Awan dagiti suelsuelduanmi nga agserbi kas lider iti organisasionmi. Imbes ketdi, kas idi rugrugi ti kongregasion Kristiano, dagiti kualipikado a manangaywan ket nadutokan a ‘mangipastor iti kongregasion ti Dios.’ (Aramid 20:28) Dagitoy a panglakayen ket nataengan iti naespirituan a mangidadaulo ken mangipaspastor iti kongregasion a ‘saan a mapilpilit, no di ket aramidenda a situtulok iti sanguanan ti Dios; saan a gapu iti panagayat iti naagum a gunggona, no di ket sigagagar.’ (1 Pedro 5:1-3) Ania ti ar-aramidenda para kadakami?

As-asikasuen ken ay-aywanandakami. Mangiwanwanwan dagiti panglakayen ken tumultulongda a mangsalaknib iti espiritualidad ti kongregasion. Ammoda nga intalek kadakuada ti Dios daytoy a napateg a rebbengen, isu a saanda nga iturayan ti ili ti Dios. Tumultulongda ketdi tapno natalged ti riknami ken naragsakkami. (2 Corinto 1:24) Kas iti pastor a nagaget a mangas-asikaso iti tunggal karnerona, ikagkagumaan dagiti panglakayen nga am-ammuen ti tunggal miembro ti kongregasion.​—Proverbio 27:23.

Isursuroda no kasanomi nga aramiden ti pagayatan ti Dios. Linawas nga idadauluan dagiti panglakayen dagiti gimong iti kongregasion tapno mapatibker ti pammatimi. (Aramid 15:32) Idadauluan met dagitoy a nareregta a lallaki ti trabahomi a panangasaba. Kadkaduaen ken sansanayendakami iti amin a paset ti ministeriomi.

Patpatibkerenda ti tunggal maysa kadakami. Tapno maasikasoda ti naespirituan a kasapulan ti tunggal maysa, adda tiempo a sumarungkar dagiti panglakayen iti pagtaenganmi wenno kasaritadakami idiay Kingdom Hall tapno tulongan ken liwliwaendakami manipud iti Biblia.​—Santiago 5:14, 15.

Malaksid iti responsabilidadda iti kongregasion, ti kaaduan a panglakayen ket addaan iti trabaho ken pamilia a masapul nga asikasuenda. Rumbeng laeng a raemenmi dagitoy a nagaget a kakabsat.​—1 Tesalonica 5:12, 13.

• Ania ti rebbengen dagiti panglakayen iti kongregasion?

• Kasano nga ipakpakita dagiti panglakayen a maseknanda iti tunggal maysa kadakami?

Iti Biblia, adda dua a grupo dagiti Kristiano a lallaki a mangas-asikaso iti kongregasion​—dagiti “manangaywan ken ministerial nga adipen.” (Filipos 1:1) Gagangay nga adda dagiti panglakayen ken ministerial nga adipen nga agserserbi iti tunggal kongregasion. Ania ti trabaho dagiti ministerial nga adipen a makatulong kadakami?

Tultulonganda dagiti panglakayen. Dagiti ministerial nga adipen ket naespirituan ti panagpampanunotda, mapangnamnamaan, ken nagagaget. Agtutubo ti dadduma ken adda met dagiti nataengan. As-asikasuenda dagiti napateg a trabaho a masansan a maaramid iti organisasion ken dagiti pisikal a trabaho iti kongregasion tapno maipamaysa dagiti panglakayen ti responsabilidadda a mangisuro ken mangipastor.

Mangipapaayda kadagiti praktikal a tulong. Dadduma a ministerial nga adipen ket madutokan kas attendant a mangpasangbay kadagiti makigimong. Adda met dagiti mangasikaso iti literatura, sound system, accounts ti kongregasion, ken teritoria a pangasabaan dagiti miembro ti kongregasion. Tumultulongda met a mangmantener iti Kingdom Hall. Mabalin a kiddawen kadakuada dagiti panglakayen a tulonganda dagiti nataengan. Aniaman ti maited a responsabilidad dagiti ministerial nga adipen, sidadaanda a mangaramid kadagita isu a raraemen ida ti amin.​—1 Timoteo 3:13.

Nasayaat ti ulidanda kas Kristiano a lallaki. Nadutokan dagiti ministerial nga adipen gapu kadagiti nasasayaat a naespirituan a galadda. No iparangda dagiti pasetda kadagiti gimong, mapatpatibker ti pammatimi. No idauluanda ti panangasaba, maparparegtakami. Mangyeg iti rag-o ken panagkaykaysa ti pannakitinnulongda kadagiti panglakayen. (Efeso 4:16) Inton agangay, makualipikardanto met nga agserbi kas panglakayen.

