Agimtuod Dagiti Agtutubo

Kasapulak Kadi Dagiti Nasaysayaat a Gagayyem?

“No makaungetak, kasapulak ti maysa a pangyebkasak iti riknak. No nalidayak, kayatko nga adda mangliwliwa kaniak. No naragsakak, kayatko nga adda koma makipagragsak kaniak. Ibilangko a napateg dagiti gagayyem.”—Brittany.

NO KASANO a kasapulan dagiti ubbing ti kaay-ayam, dagiti agtutubo kasapulanda met ti gagayyem. Ngem ania ti nagdumaan dagita?

Ti kaay-ayam ket maysa a naynay a kalanglangenmo.

Ti gayyem ket maysa a kapadam ti prinsipiona.

Kanayonanna, ibaga ti Biblia a “ti pudno a kadua agayat iti isuamin a tiempo, ken ti kabsat a mayanak no adda rigat.” (Proverbio 17:17) Mabalin a tuktukoyen dayta ti kita ti panaggayyem a napatpateg ngem iti basta kaay-ayam!

Ti agpayso: Bayat nga agmatmataenganka, kasapulam dagiti gagayyem nga

(1) Addaan kadagiti matarigagayan a galad.

(2) Agbibiag maitunos kadagiti mapagwadan a pagalagadan.

(3) Addaan iti nasayaat nga impluensia kenka.

Saludsod: Kasano a maammuam no kasta dagiti gagayyemmo? Saggaysaentayo nga usigen dagita.

Umuna a Kasapulan iti Panaggayyem Matarigagayan a Galad

No ania ti rumbeng a maammuam. Saan nga amin a gagayyem ket pudno a gagayyem. Uray ti Biblia kunaenna nga “adda kakadua nga agannayas a mamagsisina iti maysa ken maysa.” (Proverbio 18:24) Kasla nalabes dagita a sasao. Ngem usigem: Naaddaanka kadin iti “gayyem” a nanggundaway iti panaggayyemyo? Wenno nalabit a nangpadpadakes wenno nagiwaras iti di umiso maipapan kenka? Dagiti kasta a kapadasan ti mabalin a mangikkat iti panagtalekmo.a Kanayon a laglagipem a nasaysayaat ti maaddaan iti manmano a pudno a gagayyem ngem iti adu a saan a nasayaat a gagayyem!

No ania ti mabalinmo nga aramiden. Piliem kas gagayyem dagiti addaan iti mapagwadan a galad.

“Nagsayaat ti panangmatmat dagiti tattao iti gayyemko a ni Fiona. Kasta koma met ti maibagada maipapan kaniak. Kayatko ti maaddaan iti kasta a reputasion. Para kaniak, matarigagayan dayta.”—Yvette, 17.

Padasem daytoy.

1. Basaem ti Galacia 5:22, 23.

2. Iyimtuodmo iti bagim, ‘Iparparangarang kadi dagiti gagayyemko dagiti galad a mangbukel iti “bunga ti espiritu”?’

3. Ilistam iti baba ti nagan dagiti kasingedan a gagayyemmo. Isuratmo iti abayna ti kababalin a maitutop a mangdeskribir iti dayta nga indibidual.

Nagan Kababalin

․․․․․ ․․․․․

․․․․․ ․․․․․

․․․․․ ․․․․․

Singasing: No bin-ig a negatibo a kababalin ti malagipmo maipapan kenkuana, nalabit nasaysayaat a mangbirokkan iti mapagwadan a gagayyem!

Maikadua a Kasapulan iti Panaggayyem-Mapagwadan a Pagalagadan

No ania ti rumbeng a maammuam. No dika agannad, dakdakkel ti posibilidad a makasarakka kadagiti di nasayaat a gagayyem. Kuna ti Biblia: “Daydiay addaan kadagiti pannakilangen kadagidiay maag nakadakdakesto ti pagtungpalanna.” (Proverbio 13:20) Ti termino a “maag” dina tuktukoyen ti tattao a di masirib. Imbes ketdi, dakdakamatenna dagidiay mangilaksid iti umiso a panagrasrason ken mangsalimetmet iti dakes a dana—dagiti kita ti gagayyem a saan a maikari a pakikaduaan!

