Mano ti am-ammom a Saksi ni Jehova? Mabalin a kaarrubam, katrabahuam, wenno kaklasem ti dadduma kadakami. Wenno mabalin a nakasarsaritadakan maipapan iti Biblia. Siasinokami a talaga, ken apay nga ipakpakaammomi dagiti patpatienmi?

Ordinariokami a tattao. Nagduduma ti nagtaudanmi a pamilia ken kasasaad ti biagmi. Sabali idi ti relihion ti dadduma kadakami, ken adda met dagiti saan idi a mamati iti Dios. Ngem sakbay a nagbalinkami a Saksi, sinukimat a naimbag ti tunggal maysa kadakami dagiti pannursuro ti Biblia. (Aramid 17:11) Pinatimi dagiti nasursuromi ken inkeddeng ti tunggal maysa kadakami ti agdaydayaw ken Jehova a Dios.

Nakatulong kadakami ti panagadal iti Biblia. Kas iti dadduma, adda met dagiti problema ken pagkapuyanmi. Ngem ikagkagumaanmi nga iyaplikar dagiti prinsipio ti Biblia iti inaldaw isu a nagdakkel ti simmayaatan ti kalidad ti panagbiagmi. (Salmo 128:1, 2) Dayta ti maysa a rason a kayatmi nga ipakaammo dagiti naimbag a nasursuromi iti Biblia.

Agbibiagkami maitunos kadagiti nadiosan a prinsipio. Dagitoy a prinsipio nga isursuro ti Biblia iparparegtada ti makapnek a panagbiag ken panagraem iti sabsabali, agraman dagiti ugali a kas iti kinamapagpiaran ken kinaimbag. Makatulong dagita tapno agbalin a nasayaat ken responsable ti maysa a tao, ken iparparegtada ti panagkaykaysa ti pamilia ken panangaramid iti umiso. Gapu ta kombinsidokami a “saan a mangidumduma ti Dios,” pasetnakami ti sangalubongan a naespirituan a panagkakabsat, a saan a mangidumduma iti puli ken saan a makiramraman iti politika. Nupay ordinariokami a tattao, naidumdumakami kas grupo.​—Aramid 4:13; 10:34, 35.

• Ania ti pagpapadaan dagiti Saksi ni Jehova ken ti dadduma a tattao?

• Ania dagiti prinsipio a nasursuro dagiti Saksi iti panagadalda iti Biblia?

Ipagarup ti adu a tattao a ti Saksi ni Jehova ket nagan ti baro a relihion. Ngem nasurok a 2,700 a tawenen ti napalabas, dagiti agserserbi iti maymaysa a pudno a Dios ket nadeskribir kas ‘saksina.’ (Isaias 43:10-12) Sakbay ti 1931, Estudiante ti Biblia ti awag kadakami. Apay nga inusarmi ti nagan a Saksi ni Jehova?

Ipabigbigna ti Diosmi. Sigun kadagiti nagkauna a manuskrito, ti Jehova, a nagan ti Dios, ket rinibu a daras a nausar iti Biblia. Iti adu a patarus, nasuktan daytoy a nagan kadagiti titulo a kas iti Apo wenno Dios. Ngem impalgak ti pudno a Dios ti kinasiasinona ken Moises babaen ti personal a naganna a Jehova, a kinunana: “Dayta ti naganko iti agnanayon.” (Exodo 3:15) Gapu iti dayta, naiduma isuna iti amin a didiosen. Ipagpannakkelmi nga irepresentar ti nasantuan a nagan ti Dios.

Deskribirenna ti trabahomi. Idi un-unana, manipud iti nalinteg a tao a ni Abel, adun a tattao ti nangsaksi iti pammatida ken Jehova. Iti panaglabas ti ginasut a tawen, da Noe, Abraham, Sara, Moises, David, ken ti dadduma pay ket nagbalin met a paset ti “dakkel a grupo dagiti saksi a kas iti napuskol nga ulep.” (Hebreo 11:4–12:1) Kas iti maysa a tao nga agtakder kas saksi iti korte para iti inosente a tao, determinadokami a mangipakaammo iti kinapudno maipapan iti Diosmi.

Tultuladenmi ni Jesus. Iti Biblia, naawagan ni Jesus kas “ti matalek ken napudno a saksi.” (Apocalipsis 3:14) Imbaga a mismo ni Jesus nga ‘impakaammona ti nagan ti Dios’ ken agtultuloy a ‘sinaksianna ti kinapudno’ maipapan iti Dios. (Juan 17:26; 18:37) No kasta, dagiti pudpudno a pasurot ni Kristo masapul a saksianda ti nagan ni Jehova ken ipakaammoda dayta. Daytoy ti ikagkagumaan nga aramiden dagiti Saksi ni Jehova.

• Apay a pinili dagiti Estudiante ti Biblia nga usaren ti nagan a dagiti Saksi ni Jehova?

• Kasano kabayagen nga adda dagiti saksi ni Jehova ditoy daga?

• Siasino ti katan-okan a Saksi ni Jehova?

