Manakem nga Ina

Ti maysa a manakem nga ina ken maseknan kadagiti kasapulan ti annakna ket agregget a mangipaay kadakuada iti nasustansia a pisikal a taraon. Ipakpakitana ti isu met laeng a kinagaget babaen ti panangipaayna iti naespirituan a taraon.

Nabiit pay a nagsurat ti maysa a babai a taga Brazil iti sanga nga opisina dagiti Saksi ni Jehova iti dayta a pagilian tapno iyebkasna ti panangapresiarna iti publikasion nga Ania ti Kalikaguman ti Dios Kadatayo? Kastoy ti insuratna: “Ti broshur pinaragsaknak unay. Idi nakitak ti leksion maipapan kadagiti aramid a di anamongan ti Dios, dagus a napanunotko a rumbeng nga iranudko daytoy napateg nga impormasion kadagiti annakko a dua a babbai nga agtawen iti 10 ken 11, ken iti 5 ti tawenna nga anakko a lalaki.” Innayonna: “Anian ti kinapateg ti maaddaan iti literatura a kas iti daytoy tapno maisurok ti daldalan ti Dios iti pamiliak!”

Nagkiddaw met iti dadduma pay a publikasion a naibasar iti Biblia. No kayatmo met ti maaddaan iti naespirituan a taraon nga agpaay kadakayo a sangapamiliaan, mabalinmo ti agkiddaw iti kopia ti Ania ti Kalikaguman ti Dios Kadatayo? Suratam laeng ti kupon iti baba ken ibusonmo dayta iti adres a makita iti kupon wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti broshur nga Ania ti Kalikaguman ti Dios Kadatayo?

□ Interesadoak iti libre a panagadal iti Biblia.