Pakasarakan Kadagiti Sungbat?

Kasta ti iyim-imtuod ti adu iti kaaldawantayo. Kinuna ti maysa a maestra idiay Novosibirsk, Russia, a saan a nalaka ti agsapul kadagiti sungbat ti salsaludsod nga iyim-imtuod dagiti estudiantena maipapan iti Dios ken relihion. Kastoy ti inlawlawagna iti suratna:

“Iti naminsan a panagawidko idiay balay, nakakitaak iti bassit a tract a naibati sadiay a napauluan ‘No Apay a Mapagtalkanyo ti Biblia.’ Historia ti isursurok idiay eskuelaan, ket masansan a pagsasaritaanmi kadagiti estudiante dagiti suheto a kas ti relihion, Biblia, ken Dios. No dadduma, nagrigat ti agsapul kadagiti sungbat iti salsaludsod dagiti ubbing.

“Iti napalpalabas, impagarupko nga umadani laeng ti tattao iti Dios no adda problemada. Ngem ita masiguradokon a saan a kanayon a kasta. Mabalin met nga iyimtuod ti maysa a tao ti: ‘Apay a napasamak daytoy kaniak? Siasinoak? Nagtaudak? Papanak inton matayak?’ Napateg a maammuan dagiti sungbat kadagitoy a saludsod. Kasla mangted ti Biblia kadagiti makakombinsir nga argumento.”

Inngudo ti maestra: “Nagsuratak agsipud ta kayatko a maammuan ti ad-adu pay maipapan iti Biblia ken iti Dios.”

Isursuro dagiti Saksi ni Jehova kadagiti tattao a makaipaay ti Biblia iti sungbat dagiti saludsodda. Amirisem ti libro a Pannakaammo a Mangiturong iti Biag nga Agnanayon. Karaman iti 19 a kapitulona dagiti napauluan iti: “Siasino ti Pudno a Dios?,” “Apay a Lumakay ken Mataytayo?,” ken “Apay nga Ipalubos ti Dios ti Panagsagaba?” Mabalinmo ti agkiddaw iti kopia daytoy 192 ti panidna a katulongan iti panagadal iti Biblia babaen ti panangsuratmo iti naipakuyog a kahon ket ibusonmo dayta iti nadakamat nga address wenno iti maitutop nga address nga adda iti panid 5 daytoy a magasin.

□ Patulodandak iti libro a Pannakaammo a Mangiturong iti Biag nga Agnanayon.

□ Interesadoak iti libre a panagadal iti Biblia iti pagtaengan.