No ania ti mabalinmo nga aramiden. Imbes nga uray asino lattan ti pakigayyemam, agbalinka koma a napili. (Salmo 26:4) Saan a kayat a sawen dayta nga agbalinka a manangidumduma. Iti daytoy a konteksto, ti panagbalin a napili kaipapananna ti panagbalin nga alerto tapno mailasinmo “ti pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.”—Malakias 3:18.

Saan a mangidumduma ti Dios, ngem pilienna no siasino dagiti awatenna kas ‘sangaili iti toldana.’ (Salmo 15:1-5) Kasta met koma ti aramidem. No agbiagka maitunos kadagiti pagalagadan ti Dios, dakdakkel ti posibilidadna a maam-ammomto dagiti mangikagkagumaan met a mangaramid iti kasta. Inton agangay, isudanto ti agbalin a kasayaatan a gagayyem!

“Agyamanak ta tinulongandak dagiti dadakkelko a makasarak kadagiti gagayyem, dagiti kasadarak a nasayaat ti espiritualidadda.”—Christopher, 13.

Padasem daytoy.

Sungbatam dagiti sumaganad a saludsod:

◼ No kaduak dagiti gagayyemko, masansan kadi a madanaganak amangan no pilitendak nga agaramid iti di umiso?

□ Wen □ Saan

◼ Bumdengak kadi a mangyam-ammo kadagiti gagayyemko amangan no saan ida a magustuan dagiti nagannakko?

□ Wen □ Saan

Singasing: No wen ti sungbatmo kadagita a saludsod, agbirokka kadagiti nasaysayaat a gagayyem. Apay a dimo gayyemen dagidiay in-inauna bassit ngem sika ken dagidiay mapagwadan ti Nakristianuan a panagbiagda?

Maikatlo a Kasapulan iti Panaggayyem-Nasayaat nga Impluensia

No ania ti rumbeng a maammuam. Kuna ti Biblia: “Madadael ti nasayaat a kababalin gapu iti pannakikadua kadagiti dakes a tattao.” (1 Corinto 15:33, Ti Baro a Naimbag a Damag Biblia) Kuna ti agtutubo a ni Lauren: “Inakseptardak dagiti kaeskuelaak idi inaramidko ti aniaman nga imbagada kaniak. Gapu ta awan ti gagayyemko, inkeddengko a tuladen ida tapno akseptarendak.” Napaneknekan ni Lauren a no basta surotem ti an-annuroten ti dadduma, kaska la peon ti chess a mabalinda lattan nga iyakar-akar. Ngem saanka a peon!

No ania ti mabalin nga aramidem. Isardengmon ti makikadua kadagidiay mangpilit kenka a sumurot iti wagas ti panagbiagda. No aramidem dayta, ad-adda a maraemmo ti bagim ken maaddaanka iti gundaway a makabirok kadagiti nasaysayaat a gagayyem—ti kita dagiti gagayyem nga addaan iti nasayaat nga impluensia kenka.—Roma 12:2.

“Nainkalintegan ken mannakaawat ti nasinged a gayyemko a ni Clint. Gapuna, isu ti nagserbi a kangrunaan a pammaregta kaniak.”—Jason, 21.

Padasem daytoy.

Iyimtuodmo iti bagim dagiti sumaganad a saludsod:

◼ Baliwak kadi ti panagkawkawes, panagsasao, ken panagtigtignayko tapno laeng maay-ayok dagiti gagayyemko?

□ Wen □ Saan

◼ Mapmapanak kadin kadagiti lugar a kuestionable iti moral a dati a diak pappapanan no saan a gapu kadagiti gagayyemko?