Impadto ti Biblia a kalpasan ti ipapatay ni Kristo, adda dagiti agbalin nga ulbod a mannursuro kadagiti nagkauna a Kristiano ket tiritirenda ti kinapudno a linaon ti Biblia. (Aramid 20:29, 30) Pimmudno dayta idi agangay. Linaokanda dagiti pannursuro ni Jesus kadagiti narelihiosuan a kapanunotan dagiti pagano, isu a timmaud ti peke a Kristianidad. (2 Timoteo 4:3, 4) Kasano a masiguradotayo ita nga umiso ti pannakaawattayo iti agpayso nga isursuro ti Biblia?

Dimteng ti panawen nga impalgak ni Jehova ti kinapudno. Impadtona a kabayatan ti ‘tiempo ti panungpalan, umadu ti pudno a pannakaammo.’ (Daniel 12:4) Idi 1870, ti maysa a bassit a grupo dagiti agbirbirok iti kinapudno naammuanda nga adu a doktrina ti simbaan ket awan iti Biblia. Gapuna, rinugianda nga inadal dagiti orihinal a pannursuro ti Biblia ket tinulongan ida ni Jehova tapno maawatanda dagita.

Dagiti napasnek a tattao siaannad nga inadalda ti Biblia. Rinugian dagiti napasnek nga Estudiante ti Biblia ti pamay-an ti panagadal nga us-usarenmi pay laeng agingga ita. Inadalda ti tunggal topiko ti Biblia. No adda teksto ti Biblia a dida maawatan, mangbirokda kadagiti sabali a teksto a mangilawlawag iti dayta. Inton makaaramidda iti konklusion a maitunos iti dadduma a paset ti Biblia, isuratda dayta. Gapu ta inusarda ti Biblia a mangilawlawag iti mismo a linaonna, limmawag manen kadakuada ti kinapudno maipapan iti nagan ti Dios ken ti Pagarian, ti panggepna iti sangatauan ken iti daga, ti kasasaad dagiti natay, ken ti namnama a panagungar. Gapu iti panagsukimatda, nawayawayaanda iti adu a di umiso a sursuro ken aramid.​—Juan 8:31, 32.

Idi 1879, naawatan dagiti Estudiante ti Biblia a panawenen tapno iwaragawagda ti kinapudno. Isu nga iti dayta a tawen, rinugianda nga impablaak ti magasin nga ipabpablaakmi agingga ita, Ti Pagwanawanan Mangibumbunannag iti Pagarian ni Jehova. Ipakpakaammomi met ita dagiti kinapudno a linaon ti Biblia kadagiti tattao iti 240 a pagilian ken iti nasurok a 900 a lengguahe. Talaga nga immadu ti pudno a pannakaammo!

• Kalpasan ti ipapatay ni Kristo, ania ti napasamak iti kinapudno a linaon ti Biblia?

• Kasano a limmawag manen ti kinapudno a linaon ti Sao ti Dios?

Pinullo a tawen a nagusar, nagimprenta, ken nagiwaras dagiti Saksi ni Jehova iti nadumaduma a bersion ti Biblia. Ngem nakitami a masapul a mangaramidkami iti baro a patarus nga ad-adda a makatulong kadagiti tattao a maaddaan iti “umiso a pannakaammo iti kinapudno,” nga isu ti pagayatan ti Dios para iti amin a tattao. (1 Timoteo 2:3, 4) Isu nga idi 1950, inrugimi ti nangipablaak iti sumagmamano a paset ti Biblia a Baro a Lubong a Patarus iti moderno a lengguahe. Simamatalek ken siuumiso a naipatarus daytoy a Biblia iti nasuroken a 160 a lengguahe.

Kasapulan ti Biblia a nalaka a maawatan. Agbalbaliw dagiti lengguahe iti panaglabas ti tiempo, ken adu a patarus ti naglaon kadagiti saan a nalawag wenno kadaanan a sasao a narigat a maawatan. Maysa pay, adda dagiti nasarakan a nagkauna a manuskrito a mas umiso ken as-asideg iti orihinal, isu a nalawlawagen a maawatan ti Hebreo, Aramaiko, ken Griego a sasao a nausar idi naisurat ti Biblia.

Kasapulan ti patarus a saan a mangbalbaliw iti Sao ti Dios. Masapul a saan a balbaliwan dagiti agipatpatarus iti Biblia ti kaipapanan ti orihinal a sasao a nausar idi naisurat dayta. Ngem iti kaaduan a patarus ti Nasantuan a Kasuratan, saan a nausar ti Jehova a nagan ti Dios.

Kasapulan ti Biblia a mangpadayaw iti Autorna. (2 Samuel 23:2) Ti Baro a Lubong a Patarus insublina ti nagan ni Jehova iti agarup 7,000 a daras a nagparanganna kadagiti kadaanan a manuskrito ti Biblia, kas iti naipakita iti ladawan iti baba. (Salmo 83:18) Kas resulta ti adu a tawen a napinget a panagsukimat, daytoy a Biblia ket makaparagsak a basaen ta nalawag nga ipakaammona ti kapanunotan ti Dios. Naipatarus man ti Baro a Lubong a Patarus iti lengguahem wenno saan, iparegtami nga iyugalim a basaen ti Sao ni Jehova iti inaldaw.​—Josue 1:8; Salmo 1:2, 3.

• Apay nga inkeddengmi a kasapulan ti baro a patarus ti Biblia?

• No kayat ti maysa a maammuan ti pagayatan ti Dios, ania ti nasayaat nga aramidenna iti inaldaw?