Dagiti Di Agkupas a Prinsipio—Kinamatalek iti Asawa

PRINSIPIO TI BIBLIA: “Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna.”—Hebreo 13:4.

DAGITI PAGIMBAGANNA: Ibaga ti dadduma a lausen dayta a prinsipio. Ngem pulos a saan a husto dayta nga ibagbagada! No kasano kasakit ti maliputan idi naisurat ti Biblia, kasta met laeng ita.—Proverbio 6:34, 35.

Kastoy ti insurat ni Jessie a maysa nga asawa ken ama: “Dakkel ti naitulong ti kinamatalekmi iti maysa ken maysa iti natibker ken naragsak a relasionmi nga agassawa. Talaga a nakapatpateg iti panagasawa ti panagtalek. Madadael dayta a panagtalek no makikamalala ti maysa”—ken addanto pay dakes nga epekto dayta kadagiti annak!

Inrisgo ni Ligayaa ti relasionda nga agassawa. Kunana: “Nakigayyemak kadagiti di nasayaat a kakadua isu a nasursurok ti makuna nga aglablabes a ‘nightlife’ agingga a nakikamalalaak payen.” Rimmagsak ngata ni Ligaya? Agkaraapada ken lakayna ken miserable ti biagna. Innayonna: “Inutobko ti nakababain a nasnastrekko ket naamirisko a husto gayam ti sangkaibaga idi dagiti dadakkelko a ‘madadael ti nasayaat a kababalin gapu iti pannakikadua kadagiti dakes a tattao.’”—1 Corinto 15:33, Ti Baro a Naimbag a Damag Biblia.

Kuna pay ni Ligaya: “Sakbay pay a kumaro ti situasion, insardengkon dagiti dakes nga aramidko ken nagpayadalak iti Biblia—ket inkagumaakon nga iyaplikar dagiti maad-adalko.” Ti resultana? Nasalbar ti relasionda nga agassawa ken nasaysayaaten ti panangtrato kenkuana ni lakayna. “Ti Biblia ti nangbalbaliw iti biagko,” kunana, “ken diak pulos pagbabawyan ti panangisardengko kadagiti dati nga aramidko ken ti panangtallikudko kadagiti sinsinan gagayyem.”