Agpatulongka

“No ti asinoman maringbawanna ti agmaymaysa, ti dua a sangsangkamaysa makapagtakderda a maibusor kenkuana.”—Eclesiastes 4:12.

NO ADDA tumulong kadatayo, dakdakkel ti posibilidad a maparmektayo ti kabusor—siasinoman wenno aniaman dayta. No ngarud kayatmo nga isardeng ti agsigarilio, nainsiriban nga agpatulongka iti pamiliam ken gagayyemmo—wenno iti asinoman a sipapasnek ken siaanus a tumulong kenka.

Padasem ti makisarita kadagidiay nangisardengen iti dayta a bisio, ta nalabit mannakipagriknada ken matulongandaka pay. “Nakapatpateg kaniak ti panangandingay ti sabsabali,” kuna ni Torben, maysa a Kristiano idiay Denmark. Kastoy met ti insurat ni Abraham a taga-India: “Ti napudno a panagayat ti pamiliak ken dagiti kapammatiak ti nakatulong kaniak a nangisardeng iti bisiok.” Ngem no dadduma, saan nga umdas ti panangtulong ti pamilia ken gagayyem.

“Mannigarilioak iti 27 a tawen,” kuna ti lalaki nga agnagan iti Bhagwandas, “ngem gapu ta naadalko ti isursuro ti Biblia maipapan kadagiti narugit a bisio, inkeddengko nga isardeng dayta. Pinadasko a kissayan ti sigarilioek. Diak metten nakikuykuyog kadagiti dati a kakaduak. Nagpabalakadak pay kadagiti eksperto. Ngem diak latta naisardeng ti agsigarilio. Kamaudiananna, iti maysa a rabii, naimpusuan a nagkararagak ken Jehova a Dios ken nagpakpakaasiak a tulongannak a mangisardeng iti bisiok. Kas resultana, naparmekko met laeng dayta!”

Ti maysa pay a napateg nga aramidem ket saganaam dagiti lapped a posible a maipasango kenka. Ania dagita? Ilawlawag ti sumaganad nga artikulo.

[Kahon iti panid 5]

RUMBENG KADI NGA AGUSARKA ITI AGAS?

Dagiti agas a kas iti nicotine patch a makatulong kadagiti mannigarilio a mangisardeng iti bisioda ket nagbalinen a narang-ay a negosio. Sakbay a padasem dagita, usigem dagiti sumaganad:

Ania dagiti pagimbaganna? Adu a therapy ti mangpadakkel kano iti posibilidad a maisardengmo ti bisiom ta kissayanda dagiti epekto ti panangisardengmo iti dayta. Ngem saan pay a sigurado no agpaut met laeng ti kinaepektiboda.

Ania dagiti pagdaksanna? Adda pagdaksan ti dadduma nga agas, kas iti depresion, pannakariknam a makasarsarwaka, ken pannakapanunotmo nga agpakamatay. Laglagipem met a dagiti nicotine-replacement therapy ket mangipaay laeng iti sabali manen a kita ti agas nga addaan iti pagdaksan. Kinaagpaysuanna, adikto latta ti tao nga agus-usar kadagita.

Ania dagiti pagpiliam? Iti maysa a surbey, 88% kadagiti nagballigi a nangisardeng iti panagsigarilioda ti nagkuna a naaramidda dayta gapu ta namimpinsan a liniklikandan ti agsigarilio ken dida nagusar iti aniaman nga agas.