu ti kapadasam, manamnamam a karamankanto a mangipatungpal kadagiti panagbalbaliw a makatulong iti kongregasion a makidanggay iti rumangrang-ay nga organisasion ni Jehova. Kinapudnona, kas ken Eliseo, mabalin nga usarennakanto ni Jehova a mangaramid iti ad-adu a banag ngem iti naaramidan dagiti nangsanay kenka.​—Juan 14:12.

18. Apay a nakapatpateg ita ti panangsanay kadagiti kakabsat a lallaki iti kongregasion?

¹⁸ Sapay koma ta dagiti singasing iti daytoy nga artikulo ken iti napalabas ti mangtignay iti adu a panglakayen a mangiwaya iti tiempoda a mangsanay iti sabsabali. Sidadaan met koma dagiti kualipikado a kakabsat a lallaki a mangawat iti kasta a panangsanay ken usarenda dayta a tumulong a mangaywan kadagiti karnero ni Jehova. Iti kasta, bumileg dagiti kongregasion iti intero a lubong ken matulongan ti tunggal maysa nga agtalinaed a matalek iti um-umayen a napeggad a tiempo.