Nagadu ti Agkuskusit!

Agtartrabaho ni Dannya iti dakkel a kompania idiay Hong Kong. Idi simmarungkar iti maysa a pabrika a posible nga agbalin a suplayerda, imbagana nga amangan no saan a makapasa ti pabrika kadagiti standard a kasapulan iti panagaramid kadagiti produkto ti kompaniada. Karabiyanna, bayat ti pannangan, ti manedyer ti pabrika inyawatanna ni Danny iti sobre. Idi luktan ni Danny, nakitana ti pasuksok a pinullo a ribu a doliar​—katupag ti makatawen a sueldona.

● Saan la a ni Danny ti nakapadas iti kasta. Iti intero a lubong, makapakellaat ti kaadu ken kasaknap ti panagkusit. Kas pagarigan, sigun kadagiti dokumento ti korte, manipud 2001 aginggat’ 2007, adda dakkel a kompania idiay Germany a nagpasuksok iti 1.4 bilion a doliar tapno makaala kadagiti kontrata.

Nupay adda sumagmamano a panagbalbaliw gapu kadagiti nabiit pay nga eskandalo a nakainaigan ti dadakkel a kompania, kasla kumarkaro ti kaaduan a kasasaad. Natakuatan ti panagadal ti Transparency International idi 2010 nga iti intero a lubong, “kimmaro ti korapsion iti napalabas a tallo a tawen.”

Apay a nagadu ti nakusit? Makagunggona kadi ti agbalin a mapagpiaran? No wen, kasano? Makatulong kadi kadatayo ti Biblia?

[Footnote]