• Ania dagiti galad dagiti ministerial nga adipen?

• Kasano a tumultulong dagiti ministerial nga adipen tapno naannayas dagiti trabaho iti kongregasion?

Da Bernabe ken ni apostol Pablo ket masansan a nadakamat iti Kristiano a Griego a Kasuratan. Nagserbida kas agdaldaliasat a manangaywan a bumisbisita kadagiti nagkauna a kongregasion. Apay? Maseknanda unay iti pagsayaatan dagiti kapammatianda. Kinuna ni Pablo a kayatna ti ‘agsubli ken bisitaen dagiti kakabsat’ tapno kitaenna ti kasasaadda. Sidadaan a nagna iti ginasut a kilometro tapno patibkerenna ida. (Aramid 15:36) Kasta met laeng ti ar-aramiden ita kadakami dagiti agdaldaliasat a manangaywan.

Parparegtaendakami. Ti tunggal manangaywan iti sirkito ket bumisbisita iti 20 wenno ad-adu pay a kongregasion. Makalawas nga agyanda iti maysa a kongregasion, mamindua iti kada tawen. Adu ti masursuromi iti kapadasan dagitoy a kakabsat ken ti assawada, no adda asawada. Ikagkagumaanda nga am-ammuen ti amin, ubbing man wenno nataengan, ken maragragsakanda a mangkuyog kadakami a mangasaba ken mangyadal iti Biblia. Mangipastor dagitoy a manangaywan a kakuyog dagiti panglakayen ket patibkerendakami. Mangipapaayda met kadagiti makaparegta a palawag kadagiti gimong ken asamblea.​—Aramid 15:35.

Maseknanda kadakami amin. Maseknan unay dagiti manangaywan iti sirkito iti naespirituan a kasasaad dagiti kongregasion. Mitmitingenda dagiti panglakayen ken ministerial nga adipen tapno kitaenda ti nagrang-ayan ti kongregasion ken mangmangtedda iti praktikal a balakad tapno maasikasoda dagiti responsabilidadda. Tultulonganda dagiti payunir nga agballigi iti ministerioda, ken maragsakanda a makiam-ammo kadagiti kabbaro ken mangammo iti naespirituan a panagrang-ayda. Dagitoy a kakabsat ket sidadaan nga agpausar kas ‘katrabahuan para iti pagimbaganmi.’ (2 Corinto 8:23) Masapul a tuladenmi ti pammati ken debosionda iti Dios.​—Hebreo 13:7.

• Apay a bumisbisita dagiti manangaywan iti sirkito kadagiti kongregasion?

• Ania dagiti maitulong kenka ti ibibisitada?

No adda didigra, dagus a tulongan dagiti Saksi ni Jehova ti kakabsatda a naapektaran. Ipakita dayta a talaga nga agiinnayatda. (Juan 13:34, 35; 1 Juan 3:17, 18) Kasano a tumultulongkami?

Mangmangtedkami iti donasion. Idi adda nakaro a bisin idiay Judea, dagiti nagkauna a Kristiano idiay Antioquia ket nangipatulod iti kuarta a pangtulong kadagiti kapammatianda. (Aramid 11:27-30) No madamagmi nga agsagsagaba met dagiti kakabsatmi iti dadduma a paset ti lubong, mangipatulodkami iti donasion babaen ti kongregasionmi tapno maipaay dagiti material a kasapulanda.​—2 Corinto 8:13-15.

Mangipapaaykami iti praktikal a tulong. Dagiti panglakayen nga adda iti lugar nga apektado iti didigra siguraduenda nga awan ti mapukpukaw a miembro ti kongregasion ken natalgedda. Adda relief committee a mangyurnos iti pannakaipaay ti taraon, nadalus a danum, bado, pagdagusan, ken medikal a tulong. Adu a Saksi nga addaan kadagiti kasapulan a paglaingan ti agboluntario a mapan mangsaranay wenno mangtarimaan kadagiti nadadael a balay ken Kingdom Hall. Bukodda ti gastosda. Gapu ta agkaykaysakami kas organisasion ken adun ti kapadasanmi iti panagtitinnulongmi, makapagtignaykami a dagus no kasapulan. Nupay tultulonganmi ‘dagiti kapammatianmi,’ tultulonganmi met ti sabsabali no posible, aniaman ti relihionda.​—Galacia 6:10.

