LUGLUGAR KEN TATTAO

Panagpasiar Idiay Liechtenstein

Mapa a mangipakita iti Liechtenstein ken ti Switzerland ken Austria nga adda iti aglawlawna

MAYSA daytoy kadagiti kababassitan a nasion iti lubong ken adda iti rehion ti kabambantayan ti Alps iti nagbaetan ti Switzerland ken Austria. Iti napalabas a ginasut a tawtawen, nagyan dagiti Celt, Rhaetian, Roman, ken Alemanni iti daytoy a rehion. Ita, agarup 67% iti populasion ti Liechtenstein ti naggapu iti tribu nga Alemanni, nga immay nagyan ditoy agarup 1,500 a tawenen ti napalabas.

German ti opisial a lengguahe ti Liechtenstein, ngem adda dagiti sasao nga us-usaren ti kada purok a mabalin a saan a maawatan ti dadduma a purok. Ti dua kadagiti kaaduan a maidasdasar a makan ditoy ket ti Tüarka-Rebel, maysa a pagpampannakkel ken paborito a makan dagiti lumugar a naaramid iti mais, ken ti Käsknöpfle, pasta nga adu ti kesona.

Dua kadagiti gagangay a makan idiay Liechtenstein — *Käsknöpfle*

Maysa a babai ken ubing a nakasuot iti namaris a bado dagiti agtutubo — Namaris a bado dagiti katutubo

No pasiaren dagiti bisita ti intero a Liechtenstein, makitada dagiti bambantay a naabbongan iti niebe, naberde a tantanap, kaubasan, ken agduduma a kayo, mula, ken sabong. Kas pagarigan, dandani 50 a nagduduma a klase ti atap nga orkidia ti makita ditoy. Adda met dagiti museo, teatro, ken pagaramidan iti wine. Isu a panawen man ti kalgaw (summer) wenno lam-ek (winter), adda latta dagiti turista.

Addan dagiti Saksi ni Jehova ditoy Liechtenstein sipud pay 1920’s. Ita, agarup 90 ti Saksi ditoy a mangisursuro iti mensahe ti Biblia kadagiti residente ken bisita.

Impablaak dagiti Saksi ni Jehova ti libro nga Ania a Talaga ti Isursuro ti Biblia? iti German, ti opisial a lengguahe ti Liechtenstein, ken mabasa online iti www.pr2711.com/ilo.