“Kasapulak ti Panangliwliwam”

● Ti sanga nga opisina dagiti Saksi ni Jehova idiay Mexico ket nakaawat iti surat manipud iti maysa a babai nga agtartrabaho iti eskuelaan dagiti baldado ken addaan depekto iti isip. Insuratna: “Idi Mayo 9, pimmusay ti patpatgek nga ina. Diak mailadawan ti napalaus a leddaangko. Sumagmamano a bulan sakbay a natay, adda inaramidko a panagsirarak para iti trabahok. Maipanggep dayta iti thanatology wenno panagadal maipapan iti ipapatay ken no kasano a mailiwliwag dayta. Impagarupko no makatulong met dayta kaniak ngem saan gayam.”

Naminsan, bayat nga isu ket maladladingitan, inkararagna iti Dios, “Kasapulak ti panangliwliwam.” “Iti dayta a rabii,” kinunana, “binasak ti broshur a No Adda Matay nga Ay-ayatenyo. Kasla naisurat dayta para kaniak. Nadakamat iti dayta a gagangay laeng nga agsangit ti maysa. Iti paset a ‘Kasano a Maibturak ti Ladingitko?’ kunana: ‘Dikay tagibassiten ti kararag. . . . Ti saranay nga ited ti Dios ti makatulong. . . . Pudno, saan nga ikkaten ti nadiosan a tulong ti saem, ngem mabalinna a palag-anen dayta. Saanna a kayat a sawen a dikayton agsangit wenno malipatanyonto ti inay-ayatyo. Ngem sumayaatto ti riknayo.’ Naliwliwaak kadagita a sasao.”

No natayankan iti ay-ayaten ken kayatmo ti maliwliwa, nalabit makatulong kenka wenno iti am-ammom no mabasayo ti 32 ti panidna a broshur a No Adda Matay nga Ay-ayatenyo.

Mabalinmo ti agkiddaw iti kopia no suratam ti naipakuyog a kupon ken ipatulodmo dayta iti adres a makita iti kupon wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti broshur a naipakita ditoy.

□ Interesadoak iti libre a panagadal iti Biblia.