Mangipapaaykami iti espiritual ken emosional a tulong. Agkasapulan unay iti liwliwa dagiti biktima ti didigra. Kadagita a kasasaad, patpatibkerennakami ni Jehova a “Dios ti amin a liwliwa.” (2 Corinto 1:3, 4) Siraragsak nga ipakpakaammomi dagiti kari ti Biblia kadagidiay maaw-awananen iti namnama. Ipaspasiguradomi kadakuada nga asidegen a pagpatinggaen ti Pagarian ti Dios ti amin a trahedia a pakaigapuan ti ut-ot ken panagsagaba.​—Apocalipsis 21:4.

• Apay a makapagtignay a dagus dagiti Saksi no adda didigra?

• Ania a naespirituan a liwliwa ti maipaaymi kadagiti biktima ti didigra?

Di agbayag sakbay ti ipapatay ni Jesus, kinasaritana ti uppat kadagiti adalanna​—da Pedro, Santiago, Juan, ken Andres. Bayat nga impakaammo ni Jesus ti pagilasinan ti kaaddana iti maudi nga al-aldaw, daytoy ti napateg nga insaludsodna: “Asino a talaga ti matalek ken masirib nga adipen a dinutokan ti apona a mangaywan kadagiti adipen iti balayna, tapno ipaayna ti taraonda iti umiso a tiempo?” (Mateo 24:3, 45; Marcos 13:3, 4) Ipampanamnama ni Jesus kadagiti adalanna a kas ‘apoda,’ adda dutokanna nga agtultuloy a mangipaay iti naespirituan a taraon kadagiti pasurotna bayat ti tiempo ti panungpalan. Asino ti mangbukel iti daytoy nga adipen?

Dayta ket bassit a grupo dagiti pasurot ni Jesus a napulotan wenno dinutokan ti espiritu. Ti “adipen” ket isu ti Bagi a Manarawidwid dagiti Saksi ni Jehova. Mangipapaay dayta iti naintiempuan a naespirituan a taraon kadagiti padada nga agdaydayaw ken Jehova. Agpannuraykami iti daytoy a matalek nga adipen nga agtultuloy a mangted iti ‘umdas a taraonmi iti umiso a tiempo.’​—Lucas 12:42.

Dayta ti mangay-aywan iti sangakabbalayan ti Dios. (1 Timoteo 3:15) Inikkan ni Jesus ti adipen iti nadagsen a responsabilidad a mangaywan iti trabaho ti naindagaan a paset ti organisasion ni Jehova​—mangasikaso kadagiti material a sanikua ti organisasion, mangiwanwan iti trabaho a panangasaba, ken mangisuro kadakami babaen kadagiti kongregasionmi. Gapuna, tapno maited “ti matalek ken masirib nga adipen” dagiti kasapulanmi iti umiso a tiempo, mangipapaay iti naespirituan a taraon babaen kadagiti publikasion nga us-usarenmi iti ministeriomi, agraman kadagiti programa a maiparang kadagiti gimong ken asambleami.

Ti adipen ket matalek kadagiti kinapudno a linaon ti Biblia ken iti annongenna a mangikasaba iti naimbag a damag. Masirib met iti panangaywanna kadagiti bambanag ditoy daga nga intalek kenkuana ni Kristo. (Aramid 10:42) Bembendisionan ni Jehova daytoy nga adipen ta umad-adu ti umaw-awat iti kinapudno ken nawadwad ti maipapaayna a naespirituan a taraon.​—Isaias 60:22; 65:13.

• Asino ti dinutokan ni Jesus a mangipaay iti naespirituan a taraon kadagiti adalanna?

• Kadagiti ania a pamay-an a matalek ken masirib ti adipen?

Idi umuna a siglo, adda bassit a grupo dagiti “apostol ken panglakayen idiay Jerusalem.” Nagserbida kas bagi a manarawidwid a nangaramid kadagiti napateg a desision para iti intero a kongregasion dagiti Kristiano a dinutokan ti espiritu. (Aramid 15:2) Agkaykaysada idi iti panagdesision ta agpapaiwanwanda iti Kasuratan ken iti espiritu ti Dios. (Aramid 15:25) Kasta met laeng ti ar-aramiden ti Bagi a Manarawidwid ita.