□ Wen □ Saan

Singasing: No wen ti sungbatmo kadagita a saludsod, agpabalakadka kadagiti dadakkelmo wenno iti aduan kapadasan nga adulto. No maysaka a Saksi ni Jehova, mabalinmo nga asitgan ti maysa a panglakayen ket ibagam kenkuana a kasapulam ti tulong tapno makapilika kadagiti gagayyem a nasayaat ti impluensiada kenka.

Ad-adu pay nga artikulo ti masarakan iti serye nga “Agimtuod Dagiti Agtutubo” iti Web site a www.watchtower.org/ype

[Footnote]

UTOBEM DAGITOY

◼ Aniada a galad ti nangnangruna a magustuam iti maysa a gayyem, ken apay?

◼ Ania a galad ti kasapulan a patanorem tapno agbalinka a nasaysayaat a gayyem?

[Kahon/Dagiti Ladawan iti panid 19]

TI MAKUNA DAGITI KAPATADAM

“Idi insingasing dagiti dadakkelko nga adaywak ti maysa a grupo dagiti gagayyem, kinunak iti bagik nga isuda laeng ti kayatko a pakikaduaan. Nupay kasta, idi rinugiak nga ikabilangan dagiti nasayaat a balakad dagiti nagannakko, naamirisko a mabalinko ti maaddaan iti adu pay a nasaysayaat a gagayyem.”—Cole.

“Ti pannakipaset iti Nakristianuan a ministerio ti kasayaatan a pamay-an tapno maam-ammok dagiti kakabsat iti kongregasion. Dita a makaduak nga agpadpada dagiti ubbing ken nataengan. Ken makalangenko dagiti tattao a mangay-ayat ken Jehova.”—Yvette.

“Inkararagko a maaddaanak koma iti gagayyem, ngem naamirisko nga awan met ti ar-aramidek nga addang. Isu a siak ti immuna a nakisarita iti dadduma a kakabsat kadagiti Nakristianuan a gimong. Idi agangay, naaddaanak iti adu a baro a gagayyem. Isu nga ita, naragsakakon.”—Sam.

[Kahon iti panid 20]

PADASEM DAGITOY A SINGASING

Makisaritaka kadagiti nagannakmo maipapan iti pannakigayyem. Damagem kadakuada no ania a kita ti gagayyem ti nakikadkaduaanda idi agtutuboda pay a kas kenka. Nagbabawyanda kadi dagiti pinilida a kakadua? No wen, apay? Imtuodem no kasano a maliklikam ti dadduma kadagiti problema a napasaranda.

Iyam-ammom dagiti gagayyemmo kadagiti dadakkelmo. No bumdengka a mangaramid iti dayta, iyimtuodmo iti bagim, ‘Apay ngata a bumdengak?’ Adda kadi ammom a di kayat dagiti dadakkelmo maipapan kadagiti gagayyemmo? No kasta, ad-adda koma a piliem ti agbalin a gagayyemmo.

[Kahon iti panid 20]

TALLO A PAMAY-AN TAPNO MATAGINAYON DAGITI NASAYAAT A GAGAYYEM

◼ Agimdengka a naimbag. Ipakitam nga interesadoka iti pagimbagan ken pakaseknanda.—Filipos 2:4.

◼ Agbalinka a manangpakawan. Saanka nga agbalin a perpeksionista. “Maitibkoltayo amin iti adu a daras.”—Santiago 3:2.

◼ Dimo namnamaen a kanayon a kaduam ida. Saanka koma a nakadepende kadakuada. Total, dagiti pudno a gagayyem masindadaanda a tumulong no kasapulam ida.—Eclesiastes 4:9, 10.

[Ladawan iti panid 18, 19]

No basta surotem ti an-annuroten ti dadduma, kaska la peon ti chess a mabalinda lattan nga iyakar-akar