“No Dadduma Pagarupek nga Agar-arapaapak!”
Nakatan-aw ni Lourdes iti siudad manipud iti tawa ti apartment-na, a nakaapput ti imana iti agpigpigerger a ngiwatna. Isut’ babai a taga Latin America a kinabkabil ti naranggas nga asawana a ni Alfredo iti nasurok a 20 a tawen. Natignay nga agbalbaliw ni Alfredo. Ngem marigatan pay laeng ni Lourdes a mangestoria iti inibturanna a pisikal ken emosional a rigat.
“Nangrugi dayta dua a lawas laeng kalpasan ti panagkasarmi,” siaalumamay a kinuna ni Lourdes. “Naminsan pinusina ti dua a ngipenko. Iti sabali a gundaway, nagrukobak, ket nadanogna ti aparador. Ngem nasasaem pay ti panangbirngasna. Inawagannak iti ‘awan mamaayna a basura’ ket trinatonak a kasla kuneng. Kayatko idi ti pumanaw, ngem kasano koma idinto ta adda tallo nga annakko?”
Sidudungngo nga inaprosan ni Alfredo ti abaga ni Lourdes. “Nangatngato ti adalko,” kunana. “Nabainanak idi pinaayabannak ti korte ket imbagada a salaknibanda gapu iti panangkabkabilko kenkuana. Inkagumaak ti agbalbaliw, ngem di nagbayag kasta manen ti inaramidko.”
Kasano a nagbalbaliw? “Ti babai iti tiendaan idiay kanto ket maysa kadagiti Saksi ni Jehova,” kuna ni Lourdes, a madlaw a nabang-aranen. “Intukonna a tulongannak a mangtarus iti Biblia. Naammuak nga ipatpateg ni Jehova a Dios dagiti babbai. Rinugiak ti tumabuno kadagiti gimong dagiti Saksi ni Jehova, uray no makapungtot ni Alfredo idi damo. Idi laeng a mapadasak ti makitimpuyog kadagiti gagayyem idiay Kingdom Hall. Nasdaawak a nakaammo a mabalin a maaddaanak a mismo iti patpatien, iyebkasko dagitoy a siwayawaya, ken isurok pay ida iti sabsabali. Nabigbigko nga ipatpategnak ti Dios. Daytoy ti nangpatured kaniak.
“Diak pulos malipatan dayta a panagbalbaliw. Makimismisa pay laeng idi ni Alfredo iti simbaan dagiti Katoliko kada Domingo, ket laplapdannak a makikadua kadagiti Saksi ni Jehova. Pinerrengko ket kinunak a siaalumamay ngem buyogen ti kinatibker: ‘Alfredo, agduma ti pampanunotenta.’ Ket dinak kinabil! Di nagbayag kalpasanna, nabautisaranak, ket dinakon kinabil iti las-ud ti lima a tawen nanipud idi.”
Ngem adda pay dakdakkel a panagbalbaliw. Inlawlawag ni Alfredo: “Kalpasan ti tallo a tawen a pannakabautisar ni Lourdes, inawisnak ti katrabahuak a maysa a Saksi ni Jehova iti balayna, ket inlawlawagna dagiti makaay-ayo a banag manipud iti Biblia. Nupay diak imbagbaga ken baketko, rinugiak ti nagpayadal iti Biblia kenkuana. Di nagbayag kuykuyogekon ni Lourdes kadagiti gimong. Maipapan iti pamilia ti adu kadagiti palawag a nangngegko sadiay, ket masansan a mababainak gapu kadagitoy.”
Nagustuan ni Alfredo ti pannakakitana kadagiti miembro ti kongregasion, agraman kadagiti lallaki nga agsagsagad iti suelo kalpasan dagiti gimong. Idi bimmisita kadagiti pagtaenganda, nakitana a tumultulong dagiti assawa a lallaki iti panaginnaw dagiti assawada. Dagitoy a simple a kasasaad ti nangiparikna ken Alfredo no kasano nga agtignay ti pudno nga ayat.
Di nagbayag kalpasanna, nabautisaran ni Alfredo, ket ita agserserbidan nga agassawa kas amin-tiempo a ministro. “Masansan a tulongannakon nga agkalunkon kalpasan ti pannangan ken mangurnos kadagiti kama,” kuna ni Lourdes. “Komendaranna ti panaglutok, ket palubosannak nga agpili—kas koma iti musika a denggek wenno kadagiti gatangek a para iti balay. Ita pay laeng nga inaramid ni Alfredo dagitoy! Itay nabiit pay, iti damo unay a gundaway, inggatangannak iti maysa a bugkong ti sabsabong. No dadduma pagarupek nga agar-arapaapak!”
[Ladawan iti panid 10]
“Nabigbigko nga ipatpategnak ti Dios. Daytoy ti nangpatured kaniak”
[Ladawan iti panid 10]
Nagustuan ni Alfredo ti pannakakitana kadagiti miembro ti kongregasion, agraman kadagiti lallaki, nga agsagsagad iti suelo kalpasan dagiti gimong
[Ladawan iti panid 10]
Nakitana a tumultulong dagiti assawa a lallaki iti panaginnaw dagiti assawada
[Ladawan iti panid 10]
“Itay nabiit pay, iti damo unay a gundaway, inggatangannak iti maysa a bugkong ti sabsabong”