Us-usaren dayta ti Dios a mangaramid iti pagayatanna. Dagiti kakabsat a dinutokan ti espiritu nga agserserbi kas Bagi a Manarawidwid ipatpategda unay ti Sao ti Dios ken adun ti kapadasanda iti panangasikaso kadagiti praktikal ken naespirituan a banag. Linawas nga agmimitingda tapno pagsasaritaan dagiti kasapulan ti kakabsatda iti intero a lubong. Kas idi umuna a siglo, maipakaammo dagiti naibatay iti Biblia nga instruksion babaen iti surat wenno kadagiti agdaldaliasat a manangaywan ken dadduma pay. Gapu iti dayta, agtutunos ti panagpampanunot ken aramid dagiti adipen ti Dios. (Aramid 16:4, 5) Ti Bagi a Manarawidwid ti mangas-asikaso iti pannakaisagana ti naespirituan a taraon ken pannakadutok dagiti kakabsat a lallaki a mangidaulo, ket iparparegtana iti amin nga iyun-unada ti panangikasaba iti Pagarian.

Agpapaiwanwan dayta iti espiritu ti Dios. Ti Bagi a Manarawidwid ket agpampannuray iti Kangatuan iti intero nga uniberso a ni Jehova ken iti Ulo ti kongregasion a ni Jesus. (1 Corinto 11:3; Efeso 5:23) Saan nga ibilang dagiti miembrona nga isuda ti lider ti ili ti Dios. Isuda ken ti amin a Kristiano a dinutokan ti espiritu ket agtultuloy a “sumursurot iti Kordero [a ni Jesus] iti sadinoman a papananna.” (Apocalipsis 14:4) Apresiaren ti Bagi a Manarawidwid no ikararagantayo ida.

• Asino ti bagi a manarawidwid idi umuna a siglo?

• Kasano nga agpapaiwanwan iti Dios ti Bagi a Manarawidwid ita?

Ti Bethel ket Hebreo a sao a “Balay ti Dios” ti kaipapananna. (Genesis 28:17, 19, footnote) Maitutop daytoy nga awag kadagiti pasilidad dagiti Saksi ni Jehova iti intero a lubong. Ditoy a maor-organisar ken masupsuportaran ti trabaho a panangasaba. Ti Bagi a Manarawidwid ket agserserbi iti sangalubongan a hedkuarter idiay New York State, U.S.A., ket sadiay nga as-asikasuenna dagiti trabaho kadagiti sanga nga opisina iti adu a pagilian. Kas grupo, dagidiay agserserbi kadagita a pasilidad ket maaw-awagan iti pamilia ti Bethel. Kas iti pamilia, agkakaduada nga agnanaed, agtrabtrabaho, mangmangan, ken agad-adal iti Biblia.​—Salmo 133:1.

Naisangsangayan a lugar a situtulok a pagtrabtrabahuan dagiti miembro ti pamilia. Iti tunggal pasilidad ti Bethel, adda dagiti Kristiano a lallaki ken babbai nga agserserbi iti amin a tiempo a mangaramid iti pagayatan ti Dios ken agtrabtrabaho para iti bambanag a nainaig iti Pagarian. (Mateo 6:33) Awan kadakuada ti masuelduan wenno matangdanan, ngem libre ti pagyanan ken kanenda ken addaanda met iti allowance para iti personal a paggastuanda. Addaan iti trabaho ti amin nga adda iti Bethel, iti man opisina, kosina, wenno panganan. Dadduma ket iti pagimprentaan, panagdalus, panaglaba, panagmantener, wenno dadduma pay.

Lugar nga aduan iti trabaho a mangsupsuporta iti panangikasaba iti Pagarian. Ti kangrunaan a panggep ti tunggal Bethel ket ti panangipakaammo iti kinapudno a linaon ti Biblia iti adu a tattao agingga a mabalin. Kas pagarigan, naisurat daytoy a broshur babaen ti panangiwanwan ti Bagi a Manarawidwid, naipatulod iti elektroniko a pamay-an iti ginasut a grupo dagiti agipatpatarus iti intero a lubong, nayimprenta kadagiti napapartak a pagimprentaan iti sumagmamano a pasilidad ti Bethel, sa naipatulod iti nasurok a 120,000 a kongregasion. Kadagitoy amin a proseso, dakkel ti maitultulong ti pamilia ti Bethel a mangsupsuporta iti kagaganatan a trabaho​—ti panangikasaba iti naimbag a damag.​—Marcos 13:10.

• Siasino dagiti agserserbi iti Bethel, ken ania dagiti maipapaay kadakuada?

• Ania a naganat a trabaho ti supsuportaran ti aktibidad iti Bethel?

