Siasino ti Immuna?
IDI 1973, ni Dr. Martin Cooper ti kaunaan a nangipakita iti selpon. Addaan dayta iti bateria, radio, ken microprocessor (bassit a kompiuter). Kasta unay ti siddaaw dagiti taga-New York idi makitada ni Cooper nga umaw-awag babaen iti selponna bayat nga adda iti kalsada. Ngem naaramidna dayta gapu ta idi 1800, naimbento ni Alessandro Volta ti napaut-biagna a bateria. Mainayon pay, naimbento ti telepono idi 1876, ti radio idi 1895, ken ti kompiuter idi 1946. Kamaudiananna, naimbento ti microprocessor idi 1971 isu a posiblen ti panagaramid kadagiti selpon. Ngem nalabit maisaludsodtayo, Talaga kadi a kabbaro ti komunikasion babaen kadagiti moderno nga alikamen?
Ti pakikomunikar nga alikamen a masansan a di maikabkabilangan ket ti timek ti tao. Nasurok a kagudua iti binilion a neuron iti motor cortex ti utekmo ti karaman iti panangkontrol kadagiti paset ti bagi a maus-usar iti panagsao, ken agarup 100 a masel ti mangpapaandar iti komplikado a mekanismo ti pangam, dilam, bibig, karabukob, ken barukongmo.
Karaman met ti lapayagmo iti dayta met la a sistema ti komunikasion. Pagbalinenna ti uni kas elektrikal a signal a kabaelan nga iproseso ti utekmo. Analisaren ti utekmo dagiti uni tapno mailasinmo dagiti tattao babaen iti timbre ti timekda. Rukodenna pay ti arigna apagkimat a naggidiatan ti tiempo a pannakangngeg ti agsumbangir a lapayagmo iti uni, isu a siuumiso a maanagna no paggapgapuan dayta nga uni. Dua laeng dagitoy kadagiti makagapu a mangngegmo ti maysa a tao uray no adda dagiti kagiddanna nga agsasao.
Gapuna, saan a kabbaro dagiti moderno nga awanan-kable nga alikamen iti komunikasion (a makaiparang iti nagan ti umaw-awag). Immuna a nakitatayo dagitan iti lubong dagiti sibibiag a banag—ti nakaparsuaan.
[Diagram/Dagiti Ladawan iti panid 3]
(Para iti aktual a pannakaurnosna, kitaem ti publikasion)
1800
Ti napaut-biagna a bateria
1876
Telepono
1971
“Microprocessor”
1973
Ni Dr. Martin Cooper nga imbentor ti selpon
[Credit Line]
Dr. Cooper and mobile phone: © Mark Berry
[Dagiti Ladawan ti panid 2]
Makinkannawan iti panid 2, manipud sango, retrato dagiti nangyakto manen: ni Guglielmo Marconi ken ti radiona; ni Thomas Edison ken ti bombilia; ni Granville T. Woods, imbentor iti komunikasion; ti agkabsat a Wright ken ti inaramidda a Flyer idi 1903