Panangmatmat iti Lubong

◼ Itay napan a tawen “ti nairekord a kapupudotan a paniempo iti makin-amianan a kagudua ti daga” ket “maikadua a tawenen a kasta ti kasasaad iti intero a lubong. Walo iti 10 a kapupudotan [pay laeng] a tawen ti napasamak iti napalabas a dekada.”​—BBC NEWS, BRITANIA.

◼ Dagiti bagyo idiay Atlantico idi 2005 ti “kapigsaan” ken “di mapagduaduaan a . . . kakaruan [pay laeng] ti panangdadaelda.” Napigpigsa ngem 177 a kilometro iti kada oras ti angin ti 7 iti tunggal 14 a bagyo a nairekord.​—U.S. NATIONAL OCEANIC AND ATMOSPHERIC ADMINISTRATION.

◼ “Idi 1850, nasurok a 150 ti glacier idiay Glacier National Park ti Montana [E.U.A.]. Ita, 27 laengen.”—THE WALL STREET JOURNAL, E.U.A.

◼ “Ti agdadata a kinapudno maipapan iti plano dagiti gobierno maipapan iti panagbalbaliw ti paniempo ket, awan ti pagilian a mayat a mangsolbar iti dayta a parikut no dagiti solusion pakapuyenda ti ekonomiana.”—TONY BLAIR, PRIMERO MINISTRO TI BRITANIA.

“Agbalaybalay” Dagiti Katoliko?

Sigun ken Cláudio Hummes, arsobispo ti São Paulo, no idilig iti intero a populasion ti Brazil, bimmassit ti bilang dagiti Katoliko sadiay. Iti napalabas a 14 a tawen, manipud iti dati a 83 a porsiento, nagbalin laengen nga 67 a porsiento. Sigun iti arsobispo, “gapu iti nadumaduma a rason, saan ngamin a kabaelan [ti simbaan] nga ikasaba ti ebanghelio kadagiti nabuniagan a miembrona.” Kinuna ni Hummes: “Masapul a mapantayo kadagiti matalek, agbalaybalaytayo, mapantayo kadagiti eskuelaan, institusion, ken saan laeng a kadagiti parokia.” Sigun iti Folha Online, daytoy a trabaho ket rumbeng nga aramiden dagiti laigo a nasanay kas misionero. Ti bumasbassit a bilang ti papadi ti maysa kadagiti kadakkelan a parikut ti Iglesia Katolika idiay Brazil ken iti dadduma pay a paset ti intero a Latin America.

Legal a Pannakabigbig Idiay Alemania

Iti maysa a desision a naipablaak idi Pebrero 10, 2006, ti Federal Administrative Court idiay Leipzig, Alemania, imbilinna iti Gobierno ti Berlin a masapul a bigbigenna ti Narelihiosuan nga Asosasion Dagiti Saksi ni Jehova iti Alemania kas maysa a pangpubliko a korporasion. Daytoy ti namagpatingga iti 15 a tawen ti kabayagnan a legal a panangirupir. Kabayatan dagita a tawen, ti kaso ket rinepaso ti nadumaduma a korte idiay Alemania, agraman ti Federal Constitutional Court. Kas maysa a pangpubliko a korporasion, ti Narelihiosuan nga Asosasion Dagiti Saksi ni Jehova iti Alemania ket maikari a di agbayad iti buis ken maipaayan kadagiti kalintegan a tagtagiragsaken dagiti dadakkel a narelihiosuan a denominasion iti dayta a pagilian.

Adikto Dagiti Agtutubo a Tsino Kadagiti Ay-ayam iti Internet

“Kadagiti agtutubo a Tsino, umad-adu ti adikto kadagiti ay-ayam iti Internet,” kinuna ti South China Morning Post idiay Hong Kong. Nabatad met dayta kadagiti ubbing iti dadduma a paset ti Daya, kas iti Hong Kong, Japan, ken Republika ti Korea. Kinuna ti periodiko: “Ti napalaus a tarigagay a manglukat iti Internet tapno agay-ayam ken din ikankano ti asinoman nga adda iti aglawlawda ti mangipasimudaag iti dakes a reaksionda maibusor iti panangkontrol ti kagimongan kadagiti ubbing. Ti nangato unay a namnamaen dagiti nagannak kadagiti annakda agraman ti agresibo a kompetision a makualipikar nga ageskuela iti unibersidad ti makagapu iti daytoy.” Mapattapatta nga agingga iti innem a milion a Tsino nga ubbing ti agkasapulan iti tulong tapno maisardengda daytoy a pannakaadiktoda.