Dagiti miembro ti pamilia ti Bethel ket agserserbi iti nadumaduma a departamento, a mangas-asikaso iti trabaho a panangasaba iti maysa wenno sumagmamano a pagilian. Mabalin nga agipatpatarusda, agim-imprenta, mangas-asikaso kadagiti maitulod a literatura, agar-aramid iti audio ken video, wenno dadduma pay.

Ti Komite ti Sangay ti mangay-aywan iti aktibidad. Ti Bagi a Manarawidwid intalekna ti panagandar ti tunggal sanga nga opisina iti Komite ti Sangay a buklen ti tallo wenno ad-adu pay a kualipikado a panglakayen. Daytoy a komite ti mangireport iti Bagi a Manarawidwid iti nagrang-ayan ti aktibidad iti tunggal pagilian a sakup ti komite ken iti aniaman a problema a mabalin a tumaud. Dagita a report ket makatulong iti Bagi a Manarawidwid a mangikeddeng no ania dagiti masapul a maisuro kadagiti publikasion, gimong, ken asamblea. Dagiti pannakabagi ti Bagi a Manarawidwid ket regular met a maibaon a mangbisita kadagiti sanga nga opisina ken mangiwanwan iti Komite ti Sangay no kasanoda nga asikasuen dagiti annongenda. (Proverbio 11:14) Adda mayurnos nga espesial a programa a pakairamanan ti palawag ti pannakabagi ti hedkuarter tapno maparegta dagiti adda iti teritoria ti sanga nga opisina.

Supsuportaranna dagiti lokal a kongregasion. Adda kakabsat a lallaki iti sanga nga opisina a mangaprobar iti pannakabuangay dagiti baro a kongregasion. Adda met dagiti mangas-asikaso iti aktibidad dagiti payunir, misionero, ken manangaywan iti sirkito nga agserserbi iti teritoria ti sanga nga opisina. Iyur-urnosda dagiti asamblea ken kombension, pannakaibangon dagiti baro a Kingdom Hall, ken sigsiguraduenda a dagiti literatura ket maipatulod kadagiti kongregasion. Amin a trabaho iti sanga nga opisina ket makatulong tapno naurnos ken naballigi ti trabaho a panangasaba.​—1 Corinto 14:33, 40.

• Kasano a tumultulong dagiti Komite ti Sangay iti Bagi a Manarawidwid?

• Ania dagiti trabaho iti sanga nga opisina?

Tapno maaramidmi ti amin a kabaelanmi a mangipakaammo iti “naimbag a damag . . . iti tunggal nasion ken tribu ken lengguahe ken ili,” mangipabpablaakkami kadagiti literatura iti nasurok a 900 a lengguahe. (Apocalipsis 14:6) Kasanomi nga ar-aramiden daytoy narigat a trabaho? Babaen ti tulong dagiti mannurat iti nagduduma a pagilian ken dagiti napasnek nga agipatpatarus​—nga aminda ket Saksi ni Jehova.

Maisurat iti Ingles ti orihinal a material. Ay-aywanan ti Bagi a Manarawidwid ti aktibidad ti Writing Department iti sangalubongan a hedkuartermi. Iyur-urnos daytoy a departamento ti aramiden dagiti mannurat nga agserserbi iti hedkuarter ken iti sumagmamano a sanga nga opisina. Nagduduma a pagilian ti ayan dagiti mannurat isu a naglaon dagiti publikasionmi kadagiti topiko a paginteresan ti tattao, aniaman ti pagilian wenno kulturada.

Maipatulod ti material kadagiti agipatpatarus. Apaman a ma-edit ken maaprobaran dayta, maipatulod iti elektroniko a pamay-an kadagiti grupo dagiti agipatpatarus iti intero a daga. Ipatarus, korehiren, ken basaenda ti naipatarus. Ikagkagumaanda a pilien ti “umiso a sasao ti kinapudno” a mangipatarus iti eksakto a kaipapanan ti Ingles.​—Eclesiastes 12:10.

Dagiti kompiuter ti mangpapartak iti proseso. Saan a masukatan ti kompiuter dagiti tattao a mannurat ken agipatpatarus. Ngem mapapartak ti trabahoda babaen kadagiti elektroniko a diksionario, computer program, ken bambanag a mausar iti panagsirarak. Nangdisenio dagiti Saksi ni Jehova iti program a maaw-awagan iti Multilanguage Electronic Publishing System (MEPS) a pakaiserrekan dagiti naipatarus iti ginasut a lengguahe, mainayon kadagiti ladawan, sa maurnos tapno mayimprenta.

