Ti Aya Panagkabbalay ti Nasayaat a Pundasion ti Panagasawa?
TI LALAKI ken babai nga agkabkabbalay a dida pay nagkasar ket “gagangayen kadagiti nabaknang a kagimongan iti intero a lubong,” kuna ti Journal of Marriage and Family. Kasta met nga “ibilang ti agarup 50 a porsiento kadagiti agkabkabbalay a ti panagkabbalay ket maysa a pamay-an tapno matingiting no agkatunosanda sakbay nga agkasarda.” No kasta, daytoy nga urnos “ti mangpukaw koman kadagiti di panagkatunosan ken pagbalinenna a nalaglagda ti panagasawa,” kuna ti Journal.
“Ngem ti ebidensia ipasimudaagna ti kasumbangir dayta,” intuloy ti Journal. “Kadagiti kasado, ti panagdenna sakbay ti kasar ket agtungpal iti saan unay a makapnek a panagasawa, basbassit a tiempo nga agkaduada kadagiti aktibidad a kaay-ayoda a dua, nakarkaro ti dida panagkatunosan, saan unay a panaginnandingay, ken masansan a pannakapaay a mangrisut kadagiti parikutda, [ken] ad-adu a damag maipapan kadagiti parikut ti panagasawa . . . No idilig met kadagiti nagkasar nga umuna, dakdakkel ti risgo nga agsina [wenno agdiborsionto] dagiti nagkabbalay nga umuna.”
Kas ipakita daytoy a panagadal, talaga a di nainsiriban ti kasla nainsiriban iti panangmatmat ti tao. Ipaganetget daytoy ti kinapudno ti nailanad iti Jeremias 10:23: “Saan a kukua ti tao a magmagna . . . uray ti panangiturong iti addangna.” Anian nga ad-adda a nainsiriban ti agpaiwanwan iti Sao ti Dios a ti Biblia, a mangipaay iti nagadu a nagsayaat a pammalakad maipapan iti panagasawa! (2 Timoteo 3:16) Kas pagarigan, no maipapan iti panagasawa, kuna ti Biblia: “Ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.”—Genesis 2:24; Mateo 19:5.
No ipangagmo dayta a nadiosan a balakad, imbes a surotem ti adda pakapilawanna ken agkarabaliw a panagrasrason ti tao, dakdakkel ti posibilidad a maaddaanka iti pudno a naragsak ken manayon a panagasawa.—Proverbio 3:5, 6.