LUGLUGAR KEN TATTAO
Panagpasiar Idiay Ireland
DUA a pagilian ti mangbukel iti “Emerald Isle” wenno Ireland: ti dakdakkel ket ti independiente a Republic of Ireland, ti met basbassit ket ti Northern Ireland a paset ti United Kingdom.
Giant’s Causeway
Naawagan ti Ireland iti Emerald Isle gapu iti nakaberberde nga aglawlawna a resulta ti masansan a panagtudo. Ad-adda pay a mangpangayed dagiti napipintas a danaw ken karayan, agraman dagiti kabambantayan iti igid ti baybay ken katurturodan.
Balay a pan-aw ti atepna
Adun a pakarigatan ti napasaran dagiti Irish. Kas pagarigan, adda dagiti mangipagarup a manipud 1845-1851, agarup 1 a milion a tattao ti natay gapu iti bisin ken sakit idi binuot dagiti mulada a patatas. Tapno malasatanda ti nakaro a kinarigat, adu ti immakar iti sabali a pagilian kas iti Australia, Britain, Canada, ken United States. Ita, agarup 35 a milion nga Americano ti agkuna a nagtaud idiay Ireland dagiti kapuonanda.
Pagaammo a nasisingpet ken managpadagus dagiti Irish. Magustuanda a pagpalpaliwaan ti panagkabalio ken dagiti team sports a kas iti cricket, rugby, soccer (nga aw-awaganda iti football), ken ti Gaelic football (nga umarngi iti soccer). Kaay-ayo unay dagiti babbai ti ay-ayam a maawagan iti camogie nga umarngi iti field hockey.
Magustuan met dagiti taga-Ireland ti makisarsarita, ken pagay-ayatda ti musika. Nalatak iti intero a lubong ti Irish step dance. Pagtalinaeden dagiti sumasala a diretso ti makinngato a paset ti bagida bayat ti napartak ken eksakto a panangigarawda kadagiti sakada.
Banda dagiti Irish
Nasurok a 100 a tawenen dagiti Saksi ni Jehova idiay Ireland. Ita, nasurok nga 6,000 a Saksi ti agnanaed sadiay ken sireregta a mangisursuro iti Biblia.
Ti tradisional a musika ti Ireland ket agus-usar kadagiti instrumento a kas kadagiti makita iti baba, agpakannawan: Celtic harp, Irish bagpipes, fiddle (biolin), accordion, tin whistle, ken bodhran (tambor
AMMOM KADI?
Ti Giant’s Causeway iti makin-amianan a kosta ti Northern Ireland ket buklen ti rinibu a sinan-adigi a basalt a batbato a nabukel idi nailaok iti baybay ti nagayus a lava.