Apay nga ar-aramidenmi daytoy, uray kadagiti lengguahe ti sumagmamano la a ribu a tattao? Gapu ta pagayatan ni Jehova a “maisalakan koma ti amin a kita ti tattao ken maaddaanda iti umiso a pannakaammo iti kinapudno.”​—1 Timoteo 2:3, 4.

• Kasano a maisursurat dagiti publikasionmi?

• Apay nga ipatpatarusmi dagiti literaturami iti nagadu a lengguahe?

Kada tawen, agipabpablaak ken agiwarwaras ti organisasionmi iti ginasut a milion a Biblia ken dadduma pay a publikasion nga awan bayadna. Agibangbangon ken agmanmantenerkami kadagiti Kingdom Hall ken sanga nga opisina. Supsuportaranmi ti rinibu a Bethelite ken misionero, ken tumultulongkami no adda didigra. Isu a nalabit pampanunotem, ‘Paggapgapuan ngata ti pondoda?’

Saankami a mangal-ala iti apagkapullo, agpabpabayad, wenno agkolkolekta. Nupay dakkel ti magasto iti panangsuportarmi iti trabaho a panangasaba, saankami nga agur-ur-or iti kuarta. Nasurok a 100 a tawenen ti napalabas, kinuna ti maikadua a ruar ti magasin a Pagwanawanan a patienmi a supsuportaran ni Jehova ti trabahomi isu a “pulos a [saankaminto] a dumawat wenno agpakaasi iti tulong ti tao”​—ket talaga a saanmi nga inaramid dayta!​—Mateo 10:8.

Dagiti aktibidadmi ket supsuportaran ti boluntario a donasion. Adu ti mangap-apresiar iti trabahomi a panangisuro iti Biblia ken mangmangtedda iti donasion. Uray dagiti Saksi a mismo, maragsakanda a mangusar iti panawen, pigsa, kuarta, ken dadduma pay a sanikuada tapno maaramid ti pagayatan ti Dios iti intero a daga. (1 Cronicas 29:9) Kadagiti Kingdom Hall, asamblea, ken kombensionmi, adda dagiti kahon a pagitinnagan iti kontribusion ti amin a mayat a mangted iti donasion. Mabalin met ti mangted iti donasion babaen ti website-mi a jw.org. Kaaduanna, dagiti donasion ket inted dagiti saan a baknang, a kas iti inaramid ti napanglaw a balo nga inapresiar unay ni Jesus gapu ta nangipisok iti dua a sinsilio a bassit ti pategna iti pagitinnagan ti kontribusion ti templo. (Lucas 21:1-4) No kasta, mabalin a regular a “mangilasin” ti maysa a tao iti itedna a donasion sigun iti “inkeddeng ti pusona.”​—1 Corinto 16:2; 2 Corinto 9:7.

Kombinsidokami nga itultuloy ni Jehova a tignayen ti puso dagidiay mayat a ‘mangpadayaw kenkuana iti napateg a bambanagda’ kas panangsuportar iti trabaho ti Pagarian tapno maibanag ti pagayatanna.​—Proverbio 3:9.

• Ania ti nakaidumaan ti organisasionmi iti dadduma a relihion?

• Ania ti pakaus-usaran dagiti boluntario a kontribusion?

Kas ipakita ti nagan a Kingdom Hall, ti kangrunaan a pannursuro ti Biblia a mailawlawag sadiay ket ti Pagarian ti Dios​—ti tema ti ministerio ni Jesus.​—Lucas 8:1.

Sentro dagitoy ti pudno a panagdaydayaw iti komunidad. Dita nga iyur-urnos dagiti Saksi ni Jehova ti trabaho a panangikasaba iti naimbag a damag maipapan iti Pagarian. (Mateo 24:14) Agduduma ti kadakkel ken disenio dagiti Kingdom Hall, ngem simple amin dagita. Kaaduanna a saan laeng a maymaysa a kongregasion ti mangus-usar kadagita. Kadagiti nabiit pay a tawen, addan naibangon wenno na-renovate a pinullo a ribu a Kingdom Hall (agpromedio iti lima iti kada aldaw) tapno adda paggigimongan ti umad-adu a bilang ti kongregasionmi. Kasanomi a naaramid daytoy?​—Mateo 19:26.

Naibangon dagitoy babaen kadagiti donasion. Maipatulod dagitoy a donasion iti sanga nga opisina. Maipaay ti pondo kadagiti kongregasion a masapul a mangibangon wenno mangtarimaan iti Kingdom Hall-da.

Ibangbangon dagitoy dagiti boluntario a nagduduma ti kasasaadda iti biag. Iti adu a pagilian, adda dagiti naorganisar a Kingdom Hall Construction Group. Dagiti grupo dagiti construction servant ken boluntario ket maibabaon iti nagduduma a kongregasion iti pagilian, uray kadagiti nasulinek a lugar tapno tulonganda dagiti lokal a kongregasion a mangibangon iti Kingdom Hall-da. Iti dadduma a pagilian, adda dagiti kualipikado a Saksi a nadutokan a mangiwanwan iti panagibangon ken panangtarimaan kadagiti Kingdom Hall iti naituding a rehion. Nupay adu ti eksperto iti panagibangon nga agbolboluntario iti tunggal proyekto iti dayta a rehion, ti kaaduan nga agboluntario ket dagiti miembro ti kongregasion a mangusar iti Kingdom Hall. Posible amin dagitoy gapu iti tulong ti espiritu ni Jehova ken ti amin-kararua a panangikagumaan dagiti adipenna.​—Salmo 127:1; Colosas 3:23.

• Apay a naawagan iti Kingdom Hall dagiti lugar a pagdaydayawanmi?

• Apay a kabaelanmi ti agibangon kadagiti Kingdom Hall iti intero a lubong?

Ti nasantuan a nagan ti Dios ket makita iti tunggal Kingdom Hall dagiti Saksi ni Jehova. Gapuna, ti panangtaginayon a nadalus, presentable, ken nasayaat ti kasasaad ti Kingdom Hall-mi ket ibilangmi a pribilehio ken napateg a paset ti sagrado a panagdaydayawmi. Mabalin a tumulong ti amin.

Agboluntariokami nga agdalus kalpasan ti gimong. Kalpasan ti gimongmi, pagragsakan dagiti kakabsat a dalusan ti Kingdom Hall. Ken maminsan iti kada lawas a madalusan a naimbag dayta. Adda panglakayen wenno ministerial nga adipen a mangorganisar iti panagdalus. Gagangay nga adda sursurotenna a checklist. Adda dagiti agbolboluntario nga agwalis, agnasnas, ag-vacuum, agpunas, agurnos iti tugaw, agdalus iti kasilias, tawa, arubayan, wenno agibelleng iti basura. Maminsan wenno ad-adu pay a daras iti makatawen nga adda maaramid a general cleaning. Kaduami dagiti annakmi nga agdalus. Iti kasta, maisuromi ida a mangraem iti lugar a pagdaydayawanmi.​—Eclesiastes 5:1.

Tumultulongkami iti panagtarimaan. Kada tawen, mainspeksion a naimbag ti uneg ken ruar ti Kingdom Hall. Regular a maar-aramid daytoy tapno makita ti masapul a matarimaan ket maliklikan ti dakkel a paggastuan. (2 Cronicas 24:13; 34:10) Ti nadalus ken nasayaat ti pannakamantenerna a Kingdom Hall ket maitutop a pagdaydayawanmi iti Dios. No makiramankami iti daytoy a trabaho, maipakitami nga ay-ayatenmi ni Jehova ken ipatpategmi ti lugar a pagdaydayawanmi. (Salmo 122:1) Makaipaay met daytoy iti nasayaat nga impresion iti komunidad.​—2 Corinto 6:3.

• Apay a rumbeng a saanmi a baybay-an ti lugar a pagdaydayawanmi?

• Ania dagiti naaramid nga urnos tapno agtalinaed a nadalus ti Kingdom Hall?

Kayatmo kadi ti agsukimat tapno umadu ti pannakaammom iti Biblia? Adda kadi kayatmo a maammuan maipapan iti maysa a teksto wenno tao, lugar, wenno banag a nadakamat iti Biblia? Wenno napampanunotmo kadin no makatulong ti Sao ti Dios iti problemam? No kasta, mapanka iti library ti Kingdom Hall.

Mangipaay dayta kadagiti alikamen a makatulong iti panagsukimat. Mabalin a saan a kompleto ti kopiam kadagiti naibatay iti Biblia a publikasion dagiti Saksi ni Jehova iti bukodmo a lengguahe. Ngem ti library iti Kingdom Hall ket naglaon iti kaaduan kadagiti kabaruan a publikasion. Mabalin nga addaan met dayta iti nagduduma a patarus iti Biblia, diksionario, ken dadduma pay a makatulong a reperensia. Mabalinmo ti mapan iti library sakbay ken kalpasan ti gimong. No adda kompiuter, mabalin nga addaan dayta iti Watchtower Library. Maysa daytoy a program iti kompiuter a naglaon kadagiti kopia dagiti publikasionmi ken addaan iti nalaka nga usaren a search feature a pangbirokam iti topiko, sao, wenno teksto.

Makatulong dayta kadagiti estudiante iti Gimong a Panagbiag ken Ministerio. Makatulong kenka ti library iti Kingdom Hall iti panangisaganam kadagiti pasetmo. Ti manangaywan iti Gimong a Panagbiag ken Ministerio ti mangas-asikaso iti library. Siguraduenna a naurnos dayta ken adda dagiti kabaruan a publikasion. Isu wenno ti mangyad-adal kenka ti mangisuro no kasano ti agbirok iti impormasion a kasapulam. Ngem saan a mabalin ti agiruar iti libro manipud iti Kingdom Hall. Annadantayo met dagiti libro ken saantayo a markaan dagita.

Kuna ti Biblia a tapno ‘masarakantayo ti pannakaammo maipapan iti Dios,’ masapul a sidadaantayo a mangbirok iti dayta a “kas iti nalmeng a gameng.” (Proverbio 2:1-5) Makatulong ti library iti Kingdom Hall iti panagsukimatmo.

• Ania dagiti alikamen iti library iti Kingdom Hall a makatulong iti panagsukimat?

• Siasino ti makatulong kenka nga agsukimat iti library?

Imbaga ni Jesu-Kristo kadagiti pasurotna: “Agraniag koma ti lawagyo babaen kadagiti nasayaat nga aramidyo tapno makita dagita ti tattao, ket idaydayawda ti Amayo nga adda idiay langit.” (Mateo 5:16) Gapu iti dayta, us-usarenmi a naimbag ti moderno a teknolohia, agraman ti Internet. Ti jw.org ti opisial a website-mi a naglaon iti impormasion maipapan kadagiti patpatien ken aktibidad dagiti Saksi ni Jehova. Ania dagiti makita iti dayta?

Dagiti sungbat ti Biblia kadagiti gagangay a saludsod. Makitam sadiay dagiti sungbat ti dadduma kadagiti kapatgan a saludsod ti tattao. Kas pagarigan, dagiti tract nga Agpatingganto Pay Ngata ti Panagrigrigat? ken Agbiagto Kadi Manen Dagiti Natay? ket mabasan iti website iti nasurok a 800 a lengguahe. Adda met sadiay ti Baro a Lubong a Patarus iti nasurok a 160 a lengguahe ken ti adu a katulongan iti panagadal iti Biblia, a kas iti Ania a Talaga ti Isursuro ti Biblia? ken dagiti kabaruan a ruar Ti Pagwanawanan ken Agriingkayo! Adu kadagitoy ti mabasa wenno mangngeg online wenno mai-download iti format a kas iti MP3, PDF, wenno EPUB. Mabalinmo pay ketdi nga i-print ti sumagmamano a panid ti publikasion a kayatmo nga ited iti interesado a tao iti bukodna a lengguahe! Adu met ti video para iti nagduduma a sign language. Mabalinmo nga i-download dagiti dramatiko a pannakaibasa ti Biblia, drama a naibatay iti Biblia, ken napipintas a musika.

Umiso nga impormasion maipapan kadagiti Saksi ni Jehova. Adda met sadiay dagiti kabaruan a damag ken video clip maipapan iti sangalubongan a trabahomi, kadagiti pasamak a mangap-apektar kadagiti Saksi ni Jehova, ken iti panangtulongmi kadagiti nadidigra. Adda met dagiti impormasion maipapan kadagiti mapaspasungad a kombension ken no kasano a makontak dagiti sanga nga opisinami.

Babaen kadagitoy, isilsilnagmi ti lawag ti kinapudno uray kadagiti kasusulinekan a paset ti daga. Mabembenepisiaran dagiti tattao iti amin a kontinente, agraman ti Antarctica. Ikarkararagmi nga “agtultuloy koma ti napartak a panagsaknap ti sao ni Jehova” iti intero a daga, tapno maidaydayaw ti Dios.​—2 Tesalonica 3:1.

• Kasano a makatulong ti jw.org iti ad-adu pay a tattao a mangammo iti kinapudno a linaon ti Biblia?

• Ania ti kayatmo a makita iti website-mi?