“Kasla Saanka a Problemado”

● Anemic ni Camila ken adda depekto ti panagdakkelna agraman ti sistema ti nerbiona. Gapuna, uray no walon ti tawenna, 30 a pulgada (75 a sentimetro) laeng ti katayagna. Saksi ni Jehova dagiti nagannakna. Inkeddengda nga ikuyog ni Camila iti itatabunoda iti medikal a komperensia a naangay iti teatro iti lugarda idiay Argentina a tinabunuan ti 500 a tattao. Nagtugawda iti maikadua nga intar.

Bayat ti lekteur, ti nagbitla a doktor intudona ni Camila a pagarigan ti maysa a kasla nasalun-at a maladaga. Gapu ta dina ammo ti edad ken kasasaad ti ubing, dinamagna: “Mano a bulanen ti anakyo?”

“Walo ti tawennan,” kinuna ni Marisa a Nanang ni Camila.

“Amangan no ti kayatyo a sawen ket walo a bulan,” kinuna ti doktor.

“Saan, talaga a walo ti tawennan,” insungbat ni Marisa.

Gapu ta nasdaaw ti doktor, inawisna ti agina iti entablado tapno pagsaludsodanna ida. Kalpasan nga inlawlawag ni Marisa dagiti eksamenasion ken panangagas nga inaramid ti dodoktor ken Camila, kinuna ti doktor: “Adda inna nga agsangsangiten no agtrangkaso ti annakda. Ngem uray namimpiton a naipaagas ken naaramiden ti amin a pamuspusan para ken Camila, kasla saanka a problemado. Apay?”

Kas sungbat, imbaga ni Marisa iti tallaong ti maipapan iti naibasar-Biblia a namnamana iti nalinteg a baro a lubong a sadiay awanton ti amin a kita ti sakit, panagsagaba, ken ipapatay. (Isaias 33:24; Apocalipsis 21:3, 4) Kamaudiananna, dineskribir ni Marisa ti sangalubongan a panagkakabsat a tagtagiragsaken dagiti Saksi ni Jehova. Inlawlawagna pay no kasano a ti panagiinnayat dagiti Saksi ti tumultulong kadakuada a mangdaer kadagiti pakasuotan ken dadduma pay a rigat iti biag.—Juan 13:35.

Idi nalpas ti programa, adda babai nga immasideg ken Marisa ket kinunana a kayatna a maammuan ti ad-adu pay maipapan kadagiti dinakamat ni Marisa. Magagaran a makasursuro isu nga inawatna ti libre a panagadal iti Biblia iti pagtaenganna. Ti kasta a panagadal ket ituktukon dagiti Saksi ni Jehova iti intero a lubong kadagiti agtarigagay a mangammo iti linaon ti Biblia ken iti panggep ti Dios para iti sangatauan.

[Ladawan iti panid 25]

Ti walo ti tawenna a ni Camila ken ni Marisa a nanangna