Debate a Naipabuya iti Telebision Maipapan Kadagiti Saksi ni Jehova
Kabayatan ti 2000 ken 2001, adda naisayangkat a panangbusor kadagiti Saksi ni Jehova idiay pagilian ti Georgia, a dati a republika ti Union Soviet. Impabuya ti maysa a nalatak nga estasion ti telebision idiay Georgia ti panagdebate ti maysa a politiko a nangkiddaw a maparitan dagiti Saksi, ken ti maysa a propesor, a dinutokan ti korte a mangsukimat a naan-anay iti literatura dagiti Saksi.
Kas panangsungbat ti propesor iti nakaad-adu nga akusasion maipapan iti patpatien dagiti Saksi, imbagana nga “awan ti nakaibasaran” dagiti pammabasol ti politiko. Kalpasanna, kinuna ti propesor: “Adtoy ti patpatien dagiti Saksi ni Jehova,” bayat nga intag-ayna ti libro a Pannakaammo a Mangiturong iti Biag nga Agnanayon tapno makita dagiti agbuybuya iti telebision.
Kalpasanna, binasa ti propesor ti umuna a parapo ti libro, a nagngudo iti sasao a: “Nupay kasta, kadagiti adu, kasla napno ti biag kadagiti nakaro a parikut. No mapaspasaranyo dayta, papigsaenyo ti nakemyo.”
Isuro daytoy a publikasion dagiti sungbat ti Biblia kadagiti iyim-imtuod ti adu a tattao. Kas pagarigan, karaman kadagiti titulo dagiti kapitulo ti: “Siasino ti Pudno a Dios?,” “Apay a Lumakay ken Mataytayo?,” ken “Apay nga Ipalubos ti Dios ti Panagsagaba?”
Kayatmo kadi ti maaddaan iti daytoy 192 ti panidna a libro tapno masukimatmo a mismo? Mabalinmo ti agkiddaw babaen ti panangsuratmo iti naipakuyog a kahon ken panangibusonmo iti dayta iti naipaay nga address wenno iti maitutop nga address a nailista iti panid 5 daytoy a magasin.
□ Patulodandak iti libro a Pannakaammo a Mangiturong iti Biag nga Agnanayon.
□ Interesadoak iti libre a panagadal iti Biblia.