Panid Dos

Panangpadakkel iti Responsable nga Annak

Adda banag nga adayo a panunoten ti nagannak bayat a mingmingminganda ti ing-ingungotenda a kappasngay a maladagada. Ngem kinaagpaysuanna, dumtengto ti tiempo a ti bassit a maladaga ket dumakkel, agmataengan, sa pumanawen iti poder ti nagannakna. Kasta a talaga ti mapasamak, ta kuna ti Biblia a “ti maysa a lalaki panawannanto ti amana ken ti inana.” (Genesis 2:24) Siempre, agaplikar met dayta iti anak a babai.

Ngem iti dayta a naragsak a naliday nga aldaw a pumanaw ti dakkelen nga anakda, madanagan ti adu a nagannak. Pampanunotenda: ‘Umiso met la kadi ti panangpadakkelko iti anakko?’ ‘Kabaelannanto ngata ti agtrabaho ken agabang iti pagnaedanna? Mayan-anaynanto ngata ti sueldona?’ Napatpateg pay, ‘Agbiagto ngata a maitunos kadagiti prinsipio nga impasagepsepmi kenkuana?’—Proverbio 22:6; 2 Timoteo 3:15.

Ipakita daytoy nga espesial a ruar ti Agriingkayo! no kasano a ti balakad ti Biblia ket makatulong kadagiti nagannak iti tunggal paset ti idadakkel